ESTHER 7
7
Haman An That
1Cuticun siangpahrang le Haman cu rawl ei dingah Esther hnenah, 2a voihnihnak an feh. Sabitti an in ih siangpahrang in Esther cu, “Atu-ah, siangpahrang bawinu Esther, na duhmi cu i sim awla ka lo pe ko ding. Ka ram ukmi a hrek hman ka lo pe ko ding,” tiah a ti.
3Cutikah siangpahrang bawinu Esther in, “Maw Siangpahrang bawipa, tangdornak thawn ka lo dilmi i pek tum a si ahcun, ka nunnak le ka miphun pawl ih nunnak hi in zuah hram aw, ti ka lo dil a si. 4Ka miphun pawl le keimah hi thah thluh dingah phiartu an um; kannih hi siatsuah thluh ding le kan ci ih hmit thluh ding kan si. Sal ih zuar ding lawng si nungla cu siangpahrang bawipa zianghman hnahnawhnak pek loin daiziar in ka um ding naón, atu cu cuvek a si lo; kan ci ih hmit thluh ding kan si,” a ti.
5Cutikah siangpahrang Xerxes in, “Cubangtuk thil tuah a tum ngamtu cu zoso a si? Khuiah so a um?” tiah Esther cu a sut.
6Esther in, “In raltu le in hremtu cu hi miṭha lo pa Haman hi a si,” tiah a ti.
Cumi a theih tikah Haman cu a khur thlohthlo ih zianghman a ṭong thei lo. 7Cule siangpahrang cu a thinheng in a tho ih a leng ih hmuan ah a va feh. Siangpahrang in i zuah lo ding, ti cu Haman cun a thei keukeu. Curuangah a tonak ahcun a to ih a nunnak hum dingah siangpahrang bawinu Esther cu a dil ciamco. 8Siangpahrang cu hmuan ihsin rawl einak khaan sungih a rung luhsal tikah, zaangfahnak dil phah in Haman cu Esther ih tokham parah a sep-aw. Cutikah Siangpahrang bawipa cun, “Hi pa hi ka innsung le ka hmaika rori ah siangpahrang bawinu a kaihrem tum maw si?” tiah a au ciamco.
Cumi hman siangpahrang in a ṭong ṭheh hlanah amah kiltu pawl in Haman ih hmai cu an khuh. 9Cule anmah lakih pakhat pa Harbonah in, “Siangpahrang bawipa ih nunnak a hum suaktu Mordekai thlainak ah tiah Haman in a inn ah thlaithahnak hman a tuah thluh zo sokhaw. Cuih thlaithahnak cu pi sawmsarih le pi nga a sang a si,” tiah a ti.
Siangpahrang in, “Cutawkah Haman hi va thlai uh,” tiah thu a pek.
10Curuangah Haman cu Mordekai thahnak ih a tuah mi thlaithahnak ahcun an thlai that. Cule Siangpahrang ih thin cu a dai sal.
Currently Selected:
ESTHER 7: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
