JEREMIAH 39
39
Jerusalem An Lak
1Zedekiah in Judah siangpahrang a ṭuannak kum kua kum, thla hra thla ah Babilon siangpahrang Nebuchadnezzar cu a ralkap zate thawn a ra ih Jerusalem a do. 2Zedekiah in siangpahrang a ṭuannak kum hleikhat kum, thla li thla, ni kua ni ah khawkulhnak phar dawl cu an bal thei a si. 3Jerusalem khawpi an lak tikah Babilon siangpahrang kut thuai ih bawi upa hmuahhmuah an ra ih Kotka Lai an timi ah an to. Cupawl cu Nergal Sarezer, Samgar Nebo, Sarsekhim le a dang Nergal Sarezar an si.
4Cumi cu siangpahrang Zedekiah le a ralkap pawl in an hmuh tikah khawpi sung ihsin zan ah tlanhlo an tum. Siangpahrang hmuan sung lamzin ihsin an suak ih khawpi kulhnak phar thuah hnih a pehtu kotka zin in an feh ih Jordan phairawn lamzin in an tlan. 5Sikhalsehla Babilon ralkap pawl in an dawi ih Zedekiah cu Jerikho khua kiang hmunrawn ah an kai. Cule siangpahrang Nebuchadnezzar hnenah an fehpi. Nebuchadnezzar cu Hamath peng sung Riblah khua ah a rak um ih cutawkah cun Zedekiah ih thu cu a rel. 6Riblah khua ahcun Zedekiah ih fapa pawl cu an pa ih hmuhhngan ah Nebuchadnezzar in a thah; Judah ramsung bawi upa pawl khal a that ṭheh. 7Cuih hnuah Zedekiah ih mit a phorh ih Babilon ih fehpi dingah thir cikcin in a khih. 8Cutiih an tuah laiah Babilon ralkap dang pawl in siangpahrang inn le misenpi inn pawl an ur ih Jerusalem khawkulhnak phar dawl tla an bal ṭheh. 9Netabik ah an ralkap pawl hotu ralbawi Nebuzaradan in Jerusalem khawpi sungih a taang hrih mi pawl le amah hnenih a ra tlantu pawl kha salih taang dingah Babilon ah a hruai a si. 10Judah ram ah mifarah bik pawl, thilri le loram zianghman a nei lo pawl a ṭan ih sabit hmuan le lo pawl a pekta.
Jeremiah An Suah
11Cule siangpahrang Nebuchadnezzar in ralkap hotu ralbawi Nebuzaradan hnenah thu a pek ih, 12“Jeremiah hawl ah feh awla ṭhatein va kilkhawi aw. Zianghman harsatnak pe hlah aw. A duhmi hmuahhmuah tuahsak sawn aw,” tiah a ti. 13Curuangah Nebuzaradan le bawi dang Nebushazban le Nergal Sarezer le a dang bawi upa dangdang pawl an ra ṭheh ih, 14siangpahrang inn kiltu pawl umnak inn ih in retnak ihsin in ra suah. Keimah humhim dingih ṭuanvo an pekmi Ahikam fapa le Shafan ih fasuan a si mi Gedaliah ih kut thuai ah in ret. Cuticun ka miphun pawl lak ahcun ka um.
Ebedmelek Hrangah Ruahsannak
15Siangpahrang inn kiltu pawl umnak inn ih in ret laiah Cungnungbik Bawipa, Israel ih Pathian in, 16“Sudan mi Ebedmelek hnen ah sim aw: ‘Ka tuah ding ka ti bangtuk in hi khawpi hnenah hin ṭhansonak si loin siatsuahnak ka thlengter ding. Cumi tikcu a thlen tikah a hmutu na si ve ding. 17Asinain keimah Bawipa in nang cu ka lo hum ding ih na ṭih mi pawl hnenah pek na si lo ding. 18Ka lo humhim ding ih zohman in an lo that lo ding. Keimah i rinsan zo ruangah na nunnak cu a him ding ih na luat ding a si. Keimah Bawipa in ka sim zo,’ va ti aw,” tiah a ti.
Currently Selected:
JEREMIAH 39: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
