DAAN PEKSALNAK 13

1“Profet a si lole mangman thiamtu pakhatkhat nan lakah an suak ih, 2nan biak dah lomi pathian kha kan bia dingih an hna kan ṭuan ding, tiah lo khihhmuh tahrat in thilmak zetzet le mangbangza an lo hmuh ih, cuih an lo hmuhmi thilmak zetzet pawl cu dikzetih a kim ngaingai khalle, 3cubangtuk cu zianghman ah va siar hlah uh. Bawipa cu nan thin le nan lung zatein nan duhdaw maw duhdaw lo ti ih nanmah hniksaknak ah Bawipa nan Pathian in amah cu a hmang a si. 4Bawipa nan Pathian cu a dung in thlun uhla ṭihzah uh. Amah ih thu cu ngai uhla a thupekmi tuah uh. Amah cu biak uhla a rinsan tlakmi si uh. A hna ṭuan uhla amah cu pomhnget uh. 5Sikhalsehla sal nan taannak Izipt ram in a lo runsuaktu Bawipa dodal dingah a lo forhfialtu profet a si lole mangmantu cu that uh. Amah cu miṭha lo a si ih Bawipa ih a lo duhsakmi nunnak lamzin in lo hruaisual a tum ruangah amah cu thah ding a si. Cuticun hi thil ṭha lo cu nan cemter ding.

6“Na unau, na fapa, na fanu, na duhdawtmi na nupi, a si lole na rualpi ṭha bik tla cu nanmah le nan pipu pawl ih nan biak dah lomi khawzing bia dingah a thupte ih a lo thlemtu an si thei. 7Nan kiangteih a ummi miphun pawl ih khawzing, a si lole lam hlapi ih a ummi miphun pawl ih khawzing bia dingin a lo thlemtu pakhatkhat an si thei. 8Asinain va thlun hlah; a ṭongmi khal ngai duh hlah. Amah cu zaangfah hrimhrim hlah, hum hlah; a zuah khal zuah hlah. 9That mai! Lungto in a deng hmaisa biktu si aw; midang khalin deng ciar hai seh. 10Lungto in deengthat rori uh! Sal nan taannak Izipt ram in a lo runsuaktu Bawipa nan Pathian thawn hlat dingin a lo hruai tum a si. 11Cutikah Israel mi pawl in an thei ding ih an ṭih ding; nehhnu ah cuvek thil ṭha lo cu zohman in an tuah nawn lo ding.

12“Bawipa nan Pathian ih a lo pekmi khawpi sungih nan um tikah, 13nan biak dah lomi khawzing bia dingah nan miphun sungih mi hrokhrawl hrekkhat pawl in khawsung mi pawl an hruaisualnak thu nan theih tikah, 14felzetin hlathlai uh. Thudik a si ih cubangtuk thil ṭha lo a um ngaingai a si ahcun, 15cuih khawsungih a ummi hmuahhmuah cu an ṭilva pawl thawn nam in nan sat that thluh pei. Cuih khua cu nan siat thluh pei. 16Khawsung mi pawl ih neihmi thilri hmuahhmuah cu khawsung mualpi ah nan khawm thluh pei. Cule Bawipa nan Pathian hnenih thawinak pekmi aiah cuih khua le a sungih a ummi hmuahhmuah cu nan ur thluh pei. Cuticun kumkhua a siatta ding ih dinsal a si nawn lo pei. 17Siat thluh ding timi sungin nan hrangah zianghman lakmi nei hlah uh; cuih hnuah Bawipa ih thinhennak cu a deem ding ih a lo zaangfah ding. Tuihsun ih ka lo pekmi thukham pawl hi nan thlun ih amah ih fialmi nan tuah a si ahcun, 18nan parah zaangfah thinpemnak a nei ding ih nan pu le nan pa pawl hnenih a thutiammi bangin nan pungzai ding.”

Currently Selected:

DAAN PEKSALNAK 13: FCL

Highlight

Copy

Compare