1 SIANGPAHRANG 3
3
Solomon In Fimnak A Dil
(2 San. 1.3-12)
1Solomon in Izipt siangpahrang fanu a ṭhit ih cuticun Izipt siangpahrang thawn ṭantlangnak cakhen a tuah. A nupi cu a hruai ih, a siangpahrang inn, Bawipa ih Biakinn, le khawpi kulhnak phardawl a sak ṭheh hlantiang David Khawpi ah a umter. 2Bawipa ih hrangah Biakinn sak hrih lo a si ruangah, senpi pawl cu hmun dangdang biakṭheng ah thawinak an pek. 3Solomon in Bawipa cu a duhdawt ih a pa David ih daan pekmi pawl cu a thlun. Asinain biakṭheng dangdang khalah ṭilva pawl a that ih thawinak a pek vivo.
4Voikhat ah Solomon cu Gibeon ah thawinak pek dingah a feh. Ziangahtile Gibeon cu hminthang bik biakṭheng umnak a si. Cutawk ah mei-ur thawinak cu a thawng a za in a rak pek zo. 5Cuih zan cu a mangah Bawipa a hnenah a lang ih Bawipa in, “Ka lo pek dingah ziangso na duh?” tiah a sut.
6Cutikah Solomon in, “Bawipa, ka pa David na salpa, hnenah cun na duhdawtnak catbaang loin na langter ih na hmaika ah rinsantlak le ṭhazet le felzet in a nung a si. Amah na duhdawtnak cu a cat cuang loih tuihsun khalah na langter ih amah ai ah a fapa cu ram uktu ah na tuah. 7Maw Bawipa, mino ka si hrih ruangah ram uknak thu zianghman ka thei lo naón, ka pa aiah siangpahrang i cangter. 8Atu-ah na ta dingih na hrilmi na miphun, zohman ih siar cawk lomi minung lakah ka um. 9Curuangah hi na minung pawl ṭhazet le dingzet ih ka uk theinak dingah le a ṭha le a sia ka thleidan theinak dingah ka ṭulmi fimnak i pe aw. Culo ahcun hitluk a tammi na minung hi ziangtinso ka uk thei ding?” tiah a ti.
10Cumi a theih tikah Bawipa cu a lung a awi ngaingai ih, 11Solomon hnenah cun, “Nun saunak le lennak le na ral pawl thihnak dil loin, na minung pawl dingteih uk theinak ah fimnak i dil ruangah, 12na dil vekin ka lo pe ding. Fimnak le theihthiamnak ka lo pe ding ih nangmah hlanah siseh nangmah hnuah siseh nangmah vekih fimnak le theihthiamnak a neitu zohman an um lo ding. 13Na dil lomi khal ka lo pe cih ding: Na nunsung hmuahhmuah ah lennak le hminthannak na nei ding ih zovek siangpahrang hman in an lo bang lo ding. 14Cun na pa David vekih ka thu i thlun ih ka thukham le ka daan pekmi pawl na tuah a si ahcun na nunnak khal ka sauter ding a si,” tiah a ti.
15Solomon cu a hung ṭhang ih Pathian in a mangah thu a sim kha a thei. Cule Jerusalem ah a feh ih Bawipa ih Thukam Kuang hmaiah a ding ih Bawipa ih hnenah mei-ur thawinak le remnak thawinak a pek. Cuih hnuah a kuthnuai ih hnaṭuantu pawl hrangah rawl eitlangnak puai a tuah sak.
Solomon In Thuharsa A ṭhen
16Voikhat ah hlawhhlang nunau pahnih Siangpahrang Solomon hmaiah an ra thleng. 17Nunau pakhat in, “Maw siangpahrang bawipa, hi nunau nu le keimah cu inn pakhat ah kan um. Cuih innih kan um laiah cun faate ka hring ih mipa a si. 18Nau ka neih hnu ni thumnak ah anih khal in faate a hring ih mipa a si ve. Cuih inn ahcun midang zohman an um lo. Kanmah pahnih lawng kan si. 19Zan khatah a fapa te cu a nen pang ih a thi. 20Cule zan ahcun a tho ih ka ihthat sungah ka naute cu ka hnen ihsin a lak ih a ihkhun ah a ret. Cule a thimi a fapa cu ka ihkhun ah a ret. 21A thaizing zingpitah ka tho ih ka faate cu pawhte fawh ka tum tikah a thi ti kha ka hmu. Ṭhateih ka zohsal tikah a thimi cu ka faate a si lo ti kha ka thei,” a ti.
22Cutikah a dang nunau nu in, “Asilo! A nungmi hi ka faate a si ih, a thimi kha na fa a si,” tiah a ti.
A hmaisatu nunau nu in, “Si hlah ee! A thimi hi na fa a si ih a nungmi kha ka fa a si,” a ti ve.
Cuticun siangpahrang hmaiah cun an el-aw rero.
23Siangpahrang Solomon in, “Nan pahnih in a nungmi fa cu ka fa a si nan ti veve ih a thimi cu ka fa a si lo, nan ti veve,” a ti ih, 24ralnam run keng dingah thu a pek. Ralnam cu an run ken tikah, 25Solomon in, “A nungmi naute hi ṭhen hnih ah ṭhen awla, hi nunau nu pahnih hnenah ṭhen khat veve pe aw,” tiah a ti.
26Cutikah a nu ngaingai a si mi nunau nu cun, a fapa hrangih duhdawtnak a neih ruangah siangpahrang hnenah, “Maw Siangpahrang bawipa, naute cu that hram hlah aw. Hi nu hnenah pe sawn aw,” a ti.
Asinain a dang nunau nu cun, “Zohnen hmanah in pe hlah. Ṭhen hnih ahcun ṭhen aw,” tiah a ti.
27Cutikah Solomon in, “Naute cu that hlah. Pakhatnak nunau nu hnenah pe aw. A nu a si,” a ti.
28Solomon thuṭhennak cu Israel mi pawl in an theih tikah dingteih thu ṭhen thiamnak cu Pathian in a pek a si, ti an thei ih Solomon cu an upat ih an ṭihzah ngaingai.
Currently Selected:
1 SIANGPAHRANG 3: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
