HOSEA 2
2
1Curuangah nan unau Israel mi pawl cu “Pathian minung,” tiah le “Bawipa Ih Duhmi,” tiah ko uh.
Hlawhhlang Gomer, Hlawhhlang Israel
2Ka faale pawl, nan nu hi sim hnik uh; amah cu ka nupi a si lo maw? Keimah cu a pasal ka si lo maw? A uiretnak le hlawhhlang a sinak baang dingah sim uh. 3A baang lo asile a nuih pum sung ihsin a suah lai ih lawngfangkheh ih a um vekin a hnipuan ka hlit ding. Leilung ro le lei caar bangin ka tuah ding ih tihal in a thi ding. 4-5A faate pawl hnen khalah zaangfahnak ka nei lo ding; annih cu ningzah thiam lo hlawhhlang nu ih faate an si! Anih cun, “I duhtu hnenah ka feh ding; ti le rawl, tuuhmul le puan, olif hriak le sabitti in pe paam,” a ti.
6Curuangah a lamzin khamnakah hruang ka tuah ding ih hling le so in amah cu a kimvel in ka kulh ding. 7Amah a ngaitu pawl kha an dung in a dawi ding naón a man lo ding. A hawl rero ding naón a hmu lo ding. Cule anih in, “Hmaisa ka pasal hnenah ka kir sal ding. Atu hnakin tuih hlanah ka rak nuam sawn,” tiah a ti ding.
8A hnenah rawl, sabit, olif hriak le Baal#Baal cu Bawipa tican a si ih Kanaan ram mi pawl ih biakmi khawzing hmin a si. Leilung ṭhattertu a si tiah an zum. biaknak ih a hmanmi sui le ngun pawl a petu cu keimah ka si hi a thei dah lo. 9Curuangah ka pek ciami rawl le sabit pawl cu rawl lak caan ah ka lak kir ding; a hnipuan hrang ka timi tuuhmul le patpuan pawl tla ka lak sak kir ding. 10A hnipuan ka hlit ṭheh ding ih a mi ngaimi hmaiah a lawngfangkheh in ka umter ding; ka kut sungin zohman in an run thei lo ding. 11A nomnak puai pawl: kumtin puai le thlatin puai pawl, Sabbath puai le biaknak lam puai pawl cu ka cemter ṭheh ding. 12“I ngaitu pawl ih in phalh mi,” a timi a sabit hmuan le a theipi kung pawl ka siatsuah ṭheh ding. A sabit hmuan le a thingrah hmuan pawl cu ramṭhing ah ka tuah ṭheh ding ih hramlak ramsa in an siatsuah ṭheh ding. 13Keimah hngilh tahrat in Baal hnenah rimhmui a ur ih a mi ngaimi pawl hrangah a ṭhirual le a hnakhai khaih tahrat ih a thlun reronak caan ai-ah amah ka hrem ding. Hitiin Bawipa in a sim zo a si.
Bawipa In A Minung Pawl A Duhdawtnak
14Curuangah amah cu nelrawn ah ka hruai kir sal ding ih duhdawtnak ṭongkam thawn ka leem ding. 15A sabit hmuan pawl cu ka pe kir ding ih Harsatnak Nelrawn cu ruahsannak sangka ah ka tuahsak ding. A no lai Izipt ihsin a suah lai vek khan ka lam a hoi sal ding. 16Cuticun “Ka Pasal,” tiah i ko sal ding ih, “Ka Baal,” tiah i ko nawn lo ding. 17Baal hmin cu ka saalter nawn lo ding.
18Cutikah cun ka minung pawl an tuahmawh lonak dingah leilung par ramsa le van ih zam vate le leilung ih a bokvak pawl thawn thukamnak ka tuah ding. Raldonak hriamnam pawl: ralnam pawl le li le thal hmuahhmuah ka hlonhlo ṭheh ding ih ka minung pawl cu hnangamte le himte in khua an sa ding.
19Maw, Israel, ka nupi ah ka lo
tuah ding;
Mifel le rintlak ka si ding,
A hmunmi duhdawt zaangfahnak
Na parah ka langter ding ih,
Kumkhua in ka ta na si ding.
20Ka thukam ka hngetter ding ih,
ka ta na si ding;
Kei hi Bawipa ka si kha na
thei ding.
21-22Cutikah ka minung Jezreel#Jezreel - hitawk ih Jezreel timi cu Israel tican ai a si. ih
thlacamnak ka theihsak ding ih,
Leilung ah ruah ka surter ding.
Cule leilung in rawl le sabit le
olif pawl a suahter sal ding.
23Ram sungah ka minung pawl cu
ka um hngetter ding.
An ṭhangso ding ih mi neinung
zet an si ding.
“Lo-ruhamah,” tiih rak kawhmi
pawl cu “Ka zaangfah ding,” ih,
“Lo-ammi,” tiih rak timi pawl cu
“Ka minung nan si,” ka ti ding.
Cule annih in “Kan Pathian na si”
tiah in ti ding.
Currently Selected:
HOSEA 2: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.