2 SANSIARNAK 36

Judah Siangpahrang Joahaz

(2 Sian. 23.30-35)

1Judah mi pawl in Josiah fapa Joahaz siangpahrang ah an hril ih Jerusalem khua ah hriak an culh. 2Joahaz cu Judah siangpahrang a ṭuan tikah kum kul hluanthum a ti ih Jerusalem ihsin thla thum sung a uk. 3Izipt siangpahrang Neko in a kaih ih thawngah a thlak; cule Judah mi in Neko cu ngun pawng zasarih le sawmnga, le sui pawng sawmsarih le pawng nga siah ah an pek. 4Neko in Joahaz unau Eliakim cu Judah siangpahrang ah a tuah ih a hmin Jehoiakim ah a thleng. Joahaz cu Neko in Izipt ramah a hruai.

Judah Siangpahrang Jehoiakim

(2 Sian. 23.36—24.7)

5Jehoiakim cu Judah siangpahrang a ṭuan ah kum kul hluannga a ti ih Jerusalem ihsin kum hleikhat sung a uk. Bawipa a Pathian hmaiah thil ṭha lo a tuah. 6Babilon siangpahrang Nebuchadnezzar in Judah ram cu a siim ih Jehoiakim cu kai tahrat in thir cikcin in an khit ih Babilon ah an hruai. 7Nebuchadnezzar in Bawipa ih Biakinn thilri mankhung hrekkhat pawl a lak ih Babilon a siangpahrang inn ah a ret. 8Jehoiakim ih tuahmi hmuahhmuah, ningsinza thil a tuahmi cu a sualnak pawl tiangin, Israel Le Judah Siangpahrang Thuanthu Cabu sungah an ngan a si. A fapa Jehoiakhin in a ai-ah siangpahrang a run ṭuan.

Judah Siangpahrang Jehoiakhin

(2 Sian. 24.8-17)

9Jehoiakhin cu Judah siangpahrang a ṭuan tikah kum hleiriat a ti ih Jerusalem ihsin thla thum le nihra sung a uk. Anih khal Bawipa ih hmaiah a sual. 10Khawsik a reh ih ṭhal a hungsuah tikah siangpahrang Nebuchadnezzar in a kai ih Babilon ah a hruai. Bawipa ih Biakinn thilri mankhung pawl tla a phur ṭheh. Cule Nebuchadnezzar in Jehoiakhin ih unau Zedekiah cu Judah le Jerusalem siangpahrang ah a tuah.

Judah Siangpahrang Zedekiah

(2 Sian. 24.18-20; Jer. 52.1-3a)

11Zedekiah cu Judah siangpahrang a ṭuan tikah kum kul hluankhat a ti ih Jerusalem ihsin kum hleikhat sung a uk. 12Bawipa ih hmaiah sualnak a tuah; Bawipa ih thu a phuangtu profet Jeremiah ih thusimmi a ngai lo.

Jerusalem Khawpi An Lak

(2 Sian. 25.1-21; Jer. 52.3b-11)

13Zedekiah cu siangpahrang Nebuchadnezzar do dingah ral a tho. Cutikah Nebuchadnezzar in a kuthnuai um dingah Pathian hmin saal in thu a kamter. Zedekiah in Bawipa Israel ih Pathian hnenah sualsir-aw in Pathian hnenih hoikir sal a tum hrimhrim lo. 14Cuih tlunah Judah mi hotu pawl, puithiam le misenpi pawl khal in an kiangkap ih um miphun pawl ih sualnak keneh cu an thlunih an uire a si. Cuticun Bawipa amah rori in a thianhlimter mi Biakinn cu an borhhlawhter ṭheh. 15Bawipa, an pupa ih Pathian in a minung pawl le a Biakinn cu a zuah duh ruangah an hnenih ralrinnak pe dingah cat loin profet a thlah. 16Asinain Pathian ih thlahmi palai le profet pawl cu an rak hmuhsuam; an hnihsan men ih zianghman ah an siar lo. A netnak ahcun an parah Bawipa ih thinhengnak cu a luar tukih an luat theinak lamzin a um nawn lo.

17 Bawipa in Babilon siangpahrang a thlah ih Judah mi mino pawl cu Biakinn sung hmanah a that; zovek tlun hmanah zaangfahnak a nei lo; mino siseh, upa siseh, nunau mipa tilo in, a na mi le harhdam mi tla an zatein a kut sungah Bawipa in a pek ṭheh a si. 18Babilon siangpahrang in Bawipa ih Biakinn a siim ih thilri le sumsaw, siangpahrang le a kuthnuai bawi pawl thilri mankhung hmuahhmuah a lak ih Babilon ah a phur ṭheh. 19Jerusalem khawpi le Bawipa Biakinn, siangpahrang innpi le a sung thilri pawl tla meisa in a ur ṭheh. 20Ralnam in thah ngah lomi, a taanglai mi pawl cu Babilon ah a hruai thluh ih cutawkah, Persia uknak a thlen hlan lo, Babilon siangpahrang le a tesinfa pawl ih sal ah an cang. 21Cuticun profet Jeremiah hmangin Bawipa ih a rak simmi, “An ulh lomi Sabbath colhnak #Sabbath colhnak timi hi kum sarihnak kum poh ah an ram cu thlo loih colhter ding, timi daan a khihhmuhnak a si. kimter dingah an ram cu kum sawmsarih sung a ṭhing ding,” a timi thu cu a kim a si.

Sairas In Judah Mi A Kirter

(Ezra 1.1-4)

22Persia siangpahrang#Persia siangpahrang Sairas in Babilon khua cu 539 BC ah a neh ih Babilon ram pumpi siangpahrang a ṭuan ih 530 BC tiang a ṭuan a si. Sairas in siangpahrang a ṭuan kum khatnak ah Bawipa ih fial vekin ca a ngan ih a uk sung khuazakipih siar ding in a kuat. Himi cu profet Jeremiah hmangin Bawipa ih thusimmi kimnakah a si. A thusuahmi cu hiti in a ngan:

23“Himi cu Persia siangpahrang Sairas thusuah mi a si. Bawipa vanih Pathian in leilung pumpuluk uktu ah i tuah ih Judah ram Jerusalem khua ah amah hrangih Biakinn sak dingah ṭuanvo i pek. Cu a si ruangah nannih Pathian minung hmuahhmuah cutawkah feh thluh uh; Bawipa nan Pathian cu nan hnenah um hram seh,” tiah a ngan.

Currently Selected:

2 SANSIARNAK 36: FCL

Highlight

Copy

Compare