EZEKIEL 6

Bawipa In Milem Biaknak A Hnong

1 Bawipa in ka hnenah, 2“Milaipa, Israel tlangsaang pawl lam khi zoh awla ka thu hi sim aw. 3Israel tlangsaang pawl hnenah Cungnungbik Bawipa ih ṭongkam cu sim aw. Cungnungbik Bawipa in tlangsaang pawl, tlangniam pawl, horkuam pawl le phairawn pawl hnenih ka ṭongmi hi an theihnak dingah sim hai aw: Misenpi in milem an biaknak hmun pawl siatsuahtu dingah ralnam pakhat ka thlah ding. 4Raithawinak biakṭheng pawl cu balsiat ṭheh an si ding ih rimhmui urnak biakṭheng pawl cu khuai ṭheh an si ding. Cutawkih milai pawl hmuahhmuah cu an milem pawl hmaiah cun thah ṭheh an si ding. 5Israel mi pawl ih ruak cu khuazakipah ka ṭhekdarh ṭheh ding; an ruh pawl khal biakṭheng pawl ih kimvelah ka ṭhekdarh ṭheh ding. 6Israel ramsung khua hmuahhmuah cu siatsuah ṭheh an si ding ih an biakṭheng pawl le an milem pawl cu vuakkuai ṭheh an si ding; an rimhmui urnak biakṭheng pawl cu khuai ṭheh an si ding ih an tuahmi hmuahhmuah cu a hloral ṭheh ding. 7Khawzakip ah milai cu thah an si ding ih a nungsun pawl cun Bawipa ka si kha an thei ding.

8“Mihrek cu thahnak ihsin ka luatter ding ih miphunkip lakah ka ṭhekdarh ding; 9cuticun ramkipah sal ah an taang ding a si. Zumnak nei lo an thinlung pawl in in tlansan ih keimah hnakin milem an duh deuh ruangah ka hrem ih mualpho in ka umter kha cutawkah an thei ding ih an ciing ding. Thil ṭha lo le thil borhhlawh an tuah ruangah anmah le anmah an fih aw ding. 10Keimah cu Bawipa ka si ih ralrinnak ih ka simmi cu bumnak men a si lo ti kha an thei ding,” tiah a ti.

11Cungnungbik Bawipa in, “Na kut vai aw, na ke tur awla Israel mi pawl in fihnungza le thilsual an tuah ruangah riahsia in ṭap aw! Ral in maw, rawl loin maw, natnak in maw an thi ding a si. 12Lamhla ih a ummi pawl cu natnak in an thi ding; lamnai i a ummi pawl cu ral kut in an thi ding; a taanglai pawl cu rawl loin an thi ding a si. Ka thinhengnak hmual cu nasa zetin an tuar ding a si. 13Miruak pawl cu milem pawl lakah le biakṭheng pawl kiangkapah, thlua le tlangpar kipah, hnahhring thingkung tang le sasua kungpi hnuai kipah le an milem pawl hnenih mei-ur rai an thawinak hmunkipah ṭhekdarh ṭheh an si ding. Cule mi hmuahhmuah in Bawipa ka si kha in thei ding. 14Asi, ka kut ka hawi ding ih an ram cu ka siatsuah ṭheh ding. Thlanglam nelrawn ihsin saklam ih a ummi Riblah khua tiang hnawmpen ah ka canter ṭheh ding; Israel mi pawl an umnak ziangvek hmun hman ka zuah lo ding. Cuticun mi hmuahhmuah in Bawipa ka si kha in thei ding,” tiah a ti.

Currently Selected:

EZEKIEL 6: FCL

Highlight

Copy

Compare