2 SIANGPAHRANG 11
11
Judah Siangpahrang Bawinu Athaliah
(2 San. 22.10—23.15)
1Siangpahrang Ahaziah ih nu Athaliah in a fapa an thah kha a theih tikah a fapa Ahaziah ih innsang pawl cu, siangpahrang an cang pang ding ti phan ah a that ṭheh. 2Ahaziah fapa Joash lawng a luat. Amah khal cu thah ding a si naón a ninu Jehosheba in a rak run ngah. (Jehosheba cu siangpahrang Jehoram ih fanu a si ih Ahaziah ih farnu seu a si.) Jehosheba in Joash cu amah umtu nu thawn Biakinn sungih ihnak khaan pakhat sungah a thup ih cutawkah a kilkhawi; cuticun Athaliah in a hmu lo ih a luat. 3Jehosheba cun Joash cu kum ruk sung Biakinn sungah a thup ih ṭhatein a zoh; cuih sung cu Athaliah in siangpahrang bawinu a ṭuan ih rampi uktu a si.
4Asinain kum sarihnak ah puithiam Jehoiada in siangpahrang bawinu kiltu le siangpahrang inn kiltu bawi pawl cu Biakinn ah a ko ih siatcam in thu a kamter hai ih a tumtahmi cu an hnenah a sim. Siangpahrang Ahaziah ih fapa Joash cu an hmaiah a rak hruai ih, 5hiti in thu a pek. “Sabbath ni ih mi kiltu nan si tikah nanmah lakih ṭhen thum ṭhen khat in siangpahrang inn nan kil pei. 6A dang ṭhen khat cu Sur Kotka kiltu nan si pei ih a dang ṭhen khat in kotka kiltu dunglam in nan kil pei. 7Sabbath ni ih mi kilvengtu a si lo mi bur hnih pawl tla a hleice in Biakinn ah ṭuanvo nan nei pei ih siangpahrang nan kil pei. 8Siangpahrang Joash cu nan ralnam zuuk cia in nan kil pei ih a fehnak kipah nan thlun pei. A ra lo naihtu poh cu nan that pei,” a ti.
9Puithiam Jehoiada ih thupekmi cu bawi pawl cun an ngai ih an kuthnuai milai pawl, Sabbath ni ih mikiltu a si mi siseh, mikiltu a si lo mi tla siseh, a hnenah an ratter ṭheh. 10Jehoiada in bawi pawl hnenah cun David ih a rak hmanmi, Biakinn sungih an retmi feipi le ralphaw pawl cu a pek. 11Cule mivengtu ralkap pawl Biakinn kimvel ahcun a ret ih an ralnam keng fekfek in siangpahrang cu an kil. 12Cutikah Jehoiada in Joash cu a run suahpi ih siangpahrang lukhuh a khum hnuah thukamnak cazual, siangpahrang thuneihnak capi thawn, a pek. Cule hriak a culh ih siangpahrang ah an tuah. Misenpi in an za an beng ih, “Siangpahrang a nunkhua sau hram seh!” tiah an au.
13Siangpahrang bawinu Athaliah in misenpi le mikiltu pawl an au thawmvang cu a theih tikah misenpi an tonkhawmnak Biakinn ahcun zamrang tein a va feh. 14Siangpahrang thar cu, a daan bangtuk in, Biakinn sung luhnak ṭhuam kiangah an dinter ih ralbawi pawl le tawtawrawt tumtu pawl in an kil ṭhepṭhep. Misenpi cu lungawizet in an au; tawtawrawt tum ih an um kha Athaliah cun a hmu. A riahsia in Athaliah cun a hnipuan a thlek ih, “Phiarnak! Phiarnak!” tiah a au.
15Jehoiada in Biakinn sungah Athaliah thah a duh lo ruangah ralbawi pawl hnenah, “Kai uhla ralkap pawl ih kil phah in a lengah hei dir uh; amah run a tumtu hmuahhmuah cu that uh,” tiah thu a pek. 16An kai ih siangpahrang inn ah an hei hruai ih Rang Kotka timi ah an that.
Jehoiada Ih Hnaṭuan Mi
(2 San. 23.16-21)
17Jehoiada cun Bawipa ih miphun an sinak dingah siangpahrang le misenpi cu Bawipa thawn thukamnak a tuahter; siangpahrang le misenpi tla an karlakah thukamnak a tuahter. 18Misenpi cu Baal biakinn ah an feh ih an siatbal ṭheh; biakinn sungih ummi biakṭheng le milem pawl cu an deng kuai thluh. Baal puithiam Mattan tla biakṭheng hmai rori ah an that.
Jehoiada in Biakinn ah mikiltu a ret ih, 19amah le ralbawi pawl, siangpahrang kiltu le siangpahrang inn kiltu pawl in siangpahrang bawipa cu Biakinn ihsin siangpahrang inn ah an fehpi ih misenpi pawl in an thlun. Joash cu Mivengtu Kotka timi in a lut ih siangpahrang tokham parah a to. 20Mi hmuahhmuah ih thinlung cu lungawinak in a khat; siangpahrang inn sungih ralnam thawn Athaliah an thah hnu cun an khawpi cu a dai.
21Kum sarih a ti ah Joash cu Judah siangpahrang ah a cang.
Currently Selected:
2 SIANGPAHRANG 11: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
