HEBRU 10
10
1Judah mi pawl ih Daan cun a ngaingai a si mi kha felte le kimtein a langter thei lo; a ra thleng dingmi thil ṭha ih thluathlam lawng a si. An tuah ṭheumi raithawinak kha kumtinte an tuah ringring. Cutiin asile ziangtinso Daan ih a fialmi hi bangtuk raithawinak pawl hmangin Pathian a pantu minung pawl cu mi famkimah a tuah thei ding? 2Pathian a biatu pawl an sualnak ihsin thianfaitermi rak si ngaingai hai sehla an sual phuhrunawknak an nei nawn lo ding ih raithawinak hmuahhmuah a um nawn lo ding. 3Sikhalsehla thil umdaan ngaingai ahcun kumtinte an sualnak an theihnak dingah raithawinak cu a rak si riangri. 4Ziangahtile cawcang thisen le me thisen in sualnak cu a tlengfai thei dah lo.
5Cubangtuk a si ruangah leilungih Khrih a rung lang zik tikah Pathian hnenah,
“Raithawinak le peknak cu
na duhmi an si lo;
sikhalsehla ka hrangah
taksapum na remruat zo.
6Ṭilva pum ih pekmi mei-ur
thawinak parah lungkimnak
na nei lo.
Sual thianfainak dingih
raithawinak khalah
lungawinak na nei cuang lo.
7Cule Daan cabu sungih ka thuhla
an nganmi vekin a hnenah,
‘Maw Pathian, na duhmi tuah
dingin hinah ka um,’ ka ti,”#Saam 40.6-8
tiah a sim.
8A hmaisa bikih a simmi cu, “Raithawinak le hlanmi ah siseh, biakṭheng parih ṭilva le sual thianfainak hrangih raithawinak ah siseh, na lungawi zawng le na duhmi khal an si lo,” a ti. Hi raithawinak pawl cu Daan vekih tuahmi an si ṭheh ko naón hi bangtuk in a sim thotho. 9Cuih hnuah anih in, “Maw Pathian, na duhmi tuah dingah hinah ka um,” tiah a ti. Curuangah Pathian in raithawinak hlun pawl cu a hnong thluh ih cuih ai-ah Khrih raithawinak a ret. 10Ziangahtile Pathian in tuahter a duhmi cu Jesuh Khrih in a tuah ṭheh ruangah amah ih taksapum kumkhua daih in a pek awknak thawngin kan sualnak ihsin in tlengfai a si.
11Judah puithiam pawl in an ṭuanvo cu nitinte an tuah ih an pek ṭheumi raithawinak cu voi tampi an pek. Sikhalsehla raithawinak in sualnak cu a tlengfai dah lo. 12Asinain Khrih in sualnak hrangah raithawinak cu voikhat a pek ih cucu kumkhua daih a si; cuih hnuah Pathian vorhlam kamah a to. 13Cutawk ihsin Pathian in a ral pawl a ke-phah ih a tuah hai hlan sung a hngak. 14Voikhat raithawinak in sualnak ihsin a tlengfaimi pawl cu kumkhua mi famkimah a tuah a si.
15Cule Thlarau Thianghlim khal in a theihpinak kan hnenah a langter. A hmaisabik ah Thlarau Thianghlim in,
16“Himi hi Bawipa ih ṭongkam a si:
Hmailam caanah anmah thawn kan
tuah dingmi thukam cu hiti in a si;
Ka daan pawl an thinlung sungah
ka re ding ih an ruahnak parah
ka ngan ding,”#Jer. 31.33-34 a ti.
17Cuih tlunah a sim sal ih,
“An sualnak le an siatnak pawl
cu ka ciing nawn lo ding,”
tiah a ti. 18Cubangtuk in an sualnak ngaidam a si ahcun sualthawinak a ṭul nawn lo.
Pathian Naih Uhsi
19Curuangah u le nau pawl, Jesuh thihnak thawngin Hmun Thianghlim Bik sungih luh theinak luatnak famkim kan nei zo. 20Amah in puanzar thlek tahratin lamzin thar, lamzin nung, in on sak zo. Cuih puanzar cu amah ih taksa pum kha a si. 21Vancung ih Pathian innpi kilkhawitu dingah Puithiam Saang bik kan nei. 22Curuangah thinlung tak ngai le zumnak fel thawn Pathian cu naih uhsi. Mawhnak thinlung thianfaitermi le tidai thiang thawn tlengfaimi kan taksapum thawn Pathian cu pan uhsi. 23Ruahsannak kan nei tiih kan langtermi kha hngetkhoh zetin pom uhsi; ziangahtile a thukamnak a kimtertu Pathian cu rintlak a si. 24Pakhat le pakhat zawnruahnak nei uhsi; pakhat le pakhat bawm aw in duhdawtnak le ṭhatnak khal langter ton uhsi. 25Hmunkhatih kan pumkhawm ṭheumi kha baansan hlah uhsi. Mihrek cun an baansan naón Bawipa ih Ni a nai vivo ruangah, kannih cu pakhat le pakhat thazaang pe-aw sinsin ding kan si.
26Thudik kan theih ngah hnuah sualnak kha thei cingin kan tuah vivo thotho a si ahcun sual thianfai theinak dingah sual hrang raithawinak zianghman a um nawn lo. 27An hrangih a taangmi an covo cu a thleng cing dingmi Pathian thuṭhennak le Pathian a dodaltu pawl a kaangfai ṭhehtu ding ṭihnungza meisa kha ṭih thlohthlo in an hngak ding lawng a si thlang. 28Moses Daan thu a thlun lotu cu thutheitu pahnih pathum in a sual a si an tinak in a thu an relcatmi cu, zaangfahnak zianghman um loin thah a si. 29Cuti asile, Pathian Fapa ziangih a siar lotu le sualnak ihsin mi a thianfaitertu Pathian thukamnak thisen nautattu le, zaangfahnak a neitu Thlarau a hmuhsuamtu pawl teh ziang bangtuk in tuah an si pei? Cubangtuk minung cu ziangtlukih a nasami hremnak an tuar ding tikha ruat hnik uh! 30Ziangahtile, “Keimah in phu ka la ding, keimah in ka lehrul ding,” a tiih tlunah, “Bawipa in a minung pawl cu an thu a ṭhen ding,” a titu zo a si ti kan thei.#Daan 32.35, 36 31A nungmi Pathian kut sungih tlak cu tuksumza a si.
32Hlanih nan um daan vun ruathnik uh. Culai ah Pathian tleunak nan hnenih a thlen pek ah khan tuarnak le harsatnak a phunphun nan tong naón cuih harsatnak in a lo neh hai lo. 33Voikhat khatah misenpi hmuhah hmuhsuamnak le hremnak nan tong ih voi dangah cuti vekih hmuhsuamnak le hremnak a tongtu pawl nan tuarpi ve a si. 34Harsatnak a tongmi thawngtla pawl parah lainatnak nan nei. Nan neihmi thilri hmuahhmuah an lo lon ṭheh tikah nan sunnak cu lungawiin nan tuar thei, ziangahtile hi thilri hnakin a ṭha deuhmi le kumkhua in a hmun dingmi kan nei hrih a si, ti nan thei. 35Curuangah nan thin nau hlah uh, ziangahtile ralṭhatnak nan neih ahcun laksawng tumpi nan ngah ding a si. 36Pathian duhnak tuah thei dingah le a thukammi co thei dingah thinfual in um uh. 37Ziangahtile Ca Thianghlim in,
“Caan tawite hnuah a ra dingmi
Amah cu a thleng ding,
a rei lo ding.
38A dingmi ka miphun in an zum
ding ih an nung ding;
Asinain dungsiptu an um ahcun,
an parah ka lung a awi
lo ding,”#Hab 2.3-4 a ti.
39Kannih cu dungah a siip ih a hloral tami kan si lo. Rinnak nei in rundamnak a cotu sawn kan si.
Currently Selected:
HEBRU 10: FCL
Highlight
Share
Compare
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
