SUAHLANNAK 27

Biakṭheng

(Suah 38.1-7)

1“Biakṭheng cu lawithing in nan don pei ih a saulam le a kauhlam a can awmi a si pei. Pi sarih le hrek a saumi le a kaumi, pi li le hrek a saangmi a si pei. 2A kil li ah thingzum pali nan bun pei ih a biakṭheng thawn an peh-aw thluh ding. A zatein daar in nan tuam pei. 3Biakṭheng ih sahriak le vutcam laknak ah, cawhleek, kheng, thil awh-nak le beel pawl nan tuah pei ih biakṭheng thilri cu a zatein daar in nan tuah thluh pei. 4Cule biakṭheng hrang thotho ah daar in sur nan tuah pei. Cuih daar sur kil li ah darkual pali nan thlaih pei ih, 5biakṭheng a saannak ih hrek tiang a thlennak dingah darkual cu biakṭheng ih zim hnuai ah nan thlaih pei. 6Biakṭheng hrangah lawithing in zawnfung pawl nan tuah pei ih daar in nan tuam pei. 7Biakṭheng nan zawn tikah biakṭheng siirih a ummi darkual ah zawnfung pawl cu nan hrolh ṭheu pei. 8Biakṭheng cu a sungah thingpheng in a kua nan tuah pei. Tlang parih ka lo hmuhmi innruang vekin nan tuah thluh pei.

Puanthlam Kulhnak

(Suah 38.9-20)

9“Hi ka umnak Puanthlam hrangah tualrawn nan tuah pei. Thlanglam kapah kaih 50 sau puanṭha mankhungih phiarmi puanzar nan tuah pei. 10A cuih puanzar cu daar tawdam a neimi darṭhuam ṭhuam kul ah nan thlai pei ih acuih ṭhuam pawl ih parah a bannak le ngunih tuahmi a tlangkham pawl an um pei. 11Cuvek thothoin saklam kapih puanzar cu kaih sawmnga saumi a si pei ih daar tawdam a neimi darṭhuam ṭhuam kul ah nan thlai pei. A cuih ṭhuam pawl ih parah a bannak le ngunih tuahmi a tlangkham pawl an um pei. 12Nitlaknaklam, a kauhlam kulhnak dingah cun kaih kul hluannga a saumi puanzar in ṭhuam pahra le tawdam pahra thawn nan tuah pei. 13Nisuahnaklam, sangka a umnak lamih a kulhnak cu kaih kul hluannga a kau pei. 14A luhnak ihsin khatlam kapih puanzar cu kaih sarih le a hrek a kaumi, ṭhuam pathum le a tawdam pathum nan tuah pei. 15Cule a dang khatlam kapih zaarmi puanzar khal kaih sarih le a hrek kaumi, ṭhuam pathum le a tawdam pathum in a si ve pei. 16A luhnak sangka puanzar cu mepian, a sen le a sendup, tuuhmul le coihcinmawi puan mankhung, kaih hra sau in nan tuah pei. Cuih puanzar cu tawdam pali ihsin a dingmi ṭhuam pali parah nan thlai pei. 17A kulhnak hrangih ṭhuam hmuahhmuah cu ngunih tuahmi ṭhuam tlang in a peh thluh pei ih ṭhuamtlang bannak pawl cu ngunih tuahmi an si pei. Ṭhuam tawdam pawl cu daarih tuahmi an si pei. 18Hi kulhnak cu kaih sawmnga sau, kaih kul hluannga kau le kaih hnih le hrek sang a si pei. Puanzar pawl cu patphiar ih tahmi puan mankhung an si pei. Ṭhuam tawdam pawl cu daarih tuahmi an si pei. 19Pathian umnak Puanthlam sungih hmanmi thilri hmuahhmuah, ziangih hman an si khalle, Puanthlam le a kulhnakih thil bannak hmuahhmuah tiangin daar in tuahmi an si thluh pei.

20“Israel mi pawl kha an olif hriak ṭha bik rak keng dingin thu pe awla, cule mei-inn cu cat loin a vang ringring thei ding. 21Pathian in a minung pawl a tonnak Puanthlam sung, Thukam Kuang an retnak hmai zawnih puanzar lenglamah acuih mei-inn cu Aaron le a fapa pawl in an ret pei. Cutawkah Bawipa ih hmaika-ah zanlam ihsin zinglam tiang mei-inn cu an vangter pei. Hi thupekmi cu Israel mi pawl le an tesinfa pawl in a kumkhua-in an thlun dingmi a si.

Currently Selected:

SUAHLANNAK 27: FCL

Highlight

Copy

Compare