HEBRU 5

1Puithiam Sang pohpoh cu mipi lak ihsin hrilmi a si ih misenpi ai-awhtu ah Pathian hnaṭuantu dingih retmi a si. A hnaṭuan cu thawinak tuah le sualthlah thawinak pek tla an si. 2Amah khal kim lonak a phunphun a neimi a si ruangah zianghman theihnak nei lo le a palhmi pawl parah lungnemnak a nei. 3Cutiin tlaksamnak a neih ve ruangah cun midang sualnak hrang lawngah si loin amah ih sualnak hrang khalah raithawinak a pek a ṭul. 4Zokhal anmah le anmah Puithiam Sangah hril aw in an khaisaang aw thei lo. Aaron cu Pathian in a ko ih Puithiam Sang ih a can vekin zokhal Pathian kawhnak lawngin Puithiam Sangah an cang thei.#Suah 28.1

5Cubangtuk in Khrih khal in amah le amah Puithiam saangah a khaisaang aw lo. Pathian sawn in,

“Nangmah cu ka Fapa na si,

tuihsun ah na Pa ah ka cang zo,”#Saam 2.7

tiah a hnenah a ti. 6Cule hmun dangah,

“Nang cu kumkhua in Puithiam

na si ding;

Melkhizedek puithiam si daan in

na si ding,”#Saam 110.4

tiah a ti lala.

7Leilung tlunih a um laiah khan Jesuh in thihnak ihsin amah a runsuak theitu Pathian hnenah ringzet in a au ih mitthli tla-in thla a cam. Mi lungnem le pum pe-awmi a si ruangah Pathian in a theih sak. 8Pathian ih Fapa a si ko naón Pathian ih thungaitu si dingah harsat tuarnak ihsin a zir a si. 9Cule mi famkimih tuah a si tikah a thu a ngaitu hmuahhmuah hrangah amah cu kumkhua rundamnak hramah a cang; 10cule Pathian in, “Melkhizedek ih puithiam si daan thlun in Puithiam Saang na si,” tiah a ti.

Zinpeng Zawh Lo Dingih Ralrinnak

11Hi thu ahhin sim ding tampi ka nei; sikhalsehla thu nan theihthiam har tuk ruangah nan hnenih fiangter a harzet. 12Tucun zirhtu si ding hman nan cu zo; asinain Pathian thu a hramthok ihsin zirh nan ṭul lai. Rawl ngai ei nan cu naón cawhnawi nan in lai. 13Cawhnawi a intu cu nauhak a si lai; a ṭha le a sia theih theinak a nei hrih lo. 14Sikhalsehla rawl ngai cu upa hrangah a si; annih cu thleidan thiamnak thinlung hmangin a ṭha le a sia an theithiam a si.

Currently Selected:

HEBRU 5: FCL

Highlight

Compare

Copy