JOB 40
40
Bawipa in Job hnenah:
1-2Job, Ziangkimtithei Pathian cu
na engtai a si,
Dung na siip ding maw, a thu na
let ding so?
Job in hiti in a sawn:
3-4Aatthlakza in ka ṭong zo,
Bawipa,
Kei in ziangso ka lo leh thei ding?
Zianghman ka ṭong nawn lo ding.
5Ka ṭong dingzat hnakih tam
ka ṭong zo.
6Cule Bawipa in phusiing sungin
Job hnenah hiti in a let:
7Job, pacang bangin ding awla,
Ka thusuhmi pawl i let hnik.
8A ding lo ah i tuah tum mawsi?
Kei hi misual ah re tahratin,
Nang sawn a dikmi ah na ruat-aw
tum mawsi?
9Nang, keimah tlukin na cak maw?
Na aw teh keimah ih aw khawri
vekin a ring maw?
10Cuti asile hminthannak le
hmaihngalnak na neih mi thawn
ding aw;
Sunlawinak le huham na neih mi
thawn thuam aw.
11Mi puarthau pawl zoh hai aw;
Na thinhengnak suah nasa awla
an ningzak koin tuahhnik.
12Asi, zoh awla ṭhum hai hnik aw;
Miṭha lo pawl cu an dinnak
hmunah ciil ciammam aw.
13Leilung sungah phum ṭheh aw;
Mithi ramah hreng hai aw.
14Cutiin na tuah thei asile
A lo thangṭhat hmaisa biktu cu
Keimah ka si ding.
Nangmah in i neh a si, ka ti ding.
15Sahrang Behemoth#Behemoth cu saam timi asilole Tipithuanthum sungih Rulhreng a si thei tiin an zum. khi zohhnik;
Nangmah ka lo tuah vekin anih
khal ka tuah.
Cawcang bangin hrampi a piat.
16Asinain ziangtluk thazaang
cak so a ruangpi ah a um?
Ziangvek cahnak so a taksa ah a um?
17A mei cu sidar thingkung bangin
a khoh,
A kawng tha tla a cak ngaingai.
18A ruh cu dar bangin a khoh,
A ke tla cu thir tluan a bang.
19Ka sersiammi hmuahhmuah lakah
mangbangza bik ramsa a si;
Amah nehtu cu amah siamtu lawng
a um.
20Sahrang an tlannak tlangsaang ah,
A rawl ding hrampi a kho.
21Hlingkung hnuai ah a bok;
Cirhduup ih phaipheng lakah a relh.
22Tivakap ih hlingkung le partiam
kung in daihnem an pek.
23Tilian hman a ṭih lo;
Jordan tisuar in a hmai deeng
rero hmansehla daitein a um meen.
24Zoin so a mit hup tahratin a kai
thei ding?
Zoin so a hnar ihsin sio in a awk
thei ding?
Currently Selected:
JOB 40: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
