SUAHLANNAK 33

Feh Dingah Bawipa Ih Thupek

1 Bawipa in Moses hnenah, “Izipt ram ihsin na hruai suakmi pawl thawn hi hmun hin Abraham, Isaak, Jakob le nan tesinfa pawl hnenah pe dingih ka rak tiam ciami ramah va feh uh. 2Nan hmaiah vancungmi ka fehter ding ih Kanaan mi, Amor mi, Hit mi, Periz mi, Hiv mi le Jebus mi pawl cu ka dawi thluh ding. 3Cawhnawi le khuaitizu luannak ram ah nan feh ding. Sikhalsehla kei cu nan hnenah ka feh lo ding. Ziangahtile milungruh pawl nan si ruangah lamzinah ka lo siatsuah thluh hai pang ding,” tiah a ti.

4Cuih thusia cu Israel mi in an theih tikah an riah a sia ih an ṭap; zohman in an suingun khal an hruh duh lo. 5Cule Bawipa in Moses hnenah, “Israel mi hnenah, ‘Nannih cu milungruh pawl nan si. Malte sung hman nan hnenah feh ningla ka lo siatsuah thluh ding a si. Curuangah nan suingun pawl cu phoih ṭheh uh. Cuih hnuah nan parah ziangso ka tuah ding ti ka thei ding,’ a ti tiin sim aw,” tiah a ti. 6Curuangah Sinai tlang an thlen hnu in Israel mi pawl cun an suingun an hruh nawn lo.

Bawipa Ih Puanthlam

7Israel mi pawl in riahnak hmun an khuarnak pohah, Moses in Puanthlam cu a lak ih riahnak hmun ihsin a leng hla deuhah a sak. A cuih Puanthlam cu “Bawipa ih Umnak Puanthlam,” tiah hmin a sak. Bawipa ton a duhmi pawl cu riahnak hmun ihsin an suak ih cuih Puanthlam ahcun an feh ṭheu. 8Moses cu acuih Puanthlam lam a feh tinte in, senpi pawl cu an sangka ciarah an ding ih Bawipa ih Puanthlam sungih Moses a lut hlan lo an zoh ṭheu. 9Cuih Puanthlam sungih Moses a luh hnuah mero cu a zualin a rung zaam ṭheu ih Puanthlam sangka cu a zeel ṭheu; cule cuih mero sung ihsin Bawipa in Moses hnenah thu a sim ṭheu. 10Puanthlam sangka ih mero a um kha misenpi in an hmuh tikah an ding ih an thlam sangka ihsin an lu an kuun ciar ṭheu. 11Rualpi ṭha biak-awk bangtuk in Bawipa le Moses cu hmaitontein an bia-aw ṭheu. Cuih hnuah Moses cu riahnak hmunah a kirsal ṭheu. Asinain Moses bawmtu tlangval Joshua, Nun ih fapa cu thlam sungah a taangta ṭheu.

Bawipa In Umpi Dingah A Kam

12Moses in Bawipa ih hnenah, “Hi Israel mi pawl Kanaan ramih hruai dingah i fial ti cu ka thei; asinain keimah thawn feh dingah zoso na thlah ti cu i sim hrih lo. ‘Nangmah cu ka lo thei zet ih ka lung i awiter zet a si,’ tiah i ti zo. 13Curuangah ka parah na lung a awi a si ahcun nangmah cu ka lo theih sinsin ih na lung ka awiter ringringnak dingah na tumtahmi i sim hram dingin zaangfah ka lo dil. Hi Israel mi pawl hi na miphun si dingah na rak hril khal kha ciing hram aw,” tiah a ti.

14Cutikah Bawipa in, “Na hnenah ka feh ding ih hnangamnak ka lo pe ding a si,” a ti.

15Cule Moses in, “Kan hnenah na feh lo ding a si ahcun hi hmun ihsin in fehter nawn hlah aw. 16Ziangahtile in fehpi lo a si ahcun na minung pawl le keimah in na mithmai ṭha kan co zia hi ziangtinso mi in an theih ding? In umpinak hin leilung tlunih miphun hmuahhmuah lak ihsin kan hleicetzia a langter ding a sisi,” tiah a ti.

17Cutikah Bawipa in Moses hnenah, “Na dilmi vekin ka tuah ding; ziangahtile ka lo theih zetmi na si ih na parah ka lung a awi zet,” tiah a ti.

18Cule Moses in, “Bawipa, zaangfahte in na sunlawizia i hmuh hram aw,” tiah a dil.

19Cutikah Bawipa in, “Ka sunlawizia cu ka lo hmuh ding ih ka hmin thianghlim cu na hmai rori-ah ka phuang ding: Keimah cu Bawipa ka si. Ka lainat duhmi cu ka laina ding ih ka zaangfah duhmi cu ka zaangfah ding. 20Sikhalsehla ka hmai rori cu nan hmu thei lo ding. Ziangahtile ka hmai a hmutu cu zohman an nung lo ding a si,” tiah a ti. 21Cuih hnuah Bawipa in, “Zohhnik, lungpi parah dinnak ṭha ka kiangah hmun a um. 22Na kiangte ihsin ka sunlawinak a ra lan tikah lungpi kua sungah ka lo thup pei ih ka lo lan ngah hlan lo ka kut in ka lo hup ding. 23Cun ka kut ka lak sal tikah ka dunglam lawng i hmu ding; ka hmai cu na hmu ngah lo ding,” tiah a ti.

Currently Selected:

SUAHLANNAK 33: FCL

Highlight

Copy

Compare