SEEMTIRNAK 34

Dinah An Sualpi

1Leah thawn an hrinmi Jakob ih fanu Dinah cu cuih ramih nunau pawl hnenah a va leng. 2Cuih ramih lal a si mi Hiv mi Hamor ih fapa Shekhem in Dinah cu a hmuh tikah a kaihrem ih a duh naloin a sualpi. 3Cule Dinah ih tlun lawngah a thinlung a taap ih a duhzet fawn hrangah a leem ciamco. 4Cule a pa Hamor hnenah, “Hi falanu hi ka nupi dingah i biak sak aw,” ti ah a ti.

5Jakob in a fanu Dinah cu a thang an siatter zo ti a thei naón a fapa pawl hramlakah caw khal in an um hrangah an ra tlun hlan cu zianghman ti loin a um. 6Cule Shekhem ih pa Hamor cu Jakob bia dingin a feh ih, 7Jakob ih fapa pawl hramlak ihsin an ra thlen caan fangah a va thleng ve. An farnu an sualpi ti thu le Shekhem in hi bangtuk thil borhhlawh le ningzakza a tuah ruangah Israel miphun a hmuhsuam ih a nautat ti thu pawl an theih tikah an ai a thok ih an thin a ling. 8Cutikah Hamor in an hnenah, “Ka fapa Shekhem in nan fanu cu a duhzet ruangah a ṭhit theinak dingah zaangfah hram uh. 9Ṭhit awknak in rual kan kai aw pei. Nan fanu pawl kan ṭhi pei ih nannih khal in kan fanu pawl nan ṭhi ve pei. 10Cuticun kan hnenah kan ram sungah nan um pei ih hnangamte in nan duhnak pohpoh ah nan um ding. Thilri nan nei ding ih nan duhduh in sum nan tuah pei,” ti ah a ti. 11Cule Shekhem in Dinah ih pa le ṭapa pawl hnenah, “Nan mithmaiṭha i coter hram uh; nan duhmi hmuahhmuah ka lo pe ding. 12Ziang laksawng so nan duh, i sim uh; nan farnu man cu nan duhzat ngen uh; in ṭhitter siang a si ahcun nan dilmi pohpoh ka lo pe ding,” ti ah a ti.

13Cutikah Jakob ih fapa pawl cun, Shekhem in Dinah a thangsiatter zo ruangah, an leemsiah ih an thu cu an zom buum ih, 14an hnenah, “Serhtan lomi cu kan farnu kan pasalter thei lo; neihter kan siang tibang sehla kan hrangah ziangtluk ningzakza so a si ding. 15Kanmah bangtuk in mipa pohpoh serh nan tan thluh lawngah kan lung a kim thei ding. 16Cuti a si lawngah kan fala pawl nan ṭhi thei ding ih kannih khal in nan fala pawl kan ṭhi ve ding. Nanmah lakah khua kan sa ding ih nanmah thawn miphun pakhat ah kan cang ding. 17Asinain kan thu nan pom thei lo ih serh nan tan lo a si ahcun kan farnu cu kan lak ding ih kan feh ko ding,” ti ah an ti.

18Cutiin Jakob fapa pawl ih thu cu Hamor le a fapa Shekhem cun thil remcaangzet ah an ruat. 19Cuhrangah Shekhem cun rei lote-ah an sim vekin a tuah ṭheh. Ziangahtile Jakob ih fanu cu a duh ngaingai ruangah a si. Shekhem cu a sungte lakah mi ih hmaizah bikmi a si. 20Hamor le a fapa Shekhem cu an tlung ih an khuasuah ah an khawpi pawl thawn an tongkhawm-aw ih an hnenah, 21“Jakob le a sungkhat pawl thawn kan rem-aw zet ko; kan ramah hin kan hnenah um ve ko hai sehla, an duhnak poh ah tlangleng hai seh. Anmah ih hrang daih in kan ram khal a kau pam a si. An fanu pawl kan ṭhi pei ih annih khal in kan fanu pawl ṭhi ve hai seh. 22Sikhalsehla anmah bangtuk ih mipa hmuahhmuah serh kan tan ṭheh lawngah kan hnenah um in kanmah thawn miphun khat si ding cu an lung a kim ding. 23Cuti a si lawngah an ṭilva, an thilri le an cawrual pawl cu kan ta ah an cang ding. Curuangah kanmah lakih an um theinak ding cu tuah ve uhsi,” ti ah an ti. 24Cutikah khuasungmi hmuahhmuah in Hamor le Shekhem ih thu cu an zom ih khuasungih mipa hmuahhmuah cu serh an tan ṭheh.

25Cuticun ni thumnak a kim ih an serhtannak a besiat laifangah, Jakob ih fapa pahnih, Dinah ih ṭapa Simeon le Levi cu ralnam kengin khuasungah zohmanih theihthiam lo dingin an lut ih an mipa hmuahhmuah cu an that ṭheh. 26Hamor le a fapa Shekhem khal an lu an tan ih an farnu Dinah cu Shekhem innsung ihsin an lak ih an tlanpi. 27Cuih tlunah Jakob ih fapa dang pawl in an farnu an thangsiatter zomi ningna in hriamhmapu mi pawl khal an that suak thluh lawlaw ih khuasungih thilri hmuahhmuah tiangin an lak ṭheh. 28Tuu siseh, caw siseh, laak siseh, khuasung le lo ih an neihmi tiangin fai koin an lak ṭheh. 29An sumsaw le an hlawnthil, innsangih khuasaknak thilri hmuahhmuah tiangin an lak ih nunau le nauhak khal an kaih ṭheh.

30Cutikah Jakob in a fapa Simeon le Levi hnenah, “Harsatnak sungah in thlenter zo; hi ram sungih a ummi Kanaan mi le Periz mi pawl in in hua thlang ding. Kei le milai tampi nei ka si lo. Annih pawl hmun khatah an ṭan ih in do a si ahcun kan zatein kan ci in mit rori ding a si,” ti ah a ti. 31Asinain annih in, “Kan farnu cu hlawhhlang nunau ah maw an tuah ding?” ti ah an ti.

Currently Selected:

SEEMTIRNAK 34: FCL

Highlight

Copy

Compare