THUSIMTU 11
11
Mifim Ih Tuah Mi
1Na tangka sumtuahnak ah hmang aw,
Nikhat khat a miat na ngah ding.
2Na neih mi ṭhen sarih a si lole ṭhen riatah ṭhen aw,
Leilung tlunah ziang thil ṭha lo a thleng ding ti na thei lo.
3Khawdur in ruah a phurh ahcun leilung parah a burh ding,
Thingkung cu thlanglam ah siseh saklam ah siseh a tluk tikah,
A tluknak hmun poh ah a taang a si.
4Thli lawng a zohtu cun thlaici a tuh dah lo,
Khawdur lawng a thlirtu cun rawl a la dah lo.
5Nunau in a pum sungih a vun mi naute,
Ziangtin nunnak hram a thok ti na theih theilo vekin;
Ziangtinkim ti theitu Pathian ih
Hnaṭuannak cu na thei thei lo.
6Zinglam ah thlaici tuh aw, zanlam tiang cawl hlah;
Khui mi a kho ṭha ding ti na thei lo;
An pahnih in an ṭha ding maw ti khal na thei lo.
7Khawvaang hi a ṭha,
Nitleu hmuh khal hi a nuam.
8Mi pakhat kum reipi a nung asile
A tlaitluan in mi lungawi siseh.
Asinain a thi dingih a hrangih khawthim cu,
A sau zet ding tiah ciing aw.
Hmailam hrang beisei ding a um lo.
Mino Hrang Nunsimnak
9Maw mino, na no laiah hin lungawi in um aw;
Na no lai caan hi hmang ṭha aw.
Na thinlung duhnak le,
Na mit ih a lo hruainak ah thlun aw.
Asinain hi thil hmuahhmuah ruangah hin
Pathian in na thu a lo ṭhen ding, ti kha thei aw.
10Na thinlung ih thinharnak hlon aw;
Na taksa ih harnak khal hlon aw;
Ziangahtile reipi na no nawn lo ding.
Currently Selected:
THUSIMTU 11: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.