ISAIAH 4
4
1Cui caan a kim tikah nunau pasarih in mipa pakhat an kai dingih, “Kanmah teón kan cawm aw ko ding; hnipuan tla in holh a ṭul lo ding; pasal nei theilo ih um ningzahnak ihsin kan luatnak ding ah kan pasal a si kan lo ti hram pei,” tiah an ti ding.
Jerusalem A ṭha Saal Ding
2Tikcu caan a rathleng dingih ramsung thingkung le rawlkung pawl cu Bawipa in a tum ter dingih a mawiter ding. Israel mi sungin a taangmi pawl in an ramih a suak mi rawl an hmuh tikah an thin a nuam dingih an mithmai a ṭha saal ding. 3Jerusalem ih a taangmi, a nung dingah Pathian ih hrilmi pawl cu mithianghlim tiah kawh an si ding. 4Bawipa in a cahnak huham thawn thu a ṭhen dingih ram a thianter ding. Cun Jerusalem sualnak le thisen thletnak cu a kholhfai ding. 5Cule Zion Tlang par le cutawkih a ra khawm mi pawl ih tlunah Bawipa in sun ah khawdur a umter dingih zanah meikhu le meisa tleu a umter ding. Pathian ih sunlawinak huham in khawpi pumpi cu a khuh dingih a hum ding a si. 6Bawipaió sunlawinak in khawpi cu sun nisatnak ihsin a hneem dingih ruah a sur ih thlipi a hran hmanah beunak le himnak hmun a si ding.
Currently Selected:
ISAIAH 4: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.