2 SANSIARNAK 17
17
Jehoshafat Siangpahrang A Cang
1Asa a thih tikah a fapa Jehoshafat in a ai-ah Judah siangpahrang a run ṭuan ih Israel do dingah a tha a cakter sinsin. 2A ralkap pawl cu Judah khawpi tampi ah le hramlakah le Asa in Efraim ram a lakmi khawpi sung tla ah a ret vivo. 3A pa no laiih nunzia thlun in Baal khawzing a biak lo ruangah Bawipa in Jehoshafat cu thlawsuah a pek. 4Jehoshafat cun a pa ih biakmi Pathian rian in a thupekmi vekin a thlun ih Israel siangpahrang dang pawl vekin thil ṭha lo a tuah lo. 5Bawipa in amah cu Judah ram feltein a ukter ih mi hmuahhmuah in a parah lungawi in laksawng an pek ciamco ruangah milianzet le upat ṭihzah zetmi ah a cang. 6Bawipa ih hnaṭuan a uar zet ih Judah ram sungih khawhrum biaknak hmun pawl le Asherah lem pawl khal a siatbal ṭheh.
7Judah siangpahrang a ṭuan kum thumnak ah a tanglam ih bawi pawl: Benhail, Obadiah, Zekhariah, Nethanel, le Mikaiah cu Judah ram khua pawl sungih mi zirhtu dingah a thlah. 8A tlunih bawi pawl cu Levi mi pakua: Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, Tobadonijah le puithiam pahnih Elishama le Jehoram in an thlun. 9Bawipa ih Daan cabu an keng ih Judah ram khua hmuahhmuah ah an feh ih misenpi an zirh vivo.
Jehoshafat Lennak
10 Bawipa ih huham ruangah Judah ram kiangkap ih a ummi ram hmuahhmuah in Jehoshafat do ding cu an ngam lo. 11Filistin mi hrekkhat pawl in Jehoshafat cu laksawng tampi an pek ih ngunkhuai ah ngun tampi tla an pe. Arab mi pawl khal in tuu thawng sarih le zasarih le me thawng sarih le zasarih an pe. 12Cuticun Jehoshafat cu a ṭhangso deuhdeuh ih a cak deuhdeuh fawn. Judah ram sungah rawl le thilri khawlnak khua pawl a tuah ih ralhruang in a kulh. 13Cuih a dinmi khua pawl ahcun thilri tampi a ret.
Jerusalem khua ah ralbawi le ralkap ṭha bik pawl 14a hrin a hrin in a ret. Judah hrin sungin Adnah cu ralkap hotu bawi a si ih a kuthnuai ah ralkap thawng zathum an um. 15Pahnihnak cu Jehohanan a si ih a kuthnuai ah ralkap thawng zahnih le thawng sawmriat an um. 16Pathumnak cu Zikhri ih fapa Amasiah a si ih ralkap thawng zahnih a nei. Amasiah cu pum pe-aw in Bawipa ih hnaṭuantu a si. 17Benjamin hrin sungin ralkap hotu bawi cu ralkap hminthangzet Eliada a si ih ralphaw le conkiang hriamnam kengtu ralkap thawng zahnih hotu a si. 18Eliada sangtu bawi cu Jehozabad a si ih hriamnam kimzet thawn ralkap thawng zakhat le thawng sawmriat a nei. 19Hi ralkap pawl cu Judah ram khawpi pawl ih a retmi ralkap pawl hlei ah Jerusalem ih siangpahrang riantu an si.
Currently Selected:
2 SANSIARNAK 17: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
