2 SAMUEL 23
23
David Ih ṭongkam Netabik
1Jesse ih fapa, Pathian ih a khaisan mi, Jakob ih Pathian in siangpahrang si dingih a hrilmi le Israel mi hrangah hla mawi zetzet a phuahtu David ih ṭongkam neta bik cu hibangtuk in a si:
2 Bawipa ih thlarau in ka hnen
ihsin a sim,
A thu cu ka hmurka ah a um.
3Israel ih Pathian cun a sim zo;
Israel humhimtu in ka hnenah:
“Dingnak le Pathian ṭihzah in,
Mi a uktu siangpahrang cu,
4Khawdur um lo zinglamih a tlang
mi ni bangtuk a si,
Ruah a han ih hrampi a tleutertu,
ni bangtuk a si,” a ti.
5A pelh thei lo dingmi le,
Kumkhua ih a hmunmi thukamnak in,
Bawipa in thu i kam zo ruangah,
Ka tesinfa pawl cu Pathian in
a thlawsuah ding.
Cumi cu ka saduhthah a si;
Cumi cu ka nehnak a si ding,
Pathian in a kimter tengteng ding.
6Sikhalsehla Pathian a ṭihzah
lotu cu,
Nelrawn ih hlonhlo mi hling
bangtuk an si.
Kut lawngih tham theih pawl an si lo.
7Lak ding ahcun hreihriam le
feipi hman a ṭul;
Meisa ih ur thluh ding an si.
David Ih Ralkap Hminthang Pawl
(1 San. 11.10-41)
8David ih ralkap hminthang pawl cu hi pawl hi an si: Pakhatnak cu Takhemon mi Josheb Basshebeth a si ih “Mi Pathum,” timi lakah hotu a si. A feipi pakhat thawn ral minung zariat a do ih ṭum khatah an zatein a that thluh.
9Pahnihnak cu Eleazar a si ih “Mi Pathum,” lakih a tel ve mi a si. Amah cu Dodo ih fapa a si ih Ahoh hrin a si. Voikhat ah Eleazar le David in raldo dingih a khawm-aw mi Filistin mi pawl cu ṭih loin an dinhnawh ngam a si. Israel mi pawl cu an tlanhlo ṭheh. 10Asinain Eleazar cu a umnak hmun ihsin a ṭang ih Filistin mi pawl cu a ralnam in a sat ciamco hai ih a kut a hit ṭheh ih a ralnam humnak hman pharh thei nawn lo tiangin a that. A cuih ni ah Bawipa in a cakzet mi ral a neh. Cuṭheh in Israel mi pawl cu a thi mi pawl ih ralthuam lak ding lawngah Eleazar ih hnenah an ra kir.
11Pathumnak cu Harar mi, Agee ih fapa Shammah a si. Filistin ralkap pawl cu Lehi ah an khawm aw. Lehi ahcun bete lo pakhat a um. Filistin mi in Israel mi pawl cu an dawi thluh. 12Asinain Shammah cu lo sungih a dinnak hmun in a ṭang ih lo cu a kil ih Filistin mi pawl tampi a that. A cuih ni ah Bawipa in a cakzet mi ral a neh a si.
13Lo ih rawlkhawm a cut zik thlang tikah Filistin ralkap pawl bur khat cu Refaim Phairawn ah an um. Cule “Mi Sawmthum,” sungih pathum pawl cu Adullam Lungpuk ah David hnenah an vung feh. 14David cu ralhruang sungah a um ih, Filistin ralkap bur khat cu Bethlehem ah an um. 15Cutikah David cu a lung a leng ih, “Aw, Bethlehem kotka kiangih a ummi tikhur ih tidai kha khuat khat talin in petu um hai sehla ka va duh ve,” tiah a hrum ruangro. 16Cule hminthang zet mi ralkap pathum pawl cun Filistin ral pawl cu an umnak ah an va nor ih tikhur ihsin tidai an khai ih David cu an pek. Sikhalsehla David in a in lo. Bawipa hnenih thawinak tidai ah a hmang. 17“Maw Bawipa, hi tidai cu ziangtinso ka in thei ding?. An nunnak pek ngam ih an khaimi a si ruangah hi tidai ka in ahcun ka ralkap pathum ih thisen in ka bang ding,” a ti. Curuangah a cuih tidai cu in loin thawinakah a thlet.
A tlunih porh tlak hnaṭuanmi pawl cu hminthang ralkap pathum ih tuah mi an si.
18Joab ih nau Zeruiah ih fapa, Abishai cu “Mi Sawmthum,” ih hotu a si. Voikhat cu a feipi pakhat thawn ral zathum a do ih a that thluh. Curuangah “Mi Sawmthum,” sungah a hmin a thang ngaingai. 19Sawmthum sungih hminthang bik a si ruangah an hotu ah a cang. Asinain “Mi Pathum,” pawl cu a tluk lo.
20Cun Kabzeel khuami, Jehoiada ih fapa, Benaiah cu ralkap hminthangzet le raldonak ih ralṭhazet a si. Moab ralkap hminthangzet pahnih tla a that. Vur a tlak sun ni khat ah khur sungah luhhnawh tahratin kiosa pakhat tla a that. 21Cule Izipt mi pa mi tumzet, feipi a kengtu pa tla a that. Benaiah cun talhtum thawn a nam ih Izipt pa ih kut sungih sin feipi cu a long ih amah ih feipi lala cun a thatta. 22Benaiah ih ralṭhat zia cu cubangtuk a si. Amah cu “Mi Sawmthum,” lakih pakhat a si. 23Sawmthum lakah mi hleice a si. Asinain pathum pawl cu a tluk lo. David in amah kilvengtu pawl hotu ah a ret.
24Hminthang “Sawmthum,” sungih a telmi midang pawl cu a tanglam pawl hi an si:
Joab ih nau Asahel,
Bethlehem ihsin Dodo ih fapa
Elhanan,
25Harod ihsin Shammah,
Harod ihsin Elika,
26Pelet ihsin Helez,
Tekoa ihsin Ikkesh ih fapa Ira,
27Anathoth ihsin Abiezer,
Hushah ihsin Mebunnai,
28Ahoh ihsin Zalmon,
Netofah ihsin Maharai,
29Netofah ihsin Baanah ih fapa
Heleb,
Benjamin ram Gibeah ihsin Ribai
ih fapa Ittai,
30Pirathon ihsin Benaiah,
Gaash kiang phairawn ram ihsin
Hiddai,
31Arabah ihsin Abialbon,
Bahurim ihsin Azmaveth,
32Shaalbon ihsin Eliahba,
Jashen ih fapa pawl,
Jonathan,
33Harar ihsin Shammah,
Harar ihsin Sharar ih fapa Ahiam,
34Maakah ihsin Ahasbai ih fapa
Elifelet,
Gilo ihsin Ahithofel ih fapa Eliam,
35Karmel ihsin Hezro,
Arab ihsin Paarai,
36Zobah ihsin Nathan ih fapa Igal,
Gad ihsin Bani,
37Ammon ihsin Zelek,
Beeroth ihsin Joab ih hriamnam
phurtu Zeruiah ih fapa Naharai.
38Jattir ihsin Ira.
Jattir ihsin Gareb,
39Hit mi pa Uriah.
An zateón ralkap hminthang sawmthum le pasarih an um.
Currently Selected:
2 SAMUEL 23: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
