JOHAN 19
19
1Cule Pilat in Jesuh cu a hruai ih ralkap pawl a vuakter. 2Ralkap pawl in hling a neimi thinghnge in lukhuh an phiar ih an khumter. Cule puan sen an sinter. 3A hnenah an feh ih, “Judah Siangpahrang hi a nunkhua sau hram seh,” tiah an ti ih an beng.
4Pilat cu a va suak sal ih mipi hnenah, “Ngaihnik uh! A parah thah tlak sualnak ka hmu lo, ti langternak ah nan hnenah ka rak hruai ding,” tiah a ti. 5Cuti cun hling lukhuh khumin le puan sen sinin Jesuh cu a ra suak. Pilat in an hnenah, “Zoh uh! Mi pa cu hi pa hi a si!” tiah a ti.
6Puithiam upa pawl le Biakinn kiltu palik pawl in an hmuh tikah, “Thinglamtah ah that aw! Thinglamtah ah that aw,” tiah an auh.
Pilat in an hnenah, “Nanmahte in hruai uhla thinglamtah ah va that uh! Kei cun a parah sualnak ka hmu lo,” tiah a ti.
7Cule Judah mi pawl cun, “Daan kan nei ih cuih daan vek cun a thih a ṭul a si, ziangahtile Pathian Fapa ka si a ti,” tiah an let.
8Cumi cu Pilat in a theih tikah a thin a phang deuhdeuh. 9A inn sungah a vung lut sal ih Jesuh cu, “Khuiinso na rat?” tiah a sut.
Asinain Jesuh cun a sawn lo. 10Pilat in, “I sawn lo ding maw si? Nangmah thlah theinak le thah theinak thu ka neih hi na thei maw?” tiah a ti.
11Jesuh in, “Ka tlunih thu na neih theinak hi Pathian ih a lo pek ruangah a si. Curuangah nang hnakin na kutih i thlengtertu pa hi a sual sawn a si,” tiah a ti.
12Cumi cu Pilat in a theih tikah Jesuh thlah theinak lamzin kha a hawl. Asinain mipi cun, “Hi pa na thlah asile Rom Siangpahrang ih rualpi na si lo. Zokhal Siangpahrang ka si a ti awtu cu Rom Siangpahrang ih ral an si,” tiah an au ciamco.
13Cuih ṭong cu Pilat in a theih tikah Jesuh cu lengah a hei suahpi ih, “Lungphah Tual,” timi hmunih thuṭhentu tonak ah a to. Cuih hmun cu Hebru ṭong in “Gabbatha,” an ti.#19.13 Gabbatha timi hi Aramaik ṭong a si ih a tican fiangtein theih a si lo. “Inn saknak tlangmual” tican a si, a titu an um. 14Lantak Puai ding ni khat a duh ni a si ih sunlai hrawng a si. Pilat in mipi pawl cu, “Nan Siangpahrang hi zohhnik uh!” tiah a ti.
15Annih in, “That aw! That aw! Thinglamtah parah that aw!” tiah an au ciamco.
Pilat in, “Nan Siangpahrang hi maw thinglamtah parah ka thah ding?” tiah a sut.
Puithiam upa pawl in, “Sizar siarlo Siangpahrang dang kan nei lo,” tiah an ti.
16Cule Pilat in Jesuh cu thah dingah an kut sungah a pek.
Cutiin Jesuh cu an fehpi.
Thinglamtah Ah Jesuh An Khen
(Mat 27.32-44; Mar 15.21-32; Luk 23.26-43)
17A thinglamtah pu in a suak ih “Luruh Hmun,” an timi hmunah a thleng. Cuih hmun cu Hebru ṭong in “Golgotha,” an ti. 18Cutawkah Jesuh cu thinglamtah ah an khen. A dang mipa pahnih tla an khen ve ih an karlak ah Jesuh cu an thlai. 19Pilat in ca a ngan ih thinglamtah parah a taarter. Cuih ca a nganmi cu, “Nazareth mi Jesuh, Judah Siangpahrang,” ti a si. 20Jesuh an thlainak hmun cu khawpi ihsin a hlat lo ruangah cuih ca cu mi tampi in an siar. Hebru ṭong,#19.20 Hi tawkih Hebru ṭong, an timi hi a ngaingai-ah cun Aram mi (Aramaic) ṭong a si. Latin ṭong le Grik ṭong in nganmi a si. 21Puithiam upa pawl in Pilat cu, “‘Judah Siangpahrang,’ ti si loin ‘Judah Siangpahrang ka si, a ti,’ tiah ngan aw,” an ti.
22Pilat in, “Ka ngan zomi cu ka ngan vekin um seh,” tiah a ti.
23Ralkap pawl in Jesuh cu thinglamtah parih an khen ṭheh hnuah a hnipuan cu an lak ih pakhat ciar co dingah ṭhen li ah an ṭhen. Cule zungṭhit nei lo ih tahmi a korfual khal cu an lak. 24Ralkap pawl cun, “Hi korfual cu kan thlek lo pei. Zo in a co ding ti theihnak ah camcawhfung kan zuk sawn pei,” tiah an ti. Hitiih thil a cannak cu Ca Thianghlim sungih,
“Ka hnipuan cu an ṭhen aw ih,
Ka kor hrangah camcawhfung
an zuk,”#Saam 22.18
timi a kimnak dingah a si. Cubangtuk cekci cun ralkap pawl in an tuah.
25Jesuh ih thinglamtah kiangah cun a nu le a nu ih naunu le Klopas nupi Mari le Mari Magdalene pawl an ding. 26Jesuh in a nu le a duhdawtmi dungthluntu pa cutawkih an din kha a hmu ih a nu hnenah cun, “Amah kha na fapa a si,” tiah a ti. 27Cule a dungthluntu pa hnenah cun, “Anih kha na nu a si,” tiah a vun ti. Cuihsin thokin dungthluntu pa in Jesuh ih nu cu a innah a umter.
Jesuh A Thi
(Mat 27.45-56; Mar 15.33-41; Luk 23.44-49)
28Jesuh in ziang hmuahhmuah a kim ṭheh zo ti kha a thei; Ca Thianghlim sungih a ummi kimnak dingah, “Ka ti a haal,”#Saam 69.21; 22.15 tiah a ti.
29Cutawkah sabitti thur beel khat a um ih cuih sabitti thur sungah puansia an hnim ih hissop#19.29 ‘Hissop’ timi hi thingkung a si naón a fate pawl, hrampi tia, a si ih a hnge pawl cu kual a theih ih Lantak Puai caanih thianfaiter awknak ih an hman ṭheumi a si. Saam 69.21 ah zoh. fung zimah ṭemcih tahratin Jesuh cu a kaa-ah an hun hnih. 30Jesuh in cuih sabitti thur cu a tep ih, “A kim ṭheh zo,” a ti.
Cule a lu a kuun ih a thaw a cem.
Jesuh Ih Hnak An Sun
31Cule Judah mi hotu pawl cu Pilat hnenah an feh ih thinglamtah parih an thahmi pawl ih ke khiak dingah le an ruak pawl la dingah an va dil. An dil ni cu Tlawngkai Ninga a si, ziang ruangah an dil tile an thahmi ruak pawl cu Sabbath ni-ah thinglamtah parih an thlai awk hrih ding kha an duh lo; cuih Sabbath cu a thianghlim cemi ni a si fawn. 32Curuangah ralkap pawl an va feh ih Jesuh thawn hmunkhatih an thahmi pakhat pa ih ke an khiak ih cuih hnuah a pahnihnak pa ih ke khal an khiak. 33Asinain Jesuh hnen an thlen tikah a thi ngah zo ti kha an hmu ih anih cu a ke an khiak lo. 34Ralkap pakhat in Jesuh ih hnak kha a feipi in a hun sun ih hmakhatte ah thi le tidai a suak. 35Cuih thil a hmutu pa amah rori in a ṭongmi a si ih nan zum theinak dingah a si. A simmi hi a dikmi a si ih amah khal in thudik ka sim a si ti hi a thei. 36Hitiih thil a cannak cu Ca Thianghlim sungah, “A ruh pakhatte hman an khiak lo ding,”#Suah 12.46; Mipum 9.12; Saam 34.20 tiih a ummi kha a kimnak dingah a si. 37Cule Ca Thianghlim hmun dangah, “An sunmi kha an zoh ding,”#Zek 12.10; Thup 1.7 ti tla in a um.
Jesuh An Phum
(Mat 27.57-61; Mar 15.42-47; Luk 23.50-56)
38Cuih hnuah Arimathea khuami Josef in Jesuh ruak lak dingah Pilat hnenah a va dil. Josef cu Jesuh dungthluntu pakhat asinain Judah hotu pawl kha a ṭih ruangah a thupte in a rak thlun vivo. Pilat in Jesuh ruak kha na la thei, a ti ruangah Josef cun a va lak. 39Jesuh tong dingah zanih a rak feh dahtu Nikodemas khal Josef hnenah a feh ve ih zihmui pawng zakhat tluk, mura zihmui le cing thling rawimi kha a keng. 40An pahnih in Jesuh ruak kha an lak ih Judah pawl ih mithi phum daan vekin zihmui thawn puanrang nemtein an tuam. 41Jesuh an thahnak hmunah cun hmuan pakhat a um ih cuih hmuan sungah cun zohman an phum dah hrih lonak thlaan thar pakhat a um. 42Sabbath ni a si zik thlang ih cuih thlaan cu a naite fawn ruangah Jesuh ih ruak cu cutawkah an phum.
Currently Selected:
JOHAN 19: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.