HEBRU 1
1
Fapa Sungin Pathian Ih ṭongkam
1Hlanlaiah Pathian in kan pupa pawl hnenah voi tampi a phunphun in profet pawl hmangin thu a rak sim. 2Sikhalsehla hi ni neta bik lamah cun kan hnenah a Fapa sungin a sim a si. Cuih a Fapa hmangin Pathian in lei le van a sersiam ih a netnak ah ziang hmuahhmuah nei ṭhehtu si dingin Amah cu a hrilmi a si. 3Amah cu Pathian sunlawinak langtertu a si ih Pathian sinak famkim a nei. Huham a neimi a thu in leikhawvel le vantlolak pumpi cu a cawmdawl ih a fingkhawi. Minung pawl ih sual ngaidamnak le sual thianternak a tuah ṭheh hnuah vancungah Cungnungbik Pathian ih vorhlamah a to.
Pathian Fapa Ih Maksakzia
4Pathian in a Fapa hnenih a pekmi hmin cu vanmi pawl ih hmin hnakin a cungnung sawn bangtuk in a Fapa cu vanmi pawl hnakih cungnung sawn in a ret. 5Ziangahtile Pathian in ziangbangtuk vancungmi hman:
“Nangmah cu ka Fapa na si;
tuihsun ah na Pa ah ka cang zo,”#Saam 2.7
a ti dah lo.
Cuih tlunah ziangbangtuk vancungmi thu khalah,
“Keimah cu a Pa ka si ding ih,
amah cu ka Fa a si ding,”#Saam 7.14
a ti dah lo.
6Sikhalsehla Pathian in a fatir leilungih a run thlah tikah,
“Pathian ih vancungmi hmuahhmuah
in amah cu an biak ding,”
tiah a ti.
7Sikhalsehla vancungmi pawl thu ahcun,
“Pathian in a vancungmi pawl cu
thli ah a tuah ih,
A hnaṭuantu pawl cu mei-alh ah
a tuah a si,”#Saam 104.4 a ti.
8Cule a Fapa thu ah Pathian in,
“Nangmah cu Pathian na si ih,
na bawi tokham cu kumkhua in
a hmun ding;
Na minung pawl dingnak in
na uk ding.
9Dingnak na duh ih sualnak na hua.
Curuangah a si Pathian,
Na Pathian in a lo hril ih,
Na rualpi pawl hnenih a pekmi
hnakin a tum cuangmi upat
lungawinak a lo pek,”#Saam 45.6-7 a ti.
10“Cule Bawipa nangmah in
a hramthokah leilung cu
na seemsuah ih,
Na kut rori in van tla khi
na sersiam a si.
11Cu pawl cu an hloral ding,
sikhalsehla nang cu na hmun ding.
Annih cu puan bangin an ṭet
ding a si.
12Angki bangin na bil ding ih
hnipuan bangin an thleng aw
ṭheh ding a si.
Sikhalsehla nang cu nangmah keel
na si ringring ih na nunnak cu
cem ti a nei lo,”#Saam 102.25-27 a ti.
13Pathian in a vanmi hnenah,
“Na ral pawl cu na kephah ih
ka ret hlan lo,
ka vorhlamah to aw,”#Saam 110.1 a ti dah lo.
14Cuti asile vancungmi pawl cu zo so an si? Annih cu Pathian a riantu thlarau an si ih rundamnak a ngahtu ding pawl bawm dingah Pathian ih thlahmi an si.
Currently Selected:
HEBRU 1: FCL
Highlight
Share
Compare
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
