EZEKIEL 39

Gog A Sung

1Cungnungbik Bawipa in, “Milaipa, Meshek le Tabul miphun pawl uktu bawi bik Gog hnenah sim awla a ral ka si hi phuang aw. 2Hmun dangpi ah ka fehter ding ih Israel ram tlangpar a thlen hlan lo saklam ah ka hruai vivo ding. 3Cule a kehlam kutih li le a vorhlam kutih thal pawl cu ka ti thla thluh ding. 4Gog le a ralkap le amah a ṭantu pawl cu Israel tlangpar ahcun an thi thluh ding ih an ruak pawl cu vate le ramsa rawl ah ka canter ding. 5Lenkolh lakah an ril ding ih an thi ding. Cungnungbik Bawipa keimah in ka sim zo. 6Zohman ih hnaihnok dah lomi, tipikap tluan ih a ummi pawl le Magog ramah meisa ka kangter ding ih cuticun Bawipa ka si kha mi hmuahhmuah in an thei ding. 7Ka hmin thianghlim cu Israel mi pawl ka theihter ding ih zohman in ka hmin an thangsiat nawn lo ding. Cuticun miphun hmuahhmuah in keimah hi Bawipa, Israel ih Pathian Thianghlim ka si kha in thei ding,” a ti.

8Cungnungbik Bawipa in, “A thuhla ka sim ciami ni cu a ra thleng ding; a thleng tengteng ding a si. 9Israel ram khawpi sungih a ummi pawl cu an suak ding ih ral pawl ih taanmi hriamnam pawl cu zanthing hrangah an khawm ding. Ralphaw pawl, li le thal pawl, feipi le talhtum pawl cu mei ah an tik ding ih zanthing tik lotein kum sarih a daih ding. 10Hram lakah tihthing an hawl lo ding, tupi sung thing khal an hau lo ding, ziangahtile zanthing ai ah ral pawl ih taanmi hriamnam an tik ding. Anmah a rak rutu le a rak ramtu pawl kha an ru ding ih an ram ding,” tiah a ti. Cungnungbik Bawipa in a sim zo.

Gog An Phum

11 Bawipa in, “Cuih tikcu a kim tikah Gog cu Israel ram, Tipi Thi ih nisuahnak lam Mikhual Phairawn#Abarim Phairawn titla a si thei. ah phumnak hmun ka pek ding. Gog le a ralkap pawl cu cutawkah phum an si ding ih cuih phairawn cu ‘Gog Ralkap Pawl Phairawn,’ ti a si ding. 12Israel mi pawl in miruak pawl cu thla sarih sung an phum ding ih cuticun ramsung cu an thiangfaiter sal ding. 13Ramsung mi hmuahhmuah in miruak phum cu an bawm ding ih cuticun ka sunlawinak a lang ni ah upatnak cotu an si ding. Cungnungbik Bawipa keimah in ka sim zo. 14Thla sarih hnuah ramsung thianfaiternak dingah milai hril an si ding ih ramsung hmuahhmuah ah an vak ding ih phum hrih lomi miruak hmuahhmuah an phum ding. 15Cutiih an tawihvah tikah ruh an hmuh a si ahcun hminsinnak an tuah ding; cuticun thlaan laitu pawl in an hmu ding ih Gog Ralkap Pawlih Phairawn ah an phum ding. 16(Cuih kiangah khua pakhat a um ding ih ‘Ralkap Tampi’ tiah hngilh lonak ah hminsak a si ding.) Cuticun ramsung cu thianfaiter a si sal ding,” tiah a ti.

17Cungnungbik Bawipa in ka hnenah, “Milaipa, an hrangih ka timtuahmi thawinak sa ra ei dingah khuazakip ihsin vate le ramsa pawl ko aw. Israel tlang parah rawl ei puai tumpi a um ding ih cutawkah sa an ei ding ih thisen an in ding. 18Tuucang, a si lole tuufaate, a si lole mecang, a si lole a thaumi cawcang bangtuk ih thah a si mi ralkap pawl ruak an ei ding ih leilung uktu bawi pawl ih thisen an in ding. 19Himi pawl cu raithawinak bangtuk ih ka thah tikah vate le ramsa pawl in an ei thei zat in a thau an ei ding ih an rit tiangin thisen an in ding. 20Rang le rangralkap pawl siseh, ralkap le raldotu pawl siseh, an kaih thei zat an kai ding ih ka cabuai parah an ei ding. Cungnungbik Bawipa keimah in ka sim zo,” a ti.

Israel Dinsalnak

21 Bawipa in, “Miphun pawl hnenah ka sunlawinak ka langter ding ih a dikmi ka thuṭhennak cu ka huham thawn ziang bangtuk in ka tuahsuak ti cu ka hmuh hai ding. 22Cuihhnu cun Israel mi pawl in keimah hi Bawipa an Pathian ka si kha in thei ding. 23Ka parih sualnak an tuah ruangah Israel mi pawl cu saltaannak hmun an thleng ti kha miphun pawl in an thei ding. Ka dungtun hai ih an ral pawl in an neh ih raldonak hmunah ral kut in ka thihter. 24An thianlonak le an ṭhatlonak ruangih an tuar dingzat cu an parah ka thlenter ih ka dungtun hai a si,” a ti.

25Cungnungbik Bawipa in, “Sikhalsehla atu cun Jakob tesinfa Israel mi parah zaangfahnak ka nei ding ih mi ṭhangso le mi neinung ka siter sal ding. Ka hmin thianghlim cu ka kilkhawi ding. 26An ram sungah zianghman thinphannak um loin an um ih zohman in hnaihnawhnak an pek lo tikah cun keimah in zuarthlai ruangih ningzak mualpho ih an umnak cu an hngilh thei sal leh ding. 27Mi thianghlim ka si hi miphun tampi hnenih langternak ah an ral pawl umnak ramih ṭhekdarh an sinak ihsin ka kirpi ding. 28Cuticun ka minung pawl hin an Bawipa le an Pathian ka si hi in thei ding. Cubangtuk cun in thei ding, ziangahtile saltaannak hmunih anmah a kuattu le atu-ah pakhat hman taang loin an ram sungih finkhawmtu le hruaikirtu cu keimah ka si. 29Israel mi parah ka thlarau ka burh ding ih ziangtik hmanah ka hmai ka thup nawn lo ding. Cungnungbik Bawipa keimah in ka sim zo,” tiah a ti.

Currently Selected:

EZEKIEL 39: FCL

Highlight

Copy

Compare