1 SANSIARNAK 13

Thukam Kuang Kiriath Jearim In An ṭhawn

(2 Sam 6.1-11)

1David cu a ralkap thawngkhat hotu le zakhat hotu ralbawi pawl thawn an tongkhawm aw. 2Cule cutawkih a ratu Israel mi pawl hnenah cun, “Nannih nan lung a kim ih Bawipa kan Pathian tla a lung a kim a si ahcun kan ramsung minung pawl, puithiam le Levi mi pawl hnenah mi kan thlah pei ih kanmah hnenih ra pumkhawm ve dingah kan sim pei. 3Cun kan feh pei ih Saul siangpahrang a si lai ih thlauthlakmi Pathian ih Thukam Kuang cu kan lak pei,” tiah a than. 4A thupol mi cu an lung a kim ih an lung tla a awi ngaingai.

5Cuticun David hnenah Israel mi pawl cu thlanglam ah Izipt ramri in le saklam ah Hamath Tlangkawn ih a ummi tiangin an ra. Kiriath Jearim khawpi ihsin Thukam Kuang la dingin an rakhawm ṭheh. 6Cule David le Israel mi pawl cu Judah ram Kiriath Jearim khawpi, (a si lole Baalah khawpi timi) ahcun Cherubim tlun, sunlawinak hmunih a totu Bawipa in hmin a kengtu Thukam Kuang cu lak dingah an feh. 7Abinadab inn an thlen tikah Thukam Kuang cu an lak ih cawleng thar parah an ret. Uzzah le Ahio in cawleng cu an khor ih, 8David le Israel misenpi pawl cu Pathian thangṭhat in an tha neih patawp in an laam ciamco. Hla an sak ih ṭingṭang, khuang, dar sumsel le tawtawrawt an tum.

9Khidon an timi hmunih fang ciilnak puum an thlen tikah cawcang pawl cu an bah ih curuangah Uzzah in a hei dawh ih Thukam Kuang cu a hei dom. 10Hmakhatte-ah Bawipa cu Uzzah parah a thin a heng ih Thukam Kuang a tham ruangah a that. Cutawk Bawipa ih hmai ahcun a thi. 11Cutiih Uzzah parah Bawipa a thin a heng ruangah David cu a thin a heng ngaingai. Curuangah cuih hmun cu Perez Uzzah#13.11 Perez Uzzah: ti cu Uzzah Hremnak hmun tican a si. tiah an tita.

12Cule David in Pathian cu a ṭih ngaingai ih, “Hi Thukam Kuang cu ziangtinso atu ahcun ka fehpi ngam ding?” a ti. 13Curuangah David in Thukam Kuang cu Jerusalem ah a fehpi lo. Gath khuami pa Obed Edom an timi pa inn ah a taanta. 14Cutawkah cun thla thum a um ih Bawipa in a innsang le a neihmi hmuahhmuah cu thluasuah a pek.

Currently Selected:

1 SANSIARNAK 13: FCL

Highlight

Copy

Compare