THUṬHENTU 8
8
Midian Mi An Neh
1Efraim mi pawl cu Gideon hnenah an ra ih, “Midian mi do dingih na feh tikah ziangah so kannih in sawm ve lo? Zianghman ah in siar lo a si lo maw?” tiah an ti ih nasazet in an phunzai.
2Cutikah Gideon cun, “Nan tuah mi thawn ṭhim tikah kei ka tuah mi cu zianghman a si ual lo. Nannih Efraim mi pawl ih tuahmi thil fate hman cu keimah ih miphun pawl ih tuahmi hmuahhmuah hnakin a thupi sawn a si. 3Midian mi pawl ih lal Oreb le Zeeb tla cu Pathian in nan kut sung rori ah a lo pek a si. Hi pawl thawn ṭhim tlak dingah kei ka tuah mi ziangso a um?” tiah a ti. Cumi an theih tikah an thin a dai sal.
4Gideon le a ralkap zathum pawl cu an ra ih Jordan Tiva an tan hnu ah an baangzet naón Midian pawl cu an dawi vivo thotho. 5Sukkoth khua an thlen tikah khawsung mi hnenah, “Midian siangpahrang Zebah le Zalmunna pawl kan dawinakah ka ralkap pawl an baangzet thlang a si. Zaangfah tein ka ralkap pawl hrangah sang in pek hram uh,” tiah Gideon in a dil.
6Asinain Sukkoth khua ih upa pawl cun, “Zebah le Zalmunna pawl na kut sungih um zo vekih na hei rel; ziangah so na ralkap pawl cu sang kan pek sapbai ding! Nan kai hrih ual lo!” tiah an ti.
7Cutikah Gideon in, “A ṭha! Zebah le Zalmunna cu Bawipa in ka hnenih i pek tikah nelrawnih ummi hling le so in nan taksa ka lo hriattlek thluh ding a si,” tiah a ti. 8Cule Gideon cu Penuel ah a feh ih khawsung mi pawl cu rawl a dil sal; a sinan Sukkoth khuami vek thotho in an rak el. 9Cutikah an hnenah, “Harhdamteih ka ra kir sal tikah nan ralhruang ka bal thluh leh ding sokhaw,” tiah a ti.
10Zebah le Zalmunna cu an ralkap pawl thawn Karkor ah an um. Nelrawn miphun ralkap pawl hmuahhmuah sung ihsin thawng hlei nga lawnglawng an taang. Thawng zakhat le thawngkul cu an thi thluh zo. 11Cule Gideon cu Nobah le Jogbehah ihsin nisuahnak lam ih a ummi deuthlam ih a ummi pawl lamzin in a so ih acuih ralkap pawl ralring loih an um laifangah hmakhatte-ah a nam ciamco. 12Midian siangpahrang pahnih Zebah le Zalmunna cu an zaam; a sinan Gideon in a dawi ih an pahnih in a kaih. An ralkap pawl cu an ṭekvai thluh.
13Joash ih fapa Gideon cu a raldonak ihsin a kir ih Heres Tlangkawn in a feh. 14Cule Sukkoth khua tlangval pakhat a kai ih thu a sut. A cuih tlangvalpa cun Sukkoth khua ih lal pawl le khawsung upa sawm sarih le pasarih pawl ih hmin a ngan sak thluh. 15Cule Gideon cu Sukkoth khua ah a feh ih khawsung mi pawl cu, “In dodal ih in setet kha nan cing lai maw? ‘Zebah le Zalmunna pawl na kut sungih um zo vekih na hei rel! Ziangah so na ralkap pawl cu sang kan pek sapbai ding,’ in rak ti kha! Atu zoh uh, an pahnih in hinah an um,” tiah a ti. 16Cule nelrawn ih hling le so pawl cu a lak ngaingai ih Sukkoth khua ih upa pawl hremnak ah a hmang. 17Cuih tlunah Penuel khua ih ralhruang cu a bal ṭheh ih khawsung mipa pawl a that.
18Cule Zebah le Zalmunna cu Gideon in, “Tabor ah nan rak thah mi minung pawl cu zovek so an si?” tiah a sut.
Annih in, “Nangmah vek an si. An zate in siangpahrang fapa an bang thluh,” an ti.
19Cutikah Gideon in, “Ka unau hlir an si; ka nu ih fapa pawl rori an si. Bawipa ih hminsaal in ka lo sim: Anmah pawl rak that hlah uhla cu ka lo that ve lo ding naón!” tiah a ti. 20Cule a fapa upabik Jether hnenah, “Tho awla that hai aw!” tiah a fial. Sikhalsehla Jether cun a nam khal a zuuk lo. Tlangval no a si ruangah a ṭih.
21Cutikah Zebah le Zalmunna in, “Ra awla, nangmah in in ra that hmen. Pacang that dingah cun pacang a ṭul,” tiah an ti. Curuangah Gideon in Zebah le Zalmunna cu a thah ih an kalauk pawl hngawng ih an thlaih mi hlawnthil pawl a lak.
22Cule Israel mi pawl in Gideon cu, “Kan siangpahrang si-aw, nangmah le na fapa le na fapa ih fapa tiangin! Midian mi pawl ih kut sungih sin in run suak a sisi,” tiah an ti.
23Gideon in, “Nanmah ih uktu cu kei ka si lo ding; ka fapa khal a si lo ding. Nanmah ih uktu cu Bawipa a si ding,” a ti. 24Cule an hnenah, “Thil pakhat ka lo dil hai ding: ral pawl hnenih nan lonmi hnakhai pawl kha in pe thei pei maw?” tiah a ti. Midian mi pawl cu nelrawn mi an si ih sui hnakhai an khai.
25Cutikah, “Lungawi aipuang tein kan lo pe ding,” an ti. Puan pakhat an phah ih ral hnen ihsin an lonmi sui hnakhai pawl cu acuih puan parah cun an thlet ciamco. 26Gideon ih dil mi sui hnakhai pawl cu a zatein pawng sawmruk a rit. Himi sungah an orh mi hlawnthil, ṭhi pawl le Midian siangpahrang pawl ih hrukmi puan mankhung pawl le an kalauk pawl hngawng ih thlaih mi hlawnthil pawl a tel hrih lo. 27Gideon cun sui milem a tuah ih a khawpi Ofrah ah a ret. Israel mi an zatein Pathian an dungtun ih acuih khua ah an feh ih milem cu an biak. Gideon le a innsang hrangah cuih milem cu thang siahmi bangtuk a si.
28Cubangtuk in Midian mi pawl cu Israel mi pawl in an neh ih Israel mi hrangah phan ding ral a um nawn lo. Gideon a nun sung, kum sawmli sung cu Israel ram sungah daihnak a um.
Gideon A thi
29Joash ih fapa Gideon cu a tlung ih amah ih inn ah a um. 30Nupi tampi a neih ruangah fapa sawm sarih a nei. 31Shekhem khua khal ah nusun pakhat a nei ih acu nu cun fapa pakhat a hrin; a fapa cu Gideon in a hmin ah Abimelek a sak. 32Joash ih fapa Gideon cu mi sanṭha zet a si. A thih tikah Abiezer phun pawl ih khua Ofrah ah a pa Joash ih thlaan ah an phum.
33Gideon a thih hnuah Israel mi pawl in Pathian cu dungtun in an uiret san ih Baal khawzing pawl an biak. Baal-berith cu an khawzing ah an tuah ih an biak. 34An kiangkap ral pawl kut sungih sin a runsuaktu Bawipa an Pathian cu an thei nawn lo. 35Israel mi hrangah a tuah thei sung thil ṭhahnem zet a tuahtu Gideon innsang par khalah lungawi hna an thiam lo.
Currently Selected:
THUṬHENTU 8: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
