2 SANSIARNAK 11
11
Shemaiah Thuphuanmi
(1 Sian. 12.21-24)
1Siangpahrang Rehoboam cu Jerusalem khua a thleng ih Benjamin le Judah hrin sungin ralkap ṭha bik pawl thawng zakhat le thawng sawmriat a khawm. Saklam Israel hrin pawl cu do ih amah ih ukmi siter sal a tum. 2Sikhalsehla Bawipa in, 3siangpahrang Rehoboam le Judah le Benjamin hrin pawl sim dingin profet Shemaiah a tirh ih Shemaiah in, 4“Bawipa ih ṭongkam cu hiti in a si: ‘Nan unau Israel mi pawl cu do hlah uh. Nan zatein nan inn ah tlung thluh uh. Hitiih thil a cangmi cu keimah ih cantermi a si,’ a ti,” tiah a ti. Bawipa ih thupekmi cu an thlun ih Jeroboam cu do loin an ṭul sal.
Rehoboam In Khawpi A Kulh
5Rehoboam cu Jerusalem khawpi sungah a um; cule Judah le Benjamin ram sungih ummi khawpi: 6Bethlehem, Etam, Tekoa, 7Bethzur, Soko, Adullam, 8Gath, Mareshah, Zif, 9Adoraim, Lakhish, Azekah, 10Zorah, Aijalon le Hebron pawl cu ralhruang in a kulhter ciamco. 11Hi khawpi pawl cu fekzetin a kulhter ih khawtin ah hotu bawi a ret. Cule khua kipah rawl, olif hriak, sabitti, 12ralphaw le feipi pawl a ret ih cuticun Judah ram le Benjamin ram cu feltein a uk.
Puithiam Le Levi Mi An Ra
13Israel ram khuazakip in puithiam pawl le Levi mi pawl cu thlanglam ah Judah ram cu an pan ciamco. 14Israel siangpahrang Jeroboam le a fapa pawl in puithiam pawl cu Bawipa ih hna an ṭuanter duh lo ruangah Levi mi pawl in an umnak le an leiram pawl cu an tlansan ih Judah ram le Jerusalem khua ah an vai. 15Jeroboam in khuavang biaknak le cawcang lem a tuahmi biaknak ah amah ih duhmi pawl puithiam a ret ih cupawl cun khuavang biaknak le milem biaknak hmunah puithiam hna an ṭuan. 16Israel hrin dangdang pawl sungin Bawipa, Israel ih Pathian biak a duh taktaktu pawl cun Levi mi pawl thawn Jerusalem ah, an pupa ih Pathian Bawipa hnenih thawinak pek duh ah an feh. 17Anmah pawl in Judah ram cu an hngetter sinsin ih kum thum sung cu Solomon fapa Rehoboam ṭhatein an bawm ih siangpahrang David le siangpahrang Solomon sanih an rak nun vekin an nung.
Rehoboam Ih Innsang
18Rehoboam in Mahalath a ṭhi. Mahalath ih pa cu David fapa Jerimoth a si ih a nu cu Eliab fanu le Jesse ih tunu Abihail a si. 19Fapa pathum an nei ih Jeush, Shemariah le Zaham an si. 20Cuih hnuah Absalom fanu Maakah a ṭhi ih fapa pali: Abijah, Attai, Ziza le Shelomith an nei. 21Rehoboam in a zate in nupi hleiriat le nusun sawmruk a nei ih fapa kul hluanriat le fanu sawmruk a nei. A nupi le a nusun hmuahhmuah lakah Maakah a duh bik a si. 22A fapa hmuahhmuah lakah Maakah ih a hrinmi Abijah a duhdawt bik ruangah amah ai-awhtu dingah a hril. 23Rehoboam in a fapa pawl cu ṭuanvo felzetin a zem ih Judah le Benjamin ramsung ralhruang kulhmi khawpi pawl ahcun a ret hai; an ei an in ding tla an duh zat in a pek ih nupi tampi a ṭhitsak hai.
Currently Selected:
2 SANSIARNAK 11: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
