SUAHLANNAK 4

Moses Hnenah Huham A Pek

1Moses in, “Sikhalsehla Israel mi pawl in in zum lo ih ka simmi ngai loin, ‘Bawipa cu na hnenah a lang lo a si,’ in ti asile, ziangtinso ka ti ding?” tiah a ti.

2Cutikah Pathian in, “Na kutah ziangso na ken?” tiah Moses cu a sut. “Kianghrol ka keng,” tiah Moses in a ti.

3Cule Bawipa in, “Lei parah vun hlon aw,” tiah a ti ih, Moses in a vun hlon tikah rul ah a cang. Cutikah Moses cu dungah a siip. 4Asinain Bawipa in, “Vun dawh awla a mei in kai aw,” tiah Moses cu a ti. Cule Moses in a vun dawh ih a kaih tikah a kut parah cun kianghrol ah a cang sal. 5Cutikah Bawipa in, “Himi cu Israel mi pawl hnenah an pu le an pa ih Bawipa Pathian, Abraham ih Pathian, Isaak ih Pathian le Jakob ih Pathian cu na hnenah a lang a si, ti an zum theinak dingah a si,” tiah a ti.

6Cun Moses hnenah Pathian in thu a sim sal ih, “Na kut cu na angki sungah ret aw,” tiah a ti. A ti bangtuk in Moses in a ret. A kut a suah sal tikah a phar ṭheh ih vur bangin a rangmi hma in a kut cu a khat ṭheh. 7Cule Bawipa in, “Na kut cu na angki sungah ret sal aw,” a ti. A ti bangin Moses in a ret. A kut cu a suahsal tikah a dam ṭheh ih a taksa dang bangtuk ah a cang sal. 8Cutikah Bawipa in, “A hmaisaih tican neimi hminsinnak an pom thei lo ih an lo zum lo a si khalle a pahnihnak ih tican neimi hminsinnakih ruang talah an lo zum ding. 9Hi hminsinnak pahnih ih hnuah an zum lo thotho ih na simmi khal an ngai lo a si ahcun Nail tiva ihsin tidai la awla leiro parah thle aw. Leiro parih na thletmi tidai cu thisen ah a cang ding,” tiah a ti.

10Moses in Bawipa hnenah, “Bawipa, kei cu i thlah hramhram hlah aw. Thusim thiam khal ka si dah lo. Nangmah ih i ton hnu khalah thusim thiam ka si hlei cuang lo. Santlai lo ka si ih ka ṭong a fung ih ka aw a hak fawn si,” tiah a ti. 11Cutikah Bawipa in, “Minung cu zo in so hmurka a pek? Zoin so hnaset le ṭong thei lo khi a tuah? Zoin so khawhmuh theinak a pek? Asilole zo in so a mit a cawtter? Bawipa Keimah ka si lo maw! 12Cu a si ruangah feh aw; na ṭongnak ah ka lo bawm ding ih na ṭong dingmi khal ka lo sim ding,” tiah a ti.

13Asinain Moses in, “Bawipa, i zaangfah hram awla midang pakhatkhat thlah sawn aw,” tiah a ti.

14Cutikah Bawipa cu Moses parah a thin a heng ih, “Levi mi na unau Aaron a um a si lo maw? Amah cu ṭong a thiamzet ti ka thei ko. Thungai tile amah cu atu-ah nangmah tong dingin a ra lai ih a lo ton ding cu a hlawptlozet a si. 15Amah thawn nan biak-awk hnuah a ṭong dingmi cu nangmah in na sim pei. Nan pahnih in nan ṭong dingmi cu ka lo bawm ding ih nan pahnih ih nan tuah dingmi tla ka lo sim ding. 16Mi hnenah nangmah ai-awh in Aaron a ṭong ding ih amah cu na hmurka a si ding. Nangmah cu amah ih hrangah Pathian bangtuk na si ding ih a ṭong dingmi simtu na si ding. 17Hi kianghrol hi na kut in keng awla mangbangza tuahnak ah va hmang aw,” tiah a ti.

Moses Cu Izipt Ram Ah A Kir

18Cun Moses cu a pu Jethro hnenah a feh ih, “Izipt ramih ka sungkhat pawl an nunglai maw ti zoh dingah Izipt ramih kir dingin i thlah hram aw,” tiah a ti. Cule a pu Jethro cu a lung a kim ih, “Damte in feh aw,” tiah a ti.

19 Bawipa in Moses cu Midian ramih a um laiah, “Atu cu Izipt ramah kir thlang aw, ziangahtile thah a lo duhtu pawl cu an thi ṭheh zo,” tiah a ti. 20Curuangah Moses in a nupi le a fapa pawl a hruai ih laak parah a toter hai ih Izipt ramah a kirpi. Pathian ih pekmi kianghrol cu a keng ringring.

21Cule Pathian in Moses hnenah, “Atu cu Izipt ramih kir thlang ding na si ruangah tuah ding ka lo timi mangbangza hmuahhmuah cu Faro hmaiah na tuah thluh pei. Asinain Faro ih thinlung cu ka hakter ding ih ka minung pawl cu a fehter lo ding. 22Cutikah Faro ih hnenah, ‘Israel cu ka fatir a si. 23Keimah i biak theinak dingah ka fapa cu thlah aw ka lo ti naón na thlah duh lo. Curuangah na fatir ka that ding a si, tiin Bawipa in a ti,’ tiah na sim pei,” tiah a ti.

24Lamzin ih an riahnak hmunah Bawipa in Moses cu a tong ih thah a tum. 25Cutikah Zipporah in lunghriam pakhat a lak ih a fapa ih serh a tan. Cuih lunghriam cun Moses ih ke#4.25 Moses ih ke: timi hi Moses ih zahmawh a ti duhnak a si, tiah zumnak a um. a daiter ih Zipporah in, “Nang cu serhtannak thisen suahtertu ka pasal na si,” tiah a ti. 26Curuangah Bawipa in Moses nunnak cu a zuah. Serhtannak thisen ruangah a nupi Zipporah in, “Nang cu serhtannak thisen suahtertu ka pasal na si,” a tinak cu a si.

27Cun Aaron ih hnenah Bawipa in, “Moses tong dingah nelrawn ah va feh aw,” tiah a ti. A ti bangin Bawipa ih tlang ah Moses tong dingin a feh. Cule Moses a ton tikah a hnam. 28Moses cun Bawipa in a thlah zawng ih a hnenih a simmi hmuahhmuah le Bawipa in mangbangza a tuahnak le thu a peknak pawl tla cu kimtein Aaron a sim ṭheh. 29Cun Moses le Aaron cu Izipt ram ah an feh ih Israel mi hruaitu pawl an ko khawm ih, 30Bawipa in Moses hnenih a simmi thu hmuahhmuah cu an hnenah Aaron in a sim thluh. Cule misenpi hmaiah Moses #4.30 Moses: timi hi Hebru Baibal ahcun amah tiin a um. in mangbangza a phunphun a tuah. 31Cutiin misenpi in an zum. Cule Bawipa cu an hrangah seherhnak a nei ih hrem an tuarnak pawl tla a hmu thluh a si, ti kha an theih tikah a hmaiah kuun in an biak.

Currently Selected:

SUAHLANNAK 4: FCL

Highlight

Copy

Compare