JEREMIAH 51
51
Babilon Parih A Dang Thuṭhennak
1 Bawipa in, “Babilon le a minung pawl parah siatsuahtu thlipi #siatsuahtu thlipi ti ai-ah siatsuahtu thlarau ti tla a si thei. ka ratter. 2Thlipi in fanghi a semhlo bangin Babilon siatsuahtu dingah ramdangmi ka thlah ding. Cuih siatsuahnak ni a thlen tikah cun hmunkip in an do ding ih an ram cu kolh ṭheh in an tuah hnuah an taanta ding. 3An ralkap pawl conkiang sainak tikcu pe hlah uh. An thir angki hruknak tikcu khal pe hlah uh. Tlangval a si ti ah zohman zuah hlah uh. An ralkap zatein that ṭheh uh. 4Hriamhma an pu ding ih an khua pawl ih lamzin ah an thi ding. 5Israel ih A thianghlim Keimah parah an sual zo naón Bawipa, Ziangkimtithei Pathian keimah in Israel le Judah mi pawl cu ka dungtun hrih lo a si. 6Babilon ihsin tlanhlo uh. Luat dingah tlan uh. Babilon sualnak ruangah thahnak tuar duh hlah uh. A parah phu ka la ih a tuar ding zat in ka hrem a si. 7Babilon cu ka kut sungih sui khuat hai, leilung pumpi a ritertu bangtuk a si. Mi phunkip in a zu an in ih an thinlung a molh ṭheh zo. 8Babilon cu rinlopi in a tlu ih a siatral ṭheh zo. Ṭah ciamco uh. A hma hnih dingah sii hawl uh. A dam sal tla a si thei men. 9Cutawkih a ummi ramdangmi pawl in, ‘Babilon kan bawm tum naón a tlai tuk zo. Fehsan uhsila kan ram le kan khua ah tlung uhsi. Pathian in a cahnak hmuahhmuah thawn Babilon cu a hrem ih a siat ṭheh zo a si,’ an ti,” tiah a ti.
10 Bawipa in, “Ka minung pawl in ‘Bawipa in kan diknak a langter zo. Feh uhsila Bawipa kan Pathian ih thil tuahmi cu Jerusalem mi hnenah sim uhsi,’ tiah an au,” a ti.
11 Bawipa in Babilon siatsuah a tum ruangah Media siangpahrang pawl a tokhrok hai. A Biakinn an siatter ruangah cuvekin phu a la tum a si. Ralkap pawl hotu ralbawi cun, “Nan conkiang tathriam uh. Nan ralphaw keng uhla tiar cia uh! 12Babilon khawkulhnak phardawl do dingah theihternak pe uh. Ral kiltu thlah beet uh. Kilvengtu ret uh. Ral bawhtu ding thlah uh!” a ti.
Bawipa in Babilon mi parih ka tuah ding a timi cu a tuah zo. 13Khi ram ah tiva tampi le sumsaw tampi a um; asinain tikcu a nei nawn lo; a nunnak hri cu sahtan a si zo. 14Ziangkimtithei Bawipa in Babilon do dingah minung tam ngaingai, sihte zat ka run thlah ding ih ralnehnak thawn an au ding, tiah amah ih nunnak saal in thu a kam zo.
Pathian Thangṭhatnak Hla
15 Bawipa in leilung hi a huham
in a tuah;
A fimnak in lei hi a seemsuah ih,
van khal a pharh a si.
16Amah ih thupeknak in van tlun ih
tidai a huuk;
Vanhram deng ihsin khawdur a rak
keng.
Ruah lakah nimthla a kauter ih,
a thil retnak inn ihsin thli a
run kuat.
17Cumi an hmuh tikah minung cu,
zianghman an thei lo ih mi-aa
vek an si.
Milem a tuahtu pawl cu,
beidong le ninghang in an um.
Ziangahtile an tuahmi an khuavang
pawl cu nunnak nei lo,
a lem lawng an si.
18Zianghman ih ṭhahnem lo an si ih,
hmuhsuam tlak an si;
An siatral ṭheh ding;
Bawipa a rat ih a hrem tikah cun!
19Jakob ih Pathian cu cubangtuk
a si lo;
Amah cu ziang hmuahhmuah tuahtu
a si.
Israel mipawl cu Amah ih tabul si
dingah a hril a si;
Amah ih hmin cu Ziangkimtithei
Bawipa a si.
Bawipa Ih Sobul
20 Bawipa in, “Babilon, nang cu
ka sobul na si;
Ka raldonak hriamnam na si.
Miphun le uknak tampi sutkuainak ah ka lo hmang.
21Rang le a totu pawl sutbalnak ah,
Rangleeng le a mawngtu pawl
sutkuainak ah,
22Nunau le mipa thahnak ah,
Mino le upa thahnak ah,
Fala le tlangval thahnak ah,
23Tuukhal le an tuu pawl thahnak ah,
Lothlo le an leilehnak caw pawl
thahnak ah,
Uktu le bawi pawl thahnak ah,”
a ti.
Babilon Hremnak
24 Bawipa in, “Jerusalem parih thilsual an tuah ruangah Babilon le a minung pawl hnenih phu ka lak kha nan hmu ding. 25Maw Babilon, nang cu leilung pumpi a siatsuahtu tlangsaangpi vek na si; sikhalsehla Bawipa keimah hi na ral ka si. Ka lo kaihrem ding ih leilung ah ka lo hlon ding ih vutcam ah ka lo canter hnuah ka lo tlansan ding. 26Khawrop ah na cang ding ih na lungto pakhatte hman inn saknak ah hman sal a si nawn lo ding. Kumkhua in nelrawn ah na cangta ding a si. Keimah Bawipa in ka sim zo.
27“Raldo dingah theihter hminsinnak pe uh! Miphun pawl ih theih dingah tawtawrawt tum uh. Babilon do dingah miphun pawl timtuah uh. Raldo dingah Ararat ram, Minni ram le Ashkenaz ram pawl sim uh. Raldo hotu dingah ralbawi pakhat hril uh. Kharbok rual tamzet bangin raldonak rang pawl khal rak keng uh. 28Babilon do dingah miphun pawl timtuah uh. Media siangpahrang pawl, an hotu le an bawi pawl, an ralkap le an ukmi ram hmuahhmuah ko ṭheh uh. 29Leilung pumpi cu a khur ih a hnin ciamco. Ziangahtile Babilon ram cu nelrawn ah canter ih zohman um lonak ramṭhing ih canter dingah Bawipa in a tumtahmi a tuahsuak zo a si. 30Babilon ralkap pawl cu raldo nawn loin an ṭannak ruhkulh sungah an cawl. An thin a nau zo ih nunau vek an si zo. Khawpi kotka pawl cu bal ṭheh an si ih inn pawl cu meisa in a kang ciamco. 31Babilon khawpi cu hmunkip in an bal vivo zo a si, tiah Babilon siangpahrang sim dingah thuthantu pakhat hnu pakhat an tlan. 32Ral pawl in tiva tannak hmun cu an lak zo ih ruhkulh pawl cu meisa in an ur a si. Babilon ralkap pawl cu uk thei an si nawn lo ih sukso ah an vakvai. 33Reilote ah ral pawl in an saat thluk ding ih fangcilnak hmun ih fang an pal bangin leilung ah palcih an si ding. Keimah Ziangkimtithei Bawipa, Israel ih Pathian in ka sim zo,” tiah a ti.
34Siangpahrang Nebuchadnezzar in,
Jerusalem cu a saattan ih a ei.
Tidai retnak beel bangin a thlet
ṭheh.
Sahrang bangin a dolh ṭheh a si.
A duhmi lawng a lak ih,
a dang cu a hlonhlo.
35Zion mi pawl in, “Kan thisen
an luanter ruangah,
Babilon mipawl in tuar hai seh,”
ti hai seh.
Jerusalem mipawl in,
“Harnak kan tuar ruangah hin,
Babilon mi pawl cawh siseh,”
ti hai seh.
Bawipa In Israel A Bawm Ding
36Curuangah Bawipa in Jerusalem mi hnenah, “Nan thu hi ka dinpi ding ih nan parih thilsual an tuahmi ruangah nan ral pawl ka cawh ding. Babilon ram ih tidai dawhhna pawl ka caarter ding ih an tiva pawl ka kangter ding. 37Khi ram cu hnawmpen ah ka cangter ding ih hramlak ramsa umnak lawngah a cang ding. Zoh ngam lo dingah a cang ding ih a hmutu hmuahhmuah an tuk a suum ding. 38Babilon mipawl cu kiosa bangin an huuk ding ih kiosa no bangin an ai ding. 39Mi hamṭam pawl an si maw? Rawl ei puai ka tuahsak ding ih zu an ri ding ih lungnuam in an um ding. An it that ding ih an ṭhang nawn lo ding. 40Tuufaate, me le tuucang an that vekih thah dingah ka hruaihlo ding. Keimah Bawipa in ka sim zo a si,” tiah a ti.
Babilon Ih Tuarmi
41 Bawipa in Babilon thu ah hiti in a sim: “Leilung pumpi ih porhmi khawpi cu ral in an lak zo. Mi phunkip hmaiah Babilon cu tuksumza ah a cang zo. 42Tipi in Babilon a khuh ih tilet cu a parah a huuk ciamco. 43A dang khua pawl cu zoh duh-awk lo ah an cang ih zohman um duh lonak, pal duak ding hmanah duh lo dingmi, nelrawn caar ah an cang. 44Babilon ih khuavang Beel cu ka hrem ding ih a rak rukmi thilri pawl ka khirhter ding. Miphun pawl in an bia nawn lo ding. Babilon kulhnak phardawl pawl an tlu zo. 45Israel mipawl, tlan thluh uh. Nun nan duh a si ahcun ṭihnungza ka thinhengnak hi tlansan uh. 46Nan theihmi thawmvang ruangah ṭih hlah uh. Nan thin khal nau hlah seh. Kumtinte thu dangdang, ram sungah thah awknak le siangpahrang pakhat le pakhat an do-aw ti thu a thang. 47Curuangah Babilon ka tisiatnak tikcu a ra thleng ding. Ram pumpi cu ningzak le mualpho in ret a si ding ih a minung pawl cu thah an si ding. 48Saklam ihsin siatsuah dingih a rami minung pawl kut sungih Babilon a tluk tikah cun lei le van ih um ziang hmuahhmuah cu lungawi in an au ciamco ding. 49Leilung pumpuluk ah mi tampi Babilon in a thihter; atu-ah Babilon cu Israel mi tampi a thihter ruangah a tlu ve thlang ding. Keimah Bawipa in ka sim zo,” a ti.
Babilon Ih Ummi Israel Pawl Hnenah Pathian Thucahmi
50 Bawipa in Babilon ih a minung pawl hnenah, “Thihnak ihsin nan luat zo! Atu feh uh! Zianghman hngak hlah uh! Nan khua le nan ram cu a hlazet naón Bawipa keimah hi in thei uhla, Jerusalem khal ciing uh! 51Nannih in ‘Ningzak le mualpho in kan um zo. Ramdangmi pawl in Biakinn sung hmun thianghlim pawl cu an lak ṭheh zo ih zianghman ti theimi kan nei lo,’ nan ti. 52Curuangah ka lo sim: Tikcu a ra thleng ding ih Babilon milem pawl ka siatsuah ṭheh ding. Hmapu pawl cu ram sungah an ai an kio ding. 53Babilon cu van ah kai thei tahrat in a khohzetmi ral ṭannak ruhkulh ralhruang va sak thei hmansehla cumi siatsuahtu dingah mi ka thlah thotho ding. Keimah Bawipa in ka sim zo,” tiah a ti.
Babilon Siatsuahnak Ding
54 Bawipa in, “Babilon ihsin
ṭahnak aw le,
ramsung siatsuahnak ruangih
riahsiat ṭah thawm cu ngai uh.
55Babilon cu ka siatsuah ih,
A thawmvang neihmi cu ka
vuakdai a si.
Ralkap pawl in a huuk reromi tilet
bangin an nam ih,
Ring zetzet ih au phah in an do.
56Babilon siatsuah dingah an ra;
A ralkap pawl an kai;
An conkiang pawl an khiak ṭheh;
Miṭha lo a hremtu cu Pathian
Keimah ka si;
Babilon parah phu ka la ding.
57A ram uktu pawl, a mifim pawl,
a hotu pawl le a ralkap pawl
zu ka riter ding.
An it that dingih an ṭhang sal
nawn lo ding.
Keimah siangpahrang in ka sim zo.
Ziangkimtithei Bawipa ka si.
58A nasa zetmi Babilon ih phar
pawl cu,
leilung ah a cim ṭheh ding.
A saangzetmi kotka pawl cu,
meisa in a kang ṭheh ding.
Miphun pawl ih hnaṭuanmi cu
zianghman a si lo;
An zonzaihnak hmuahhmuah cu,
meisa hrang lawngah a si.
Ziangkimtithei Bawipa Keimah
in ka sim zo,” a ti.
Jeremiah Thucahmi Cu Babilon Ah An Kuat
59Siangpahrang Zedekiah a bawmtu pakhat cu Seraiah a si. Seraiah cu Neriah fapa, Mahseiah fasuan a si. Zedekiah cu Judah siangpahrang a ṭuan kum linak ah Babilon ah a feh ih a hnenah Seraiah khal a feh ve. Cutikah Seraiah hnenah cun thu ka cah. 60Babilon parah siseh, Babilon hrangih thu dangdang siseh, cabu sungah ka ngan. Siatsuahnak a thleng dingmi hmuahhmuah ka ngan ṭheh. 61Seraiah hnenah cun, “Babilon na thlen tikah hi cazual sungih ka nganmi hmuahhmuah hi mipi hnenah va siar tengteng aw. 62Cule Bawipa hnenah, ‘Maw Bawipa, hi hmun hi ka siatsuah ding ih kumkhua in ramṭhing ah a cang ding ih a nungmi thil, minung siseh, ramsa siseh, an um lo ding, tiah na sim zo,’ tiah thlacam aw. 63Cule Seraiah, hi cabu hi mipi hnenih na siar ṭheh hnuah nangmah rori in lungto thawn ṭemcih awla Eufrates Tivapi sungah hlon aw. 64Na hlon tikah, ‘Hi vekin Babilon parah a kim ding. Ti sungah a pil ding ih a suak sal nawn lo ding. Ziangahtile Bawipa in siatsuahnak cu Babilon parah a thlenter ding #parah a thlenter ding ti tlunah an tha a baangzet ding tiah Hebru Baibal in betmi a nei. a si,’ tiah ti aw,” ka ti.
Jeremiah ih ṭong cu hi hmuah hi a si.
Currently Selected:
JEREMIAH 51: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
