1 SIANGPAHRANG 5

Solomon In Biakinn Sak A Tum

(2 San. 2.1-18)

1Ṭaiar khua Siangpahrang Hiram cu David ih rualpi ṭhazet a si. David ih ai-ah a fapa Solomon siangpahrang a cang ti a theih tikah Hiram in Solomon hnenah palai a thlah. 2Cule Solomon in Hiram hnenah hiti in thu a cah, 3“Ka pa David in Bawipa a Pathian hrangah Biakinn sak a duh naón a kiangkap ram pawl thawn an do awk ringring ruangah a sak thiam lo a si, ti cu na rak theih ciami a si. A ral pawl parih nehnak Pathian in a pek hlanah cun Bawipa ih inn saknak cu a um thiam lo. 4Asinain atu-ah cun Bawipa ka Pathian in himnak i pek ih ka ram sungah daihnak a um. Ral ka nei lo. Do i tumtu khal an um lo. 5Bawipa in ka pa David hnenah, ‘Na ai ih siangpahrang a ṭuantu na fapa in ka hrangah Biakinn a sak ding,’ tiah thu a rak kam. Atu-ah cuih biakinn cu Bawipa ka Pathian hminthannak ah sak dingin ka ruatcat zo. 6Curuangah Lebanon ih sidar thing hau dingin na milai pawl rak kuat awla, ka milai pawl thawn an ṭuantlang pei. Cule na khiah mi vekin na milai pawl ih hlawhman cu ka pe ding. Na theih vekin kei ih milai pawl cu na milai pawl bangtuk in thing hau an thiam lo a si,” a ti.

7Solomon thucah mi cu Hiram in a theih tikah a lung a awi ngaingai ih, “A makzetmi miphun uktu siangpahrang si dingah David hnenih hi bangtuk fapa fim a petu Bawipa cu tuihsun ahhin thangṭhat si ko seh,” tiah a ti. 8Cule Hiram in Solomon hnenah hiti in thu a cah, “Na thucahmi ka rak thei ih i dil bangtuk in sidar thing le far thing pawl cu ka lo pe ding. 9Ka milai pawl in thingtum cu Lebanon ihsin tifinriat ah an run tholh pei ih puum ih an tuah hnuah tifinriat kap in na duhnak hmun tiang an run fehpi ding. Cutawkah ka milai pawl in an ṭemnak hri cu an phoih pei ih na milai pawl in thingtum cu an lak ding. Cule nang in in tuahsak dingmi cu ka milai pawl hrangah tirawl in ngaihtuah sak ve pei,” tiah a ti.

10Curuangah Hiram in Solomon cu a duhmi sidar thing le farthing pawl cu a pek ih, 11Solomon in kumtin tein Hiram ih milai pawl hrangah sangvut haan thawng za le kul hluannga le olif hriak ṭha bik pung thawng kul hluan sarih le za nga a pek.

12 Bawipa in a thukammi a kimter ih Solomon cu fimnak a pek. Hiram le Solomon karlakah remnak a um ih ṭangtlang dingin lungkimnak cakhen khal an tuah.

13Siangpahrang Solomon in hna ṭuantu ah Israel ram pumpi sungin minung thawng sawmthum a lak ih, 14Adoniram cu anmah hotu ah a ret. Cuih minung pawl cu thawnghra in ṭhen thum ah a ṭhen ih ṭhen khat cu a ha a ha in Lebanon ah thla khat, inn ah thla hnih fingfing in an um. 15Cuih tlunah tlangpar ramih lungto latu dingah minung thawng sawmriat a ret ih, cuih lungto phurtu dingah minung thawng sawmsarih a ret. 16Cuih hnaṭuantu pawl a khawngtu ah minung thawngthum le zathum a ret fawn. 17Siangpahrang Solomon ih thupeknak vekin biakinn hramṭohnak lungphum hrangah sermi lungto tumpipi ṭhazet in an lak. 18Solomon milai, Hiram milai le Byblos#Byblos khuami timi hi Gebal mi ti khalin an ti. khuami pawl in biakinn saknak hrangah lungto an ser ih thing tla an salh.

Currently Selected:

1 SIANGPAHRANG 5: FCL

Highlight

Copy

Compare