2 SANSIARNAK 20
20
Judah Mi In Edom Mi An Do
1Tikcu a hung rei tikah Moab ralkap le Ammon ralkap pawl in, anmah ṭantu Meunim mi pawl thawn Judah ram an do. 2Siangpahrang Jehoshafat hnenah thuphurtu an ra thleng ih, “Edom ram in ralkap tam ngaingai an ra ih Tipi Thi khatlam ral in a lo do an tum a si. Hazazon Tamar khua tla an la zo,” tiah an sim. (Hazazon Tamar cu En-gedi ti khal in an ko.) 3Jehoshafat cu a thin a phang ih thlacam in Bawipa ih hruainak a dil. Cule a ramsungmi hmuahhmuah rawl ul dingah thu a pek. 4Judah ram khawkip in Jerusalem ah Bawipa ih hruainak dil dingin an ra. 5Jerusalem khuasungmi pawl thawn Biakinn tual thar ah an tongaw khawm. Siangpahrang Jehoshafat cu an hmaiah a va ding ih, 6ring zetin thla a cam: “Maw Bawipa, kan pu le kan pa ih Pathian, na umnak van ihsin leitlun miphun hmuahhmuah nangmah in na uk ṭheh. Cahnak le huham hmuahhmuah nangmah ih ta an si ih a lo dodal theitu zohman an um lo. 7Nangmah cu kan Pathian na si. Na mi Israel pawl hitawk ram an ra thlen tikah hitawk ih a rak ummi miphun pawl cu na dawi hai ih na rualpa Abraham ih tesinfa pawl hnenah hi ram cu kumkhua an ta si dingin na pek. 8Hi ram sungah an um ih nangmah upatnak ah Biakinn an sak. 9Harsat vansaannak a phunphun-raldo siatsuahnak, natsia le paam an hnenih a thlen tikah hi Biakinn hmaiah ding in an lo bia, an lo ngennak hmun ah an tuahmi a si. Na hnenih thla an ra cam tikah na theih sak ih na run hai ṭheu.
10“Maw Bawipa, atu-ah Ammon mi, Moab mi le Edom mi pawl in in do. Kan pupa pawl Izipt ram ihsin an rak suah laiah hi ram pawl hi an pal phah ding na rak siang lo; curuangah kan pupa pawl in an ram cu an heel ih an siatsuah lo. 11Cucingin atu-ah in thungrulh tum daan hi zohhnik-in pekcia mi ram ihsin a dawihlo in tum a si. 12Maw Pathian, kan Pathian, Nangmah in hrem hai aw. In dotu ralkap hizat hmaiah cun kan caang thei hrimhrim lo. Ziang hman kan tuah theimi a um nawn lo; nangmah ih bom ding lawng kan hngak a si,” tiah a ti.
13Judah mi hmuahhmuah an nupi le an faate pawl thawn Biakinn tual ahcun an ding. 14Bawipa ih thlarau cu misenpi lakih a ummi Levi mipa pakhat hnenah a rung thleng. Amah cu Jahaziel a si ih Zekhariah ih fapa, a si. Zekhariah cu Benaiah ih fapa a si; Benaiah cu Jeiel ih fapa a si; Jeiel cu Mattaniah ih fapa a si; Mattaniah cu Levi miphun Asaf hrin a si. 15Cule Jahaziel cun, “Maw siangpahrang bawipa le Judah ram mi le Jerusalem khuami pawl, Bawipa in, ‘Nan ral pawl an tam ruangah phang hlah uh, nan thin tla nau hlah seh. Raldonak cu nan thu a si lo, Pathian lairel a si. 16Thaisun ah nan do pei. Ziz tlangkawn in an ra ding ih Jeruel kiang phairawn a netnak, hramlak a thoknak zawn ah nan tong hai ding. 17Nannih in nan do a ṭul lo ding. Ṭanhmun khuar uhla tiarcia in um uh; cule Bawipa in nehnak a lo pek kha nan hmu ding. Judah le Jerusalem mi pawl, ṭih hrimhrim hlah uh; nan thin khal nau hlah seh. Ral do dingah feh uhla Bawipa Keimah nan hnenah ka um ding,’ a ti,” tiah a sim.
18Cutikah siangpahrang Jehoshafat cu a hmai leilung dai tiangin a kun, misenpi khal an kun ih Bawipa cu an biak. 19Levi phun Kohath le Korah hrin pawl an hung ding ih ring zetin Israel ih Pathian Bawipa cu an thangṭhat.
20A thaizing zingpitte in an tho ih Tekoa kiang hramlak lamah cun an feh. An pawh zawng ah Jehoshafat in an hnenah, “Judah le Jerusalem mi pawl, Bawipa nan Pathian cu rinsan uhla hnget zetin nan ding thei ding. Amah ih profet pawl thusimmi zum uhla nan hlawhtling ding,” tiah a cah. 21Misenpi pawl thu a ron hnuah hla saktu hrekkhat pawl cu puai caanih an hruk ṭheumi korfualpi hruk ih ralkap hmaiah feh tahrat in:
“Bawipa cu thangṭhat uh,
In duhdawtnak cu kumkhua in
a hmun,”
tiah hlasak phah dingah thu a pek.
22Hla saktu pawl in Bawipa thangṭhatnak hla an sak vete in Bawipa in Judah ram a dotu ral pawl cu nasa zetin an lung a phanter. 23Cutikah Ammon mi le Moab mi an ṭangtlang ih Edom ralkap pawl kha an ṭhuat ciammam ih Edom ralkap pawl cu an that ṭheh. Cuih hnuah anmah le anmah nasa zetin an do aw lala. 24Judah ralkap pawl cu tlangbo an thlen tikah an hei zoh ih an ral pawl cu lei parah ril teptep in an hmu. Pakhat hman luat loin an thi thluh.
25Jehoshafat le a ralkap pawl cu an ral pawl ih thilri la dingin an va feh. Caw, rawl, hnipuan le thil mankhung a phunphun tampi an hmu. Cuih thilri hransaw pawl cu ni thum sung an thiar rero naón an thiar cawk lo. 26Ni linak ah Berakah Phairawn ah an khawm-aw ih Pathian an thangṭhat. Cuih phairawn cu atu tiangin Berakah#Berakah ticu Hebru ṭong a si ih thangṭhat tican a si. tiah an ko tata. 27Bawipa in an ral pawl a nehter hnuah Jehoshafat le a ralkap cu Jerusalem ah ralneh lungawinak thawn an kir sal. 28Jerusalem an thlen tikah ṭingṭang le phirivau le tawtawrawt tum phah in Biakinn ah an feh. 29Bawipa in Israel ih ral pawl a nehsak ṭheh ti a rak theitu ram hmuahhmuah cu an thin a phang thluh. 30Bawipa in a ram sung khuazakip a humhim ruangah Jehoshafat in daitein a uk.
Jehoshafat Ram Uk Netnak
(1 Sian. 22.41-50)
31Jehoshafat cu kum sawmthum le kum nga a ti ah Judah siangpahrang a cang ih Jerusalem in kum kul hluannga sung a uk. A nu cu Shilhi fanu Azubah a si. 32A pa Asa bangtuk in Bawipa ih hmaiah thil ṭha a tuah; 33asinain khuavang an biaknak hmun pawl cu a siatbal lo. Misenpi cun an pupa ih Pathian cu an thinlung hmuahhmuah in an bia lo a si.
34Jehoshafat ih tuahmi dangdang cu, a thokin a netnak tiang, Israel Siangpahrang Thuanthu Cabu timi sungih a telmi Hanani Fapa Jehu Thuanthu Cabu timi sungah an ngan a si.
35Voikhat ah Judah siangpahrang Jehoshafat in thil ṭha lo tampi a tuahtu Israel siangpahrang Ahaziah thawn ṭantlangnak cakhen a tuah. 36Eziongeber an timi tangphawlawng colhnak hmun Tarshish lam fehtu ding tangphawlawng pawl an tuah ciamco. 37Asinain Mareshah khuami Dodavahu ih fapa Eliezer in Jehoshafat cu, “Ahaziah thawn nan ṭantlang ruangah na tuahmi pawl cu Bawipa in a siatsuah thluh ding,” tiah ralrinnak a pek. A sim vekin an tangphawlawng pawl cu a siat thluh ih Tarshish ahcun a feh lo.
Currently Selected:
2 SANSIARNAK 20: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
