HAGGAI 2
2
Biakinn Thar Mawinak
1Cuih kum thla sarih thla, ni kul hluankhat ni ah Bawipa ṭong cu Haggai hnenah a rung thleng sal. 2Haggai cu Judah ram uktu bawi Zerubbabel, Puithiam Saang Joshua le mipi hnenah thu sim dingin a fial. 3“Hmaisa Biakinn kha ziangtluk in so a mawi, a ciingtu nanmah lakah pakhat tal nan um maw? Atu-ah ziangtin nan hmu? Atu hi cu zianghman a si ual lo, nan ti ding. 4Sikhalsehla zohman nan lung uih in nan tha nau hlah seh. Hna ṭuan uh, nan hnenah ka um a si. 5Izipt ihsin nan rak suah laiah nan hnenah ka um ringring ding, tiah thu ka rak lo kam hai. Atu khalah nan hnenah ka um; curuangah nan thin phang hlah uh.
6“Rei lote ah van le lei, leilung pi le tifinriat pawl hi ka hnin ciamco ding. 7Miphun hmuahhmuah ka hlonhlo ṭheh ding ih an sumsaw le an hlawn thil pawl cu hitawk ah an rak keng ding; cutin hi Biakinn cu lennak in a khat ding. 8Leilung tlun sui le ngun hmuahhmuah cu ka ta an si. 9Biakinn thar cu a hlun hnakin a nasasawn ding ih cutawkah ka minung pawl ṭhansonak le hnangamnak ka pe ding,” a ti. Cungnungbik Bawipa in a sim zo a si.
10Darias in siangpahrang a ṭuan kum hnihnak, thla kua thla, ni kul hluanli ni ah Cungnungbik Bawipa in profet Haggai hnenah a sim sal. 11“Puithiam pawl hiti in thu sut hnik aw: 12Thuṭhimnak ah mi pakhatkhat in thawinak ih pekmi sa thianghlim sungin a hrekkhat lakin a puan in zawi in feh pi sehla. Cuih a puan cun sangreu maw, rawl suan cia maw, sabitti maw, olif hriak maw, a si lole rawl phunkhatkhat maw dai pang sehla cuih a daimi cu a thianghlimmi tirawl ah a cang pei maw?” a ti.
Cutin a sut hai tikah puithiam pawl cun, “A cang lo ding,” an ti.
13Cule Haggai in, “Thuṭhimnak ah mi pakhatkhat in miruak a tham ruangah mi borhhlawh ah a cang, ti sehla. A tlunlam ih kan relmi tirawl pawl hi tham sehla, tirawl borhhlawh ah an cang ve pei maw?” tiah a sut.
Puithiam pawl in, “A cang ding,” an ti.
14Cutikah Haggai cun, “Bawipa in, mi borhhlawh pakhat in a thammi tirawl cu tirawl borhhlawh ih a can vekin hi ram minung pawl le an cinmi tirawl par khalah a si ve ding; curuangah biakṭheng parih an pekmi thil hmuahhmuah cu thil borhhlawh an si ṭheh, a ti,” tiah a sim.
Bawipa Ih Thlawsuah Tiamnak
15 Bawipa in, “Nan parih a thlengmi hi nan thei thiam lo maw? Biakinn nan sak sal hlan ahcun, 16nan lo rawl han kul ngah dingah nan zum naón han hra lawng nan ngah ṭheu. Ralca beel ihsin sabitti pung sawmnga ngah dingin nan ruat naón pung kul lawng nan ngah ṭheu. 17Nan cinmi hmuahhmuah siatsuahtu dingah a nasa zetmi thli le rial ka thlah, a sinan nan sir aw duh cuang lo. 18Tuihsun hi thla kua thla, ni kul hluanli ni a si ih Biakinn hrampi hnaṭuan an ṭheh ni a si. Atu thok ihsin thil a ra thleng dingmi ṭhatein zohhnik uh. 19Fang a um nawn lo ih sabit rah le theipi rah le olif rah pawl an um hrih lo naón, atu thok ihsin thlawsuah ka lo pe ding,” tiah a ti.
Zerubbabel Hnenih Bawipa Ih Thukamnak
20Cuih ni kul hluanli ni, thla kua thla ahcun Bawipa ih ṭong Haggai hnenah a voihnihnak a ra thleng. 21Judah ram uktu bawi Zerubbabel hnenah hiti in ṭong ding a fial: “Reilote ah lei le van hi ka hnin ciamco ding ih, 22an ram uknak pawl ka hlonhlo sak ṭheh ding ih an cahnak pawl ka cemter ṭheh ding. Rangleng le a mawngtu pawl ka linglet ṭheh hai ding: rang pawl cu an thi ding ih a totu pawl pakhat le pakhat an that aw ding. 23Cuih ni ahcun nang ka hnaṭuantu Zerubbabel, ka hmin in ram uktu ah ka lo tuah ding. Hriak ka lo culhmi na si,” tiah a ti. Cungnungbik Bawipa in a ti.
Currently Selected:
HAGGAI 2: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.