JOSHUA 1
1
Kanaan Ram Neh Dingin Pathian Thupeknak
1 Bawipa riantu Moses a thih hnuah Moses bawmtu, Nun ih fapa Joshua hnenah Bawipa in, 2“Ka siahhlawh Moses cu a thi zo. Nangmah le Israel mi zatein nan timtuah uhla Jordan tiva nan tan pei ih ka lo pek dingmi ram ah nan feh pei. 3Moses hnenih ka sim zo bangtuk in nan fehnak dingmi ram hmuahhmuah cu nanmah ka miphun hnenah ka lo pe zo a si. 4Nan ram cu thlanglam nelrawn ihsin saklam ah Lebanon tlang pawl tiang, nisuahnak lam ah Eufrates tivapi ihsin Hit ram hmuahhmuah le nitlaknak lamah cun Mediterranean Tifinriat tiang a si ding. 5Na nun sung hmuahhmuah ah zohman in an lo neh lo ding. Moses hnenih ka rak um bangtuk in na hnen khal ah ka um ding. Ziangtik hmanah ka lo tanta lo ding ih ka lo hnong lo ding. 6Cak le ralṭha in um aw, ziangahtile ka lo pe ding tiah nan pu nan pa hnenih ka rak kam ciami hih ram hi na lak tikah Israel mi pawl hi nangmah in na hruai ding. 7Moses ih a lo pekmi Thukham cu kimtein thlun dingah cakzet le ralṭhazet in um aw. Thukham fate bik tiang daithlang loin thlun awla na fehnak ih kipah na lam a tluang ding. 8Thukham cabu cu hngilh hrimhrim hlah. A sungih nganmi bangtuk ih na nun theinak dingah a sun a zan in siar ringring aw. Cutiih na tuah le na ṭhangso ding ih na tuahmi hmuahhmuah ah na hlawhtling ding a si. 9Cakzet le ralṭhazet in um aw ti ih thu ka lo pekmi cu ziangtik hman ah hngilh hlah. Ṭih hlah, na thin nau hlah; ziangahtile Bawipa na Pathian keimah in na fehnak kipah ka lo umpi ding a si,” tiah a ti.
Mipi Hnenah Joshua In Thu A Pek
10Cule Joshua in Israel mi hruaitu pawl cu, 11“Nan riahnak hmun kipah feh uhla ‘Nan in ding le nan ei ding timtuah thluh uh, ziangahtile ni thum sungah Jordan tiva nan tan ding ih Bawipa nan Pathian in a lo pekmi ram cu nan co ding a si,’ tiin va sim uh,” tiah thu a pek.
12Joshua in Reuben mi le Gad mi le Manasseh mi a hrek pawl hnenah, 13“Bawipa ih siahhlawh Moses ih a lo simmi ‘Bawipa nan Pathian in nan khua le nan ram hrangah hi ram cu a lo pek ding,’ a timi cu ciing ṭha uh. 14Nan nupi pawl, nan fanau pawl le nan ṭilva pawl hmuahhmuah thawn Moses ih a lo pekmi ram, Jordan ihsin nisuahnak lamah hin nan um pei; asinain nanmah ih lakih ralkap pawl hmuahhmuah cu nan phunpi Israel mi pawl hrangih raldo dingah hmaiah nan nor pei ih Jordan tiva nan tan pei. 15Bawipa nan Pathian ih a lo pekmi hi ramah Israel nan unau pawl in umhmun an khuar hnuah Bawipa ih siahhlawh Moses ih a lo pekmi Jordan tiva ihsin hitawk nisuahnak lamah nannih khal nan ra kir ding ih nan ramah hin nan um ding a si,” tiah a ti.
16Cumi an theih tikah annih in, “In fial mi hmuahhmuah cu kan tuah ding ih in thlahnak pohpoh ah kan feh ding. 17Moses ih thu kan thlun vek thotho in na thu kan lo thlun ding; Bawipa na Pathian cu Moses hnenih a um bangtuk in na hnenah um hram seh. 18Zokhal na thu a lo eltu le a thlun lotu cu thah a si ding. Cakzet le ralṭhazet in um aw,” tiah Joshua cu an ti.
Currently Selected:
JOSHUA 1: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.