1 SANSIARNAK 29
29
Biakinn Saknak Ah Laksawng
1Siangpahrang David in a rakhawmmi hmuahhmuah hnenah, “Ka fapa Solomon cu Pathian ih hrilmi a si; asinain mino a si ih thilti áąhang a si hrih lo. A hnaáąuan ding mi hi milai umnak siangpahrang inn a si lo ih Bawipa Pathian umnak ding Biakinn a si ruangah a thupi zetmi a si. 2Ka ti thei tawkin inn saknak thilri cu ka khawl zo: sui, ngun, dar, thir, thing, lungmankhung le lungvar, mawiternak ah lung phun dangdang le lungto pawl ka khawl thluh zo. 3Hi ka khawl ciami thilri pawl hlei ah Pathian Biakinn hrang ka ruah tuk ruangah, keimah hrimhrim in sui le ngun tampi ka pek. 4Biakinn phar pawl mawiternak ah le zungthiam pawl áąuan dingah sui áąha bik pawl cuai thawng sawmnga le thawnghnih, le ngun áąha bik pawl cuai thawng zakhat leng lo ka pek zo a si. 5Nan lakah zoso Bawipa ih hnenah siang zetin a pe ding?” a ti.
6Cutikah an hrin ih lubik pawl, an hrin ih hotu le upa pawl, ralkap hotu ralbawi pawl le siangpahrang thilri a kiltu le a zohtu pawl hmuahhmuah in, 7Biakinn hrangah cun an pek ciamco. An pekmi cu a zatein sui cuai thawng sawmriat le thawngriat, ngun cuai thawng za le sawmsarih le thawngruk, dar phurh thawng hleisarih, thir phurh thawng sawmkua le thawnghnih leng lo a si. 8Lungmankhung a neitu pawl in Biakinn tangka kiltu Gershom hrin Levi mi Jehiel hnenah lungmankhung an pek. 9Misenpi pawl cun lungtho zetin an pek ih cu zatzat an pek thei cu an lung a awizet. Siangpahrang David khal a lung a awi ngaingai.
David In Pathian A Thangáąhat
10David in misenpi hmaiah cun Bawipa a thangáąhat ih, “Kan pupa Jakob ih Pathian Bawipa, na hmin cu thangáąhat in um ringring seh. 11Maw Bawipa, nangmah cu cungnungbik, huham neitu, a maksak mi le sunloih bik le a sang bik siangpahrang na si. Lei le van ih thil ummi hmuahhmuah na ta an si ih ziang hmuahhmuah ih tlunah siangpahrang le uktu bawi bik na si. 12Thilri neihnak le lennak hmuahhmuah na hnen ihsin a rami an si; na cahnak le na huham thawn ziangzongza na uk áąheh; na duh ahcun zohnen khalah thil titheinak le cahnak pe theitu na si. 13Atu-ah kan Pathian, kan lungawinak kan lo sim ih na hmin sunglawi kan thangáąhat.
14“Asinain ka minung pawl le kei hi zianghman kan si lo; kan lo pek taktak thei mi zianghman a um lo; ziangahtile kan neihmi hmuahhmuah cu nangmah ih in pekmi laksawng an si áąheh ih na ta a si ciami kan lo pek salmi lawng an si. 15Maw Bawipa, nangmah ih in theih vekin, kan pu le kan pa bangtuk in nunnak lamzin ahhin ralkaihmi le mikhual vekih a vakvaimi kan si. Kan damsung caan hi a hlosalmi phenthla vek a si ih thihnak in luat dingah ruahsannak kan nei lo. 16Maw Bawipa kan Pathian, na hmin thianghlim cawimawinak ah hi thilri hmuahhmuah cu kan khawl zo; sikhalsehla na hnenih sin a rami lawnglawng an si ih a zatein na ta an si áąheh. 17Mi thinlung cu na hniksak ih thinlung tluang a neimi parah na lung a awi, ti ka thei. Thinlung tluangzet le thinlung taktein hi thil hmuahhmuah hi ka lo pek ih hitawk ih a rami pawl khal in lungawi aipuangte in na hnenah an lo pek, ti ka hmu zo. 18Bawipa, kan pupa Abraham, Isaak le Jakob ih Pathian, cubangtuk pek duhnak thinlung cu na minung pawl ih lung sungah kumkhua in run cakter awla, na hrangah rintlak minung si dingin run kilkhawi hai aw. 19Na daan le na thupekmi hmuahhmuah a thlun theinak dingah le a thilri tla ka khawl thluh zo mi Biakinn cu a saksuak theinak dingah ka fapa Solomon hi ruahnak áąha le thinlung famkim run pe hram aw,” tiah a ti.
20Cule David in misenpi cu: “Bawipa nan Pathian cu thangáąhat uh,” a ti hai ih misenpi pawl cun Bawipa, an pupa ih Pathian cu an thangáąhat. An lu an kun, leilungah an bok ih Bawipa Pathian le an siangpahrang hnenah upatnak an pek.
21A thaisun ah rannung an that ih Bawipa ih hnenah thawinak le mei-ur thawinak pawl an pek. Cawcang thawng khat, tuucang thawng khat le tunote thawng khat an that ih Israel misenpi hrang inmi thawinak sabit an pek ih thawinak dang tla tampi tla an pek. 22Bawipa ih hmaiah cun an in an ei ih lungawizet in cuih ni cu an hmang.
Cule David fapa Solomon cu siangpahrang ah a voihnihnak an tuah. Bawipa ih hmin in an siangpahrang ah hriak an culh ih Zadok khal puithiam ah an culh ve. 23Cuticun Bawipa ih a hngehtermi siangpahrang tokham ahcun a pa David ih aiah Solomon cu an toter a si. Siangpahrang hna cu hlawhtlingzet in a áąuansuak ih Israel misenpi in a thu an ngai. 24Bawi le upa hmuahhmuah le ralkap pawl le David fapa dangdang pawl tla in Solomon cu an siangpahrang dingah upatnak thukam an pek. 25Solomon cu an ram pumpi in an áąihzah ih Israel ram a uktu siangpahrang hmuahhmuah lakah sunloih bikmi siangpahrang ah Bawipa in a tuah.
David Uknak A Tawi Zawngin
26Jesse ih fapa David in Israel ram pumpi cu, 27kum sawmli sung a uk. Hebron khua in kum sarih sung a uk ih Jerusalem khua ihsin kum sawmthum le kum thum sung a uk. 28Mi lianzet le mi ih upat zetmi si in tarzet in a thi ih a fapa Solomon in a ai a run awh. 29Siangpahrang David ih thuanthu cu a hramthokin a cem net tiang profet pathum Samuel, Nathan le Gad ih thuanthu khumnak sungah kimten an ngan. 30Ram a uk daan, huham a neihzia, a parih a ra thlengmi thuhla pawl le Israel le an kiangkap ram pawl hnenih a cangmi thuhla pawl tla kimten an ngan a si.
Currently Selected:
1 SANSIARNAK 29: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.