JOSHUA 18

A Taangmi Ram An ṭhen

1Kanaan ram an neh thluh hnuah Israel mi cu an zatein Shiloh ah an ra ih Bawipa ih umnak Puanthlam inn an sak. 2Israel miphun hleihnih sungah phun sarih cu ram covo nei hrih lo mi an si. 3Curuangah Joshua in an hnenah, “Nan pipu pawl ih Pathian, Bawipa ih a lo pekmi ram cu luah lohli loin ziangtik tiangso nan hngah ding? 4Hrin khat ihsin minung pathum fingfing ka hnenah ratter uhla hi ram sungah ka thlah ding. Hrin khat fingfingih co dingah a mawi tawkzawn a si tiih an hmuhnak bangtuk in a thuhla an ngan pei ih ka hnenah an ra kir pei. 5Hi ram cu ṭhen sarih ah an ṭhen ding. Judah hrin cu anmah ih ram thlanglam ah an um pei ih Josef hrin cu anmah ih ram saklam ah an um pei. 6Ram ṭhen ṭhen sarih ih thuhla cu nan ngan pei ih ka hnenah nan rak keng pei. Cuih hnuah nanmah ih ai-awh in Bawipa nan Pathian ih mithmuh ah camcawhfung zuhnak ka tuah ding. 7Levi mi pawl cu nanmah vek in comi ram an nei lo ding. Ziangahtile an covo cu Bawipa ih puithiam hnaṭuan a si. Cun Bawipa ih siahhlawh Moses ih a zem zo bangtuk in Gad, Reuben, le Manasseh hrinih a hrek pawl tla cu Jordan ihsin nisuahnak lamih ram an co zo a si,” tiah a ti.

8Joshua ih a fial bangtuk in ram zohtu ding pawl cu an pok ih Joshua in an hnenah, “Ram kipah va feh uhla a thuhla va ngan uh. Cule ka hnenah ra sal uh. Nanmah ih ai-awh ah Shiloh ah hin Bawipa ih mithmuh ah camcawhfung zuhnak ka tuah ding a si,” tiah thu a cah. 9Cuticun Kanaan ram khuazakipah an feh ih a thuhla cu ca sungah an ngan. Ram cu ṭhen sarih ah an ṭhen ih khua hmin pawl khal an ngan thluh. Cuih hnuah Shiloh ih an riahnak ahcun Joshua hnenah an ra kir sal. 10Cutikah Joshua in Bawipa ih mithmuh ah camcawhfung zuhnak cu a tuah ih ram ṭhen khat cu Israel hrin khat fingfing hnenah a zem.

Benjamin Hrin ih Comi Ram

11Benjamin hrin pawl in camcawhfung an zuk ih an ngahmi ram cu Judah hrin le Josef hrin pawl ih comi karlak ram a si. 12Saklam ah an ramri cu Jordan tiva ihsin a thok ih Jerikho ih tlangtluan tiang a hung so. Cuihsin nitlaknak lamah a phei ih tlangpar ram ihsin Bethaven nelrawn a thleng. 13Cutawk ihsin Luz lamah a suk ih Luz tlangtluan (a si lole Bethel) a thleng ih Ataroth Addar ah a suk sal ih cuih hnuah Thlanglam Beth Horon ihsin thlanglam tlang tiang a si. 14Cutawk tlang cu a vel ih Beth Horon tlang nitlaknak lam kap ihsin a suk sal ih Judah mi an umnak Kiriath Baal (a si lole Kiriath Jearim) khawpi a vung thleng. Cumi cu nitlaknak lam ramri a si. 15Thlanglam ramri cu Kiriath Jearim khua kap ihsin a thok ih nitlaknak lamah a phei ih Neftoah Tipuut a va thleng. 16Cutawk ihsin Hinnom fapa ih horkuam timi zawnih a ummi tlangtluan kap le Refaim horkuam ih saklam kapah a vung suak. Cule En Rogel lamah Jebus tlangtluan thlang ihsin Hinnom horkuam ah a vung thleng. 17Cutawk ihsin En Shemesh ah a kel so ih Adummim Tlangkawn zawnih Geliloth ah a thleng. Reuben fapa Bohan ih Lungpi an timi ah a suk sal ih, 18Beth Arabah tlangtluan sak ihsin a lan ih Jordan Kuam a vung thleng. 19Cutawk ihsin a so sal ih Beth Hoglah tlangtluan sak ihsin Tipi Thi saklam kap, Jordan tiva a vung luhnak ah a netnak a si. Himi cu thlanglam ramri a si. 20Nisuahnak lam ramri cu Jordan tiva a si. Benjamin hrin pawl ih comi ramih ramri cu a tlunlam bangtuk in an si.

21Benjamin hrin pawl ih an comi khawpi pawl cu Jerikho, Beth Hoglah, Emek Keziz, 22Beth Arabah, Zemaraim, Bethel, 23Avvim, Parah, Ofrah, 24Khefar Ammoni, Ofni, le Geba an si. Khawpi hlei hnih le an kiangkapih khawte pawl tla an si. 25A dang khawpi tla cu Gibeon, Ram Ah, Beeroth, 26Mizpah, Kefirah, Mozah, 27Rekem, Irpeel, Taralah, 28Zela, Haelef, Jebus khua (Jerusalem timi), Gibeah, le Kiriath Jearim an si. Khawpi hlei li le an kiangkapih khawte pawl tla an si. Benjamin sungkhat pawl ih comi ram cu hipawl hi an si.

Currently Selected:

JOSHUA 18: FCL

Highlight

Copy

Compare