2 SANSIARNAK 3
3
1Siangpahrang Solomon cun Bawipa ih Biakinn cu Jerusalem khua, a pa siangpahrang David hnenih Bawipa a langnak Moriah Tlangmual ah sak a thok. Cuih hmun cu Jebus mi Araunah in a fang ciilnak puum ih a rak hmanmi a si ih David in a rak simsial thluh zo mi a si. 2Solomon siangpahrang a ṭuannak kum li le thla hnihnak ah Biakinn sak cu a thok. 3Siangpahrang Solomon ih a sakmi Biakinn cu pi sawmkua a sau ih pi sawmthum a kau. 4Biakinn hmai ih hulhliap cu Biakinn tia in pi sawmthum a kau ih pi za le sawmriat a sang. Cuih hulhliap a phar sunglam cu sui in an khuut. 5A laifang khaan cu sidar thing in an ṭelh ih sui in an khuut ih tuumkung le cikcin zuk an cuanter. 6Siangpahrang in Biakinn cu lungmankhung le Parvaim ram ihsin lei mi sui in a ceimawi. 7Biakinn phar pawl, innbo le luanglu pawl, le sangka pawl cu sui in a khuut. A phar ah zungthiam pawl in cherubim lem pawl an cuanter. 8A sungta bik khaan cu Hmun Thianghlim Bik an timi a si ih pi sawmthum a sau ih Biakinn tia in pi sawmthum a kau. Hmun Thianghlim Bik phar pawl khuutnakah sui pawng thawng sawmli le thawng nga an hmang; 9tlawngkhen an hmanmi cu sui in an tuah ih tlawngkhen hrangah sui pawng khat lenglo a rit. Tlunta khaan phar pawl tla sui hlir in an khuut.
10Siangpahrang in a hnaṭuantu pawl cu thir in cherubim lem pahnih a tuahter ih Hmun Thianghlim Bik ahcun a ret. 11-13Cuih cherubim lem pawl cu sangka lam hoi in a ret hai ih artlang in an dinter. Cherubim pakhat in thla pahnih a nei ih a thla pakhat cu pi sarih le a hrek a sau; cuhrangah an thla an pharh tikah a khaan laifangah an thla cu a tong-aw ih khatlam thla in phar an dai veve; cuticun a khaan kauh lam pi sawmthum cu an thla in a dai ṭheh. 14Puanzar pakhat an tuah ih cuih puanzar cu pat phangfemte ih tah mi le mepian, sendup le a sen in buhmi a si; cuih puanzar cu cherubim lem pawl cuangin an ṭelhmi a si.
Dar ṭhuam Pahnih
(1 Sian. 7.15-22)
15Siangpahrang in pi sawmnga le pi hnih a saangmi dar ṭhuam pahnih a tuah ih Biakinn hmaiah a phun. Ṭhuam ih lubo cu pi sarih le a hrek veve a sang. 16Ṭhuam ziik cu ṭhi kual a peh-aw thluhmi le dar ih tuahmi taleti zakhat in an ceimawi. 17Ṭhuam pahnih cu Biakinn vung luhnak saklam le thlanglam ah an phun; thlanglamta cu Jakhin#Jakhin ti mi cu Hebru ṭong in Amah (Pathian) in a hngetter ti thawn a aw suah a bang-aw a si. an ti ih saklamta cu Boaz #Boaz timi cu Hebru ṭong in Amah (Pathian) cahnak in ti thawn a aw suah a bang-aw a si. an ti.
Currently Selected:
2 SANSIARNAK 3: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
