1 SANSIARNAK 11
11
David Cu Judah Le Israel Siangpahrang A Cang
(2 Sam 5.1-10)
1Israel mi pawl cu an zatein David umnak Hebron ah an ra ih, “Kannih cu na thii le na sa kan si. 2A fehzo mi tikcu caan, Saul kan siangpahrang a si lai hmanah Israel mi pawl cu raldonak ah na hruai ih cutiih hruai dingah le anmah uktu si dingah Bawipa na Pathian in thu a lo tiam zo a si,” tiah an ti. 3Cuticun David hnenah Israel mi hotu pawl cu Hebron ahcun an ra ṭheh. Cule Bawipa ih mithmuh ah David thawn thukamnak an tuah ih Samuel hnenin Bawipa ih thutiam vekin David cu Israel siangpahrang ah hriak an culh a si.
4Cun siangpahrang David le Israel mi pawl cu an zatein an feh ih Jerusalem khawpi an do. Jerusalem khawpi cu culai ahcun Jebus an ti; a rak um hmaisa bik Jebus mi pawl cu cutawkah an um lai. 5Jebus mi pawl in David cu, “Kan khawpi sungah cun na lut thei dah lo ding,” an ti. Asinain Zion ih an ralhruang cu David in a lak ih an khawpi cu “David Khawpi,” ah a cang. 6David in, “Jebus mi a that hmaisa biktu cu ka ralkap hotu bawi a si ding,” a ti. Zeruiah fapa Joab ho in an do ih amah cu ralkap hotu bawi ah a cang ngaingai. 7Ralhruang sungah David cu a feh ih a umta ruangah, “David Khawpi,” tiah an ko tata. 8Cuih ralhruang ih nisuahnak lam Millo an tinak hmunih thokin khawpi kimvel ralhruang cu David in a rem ih khawpi sung cu Joab in a rem. 9A hnenih Ziangkimtithei Bawipa a um ruangah David cu ni khat hnu ni khat a cak deuhdeuh.
David Ih Ralkap Hminthang Pawl
(2 Sam 23.8-39)
10David ih ralkap hminthang pawl cu a tanglam pawl hi an si. Anmah in Israel midang pawl thawn siangpahrang cang dingah David cu an bawm ih, Bawipa ih thutiam vekin, a uknak cu cak sinsin in an tuah.
11Hmaisa bik cu Hakmon hrin Jashobeam a si ih amah cu, “Ralṭha Pathum,”#11.11 Ralṭha Pathum: 2 Sam 23.8 tla ah Ralṭha Pathum ti in a um. Asinain Hebru Ca Thianghlim sung ahcun Sawmthum ti in a um. lakah hotu a si. Jashobeam in an ral minung zathum kha a feipi thawn a do ih ṭum khatah an zatein a that ṭheh. 12Hi “Ralṭha Pathum Pawl,” lakih a pahnihnak cu Ahoh hrin Dodo ih fapa Eleazar a si. 13Pas Dammim an timi hmunah Filistin ral pawl cu David thawn an do. Barli sangvut lo sungah ṭanhmun khuar ih Israel ralkap pawl an tlan rero laiah, 14Eleazar le a ralkap pawl cu lo sungah cun an ṭang ih Filistin pawl cu an do ciamco. Bawipa ih thawngin an ral cu nasa zetin an neh.
15Voikhat ah Filistin ral pawl cu Refaim phairawn ih an um laiah, an hmin a thang zetmi Israel ralbawi sawmthum sungin pathum cu Adullam lungpuk kiang lungto lakih David a um laiah a hnenah an feh. 16David cu ralhruang kulhmi tlang parah a um ih culaiah Bethlehem cu Filistin mi pawl in an lak zo. 17Cutikah David cu inn a ngai ngaingai ih, “Aw, Bethlehem kotka kiang tikhur ih tidai kha in dingah pakhatkhatión i pe hai sehla ka va duh so e!” tiah a ti. 18Curuangah ralkap hminthang pathum cu an feh ih Filistin ralkap pawl umnak lakin an nor suak ih cuih tikhur ihsin tidai an khai ih David cu an ra pek. Sikhalsehla David cun a in lo; Bawipa hnenih hlanmi tidai ah tiah a thlet ih, 19“Ziangtin so hi tidai cu ka in thei ding! An nunnak hman ruat loih an khaimi tidai a si hrangah hi tidai in cu an thisen in vek a si ding,” a ti. Curuangah cuih tidai cu a in lo. Ralkap hminthang Pathum Pawl ih hnaṭuan ṭha pawl lakah himi cu pakhat a si.
20Cun Joab unau Abishai cu “Hminthang Sawmthum Pawl,” lakah mi hminthang a si. A feipi thawn minung zathum a do ih a that ṭheh. Cutiin hminthang sawmthum lakah hminthang a si. 21Sawmthum Pawl lakih hminthang bik a si ruangah an hotu ah a cang; asinain “Ralṭha Pathum,” tluk cun a hmin a thang lo.
22Kabzeel khua mi Jehoiada fapa Benaiah cu ralkap hminthang zet a si. Ralṭha zet ih a hnaṭuan mi tampi a um; Moab ralbawi cak zetzet pahnih tla a that. Voikhat cu vur tampi a tlak ni ah kuahrum sungah a vung ṭum ih kiosa a that. 23Cule mitum zet le misaang zet: pi sarih le a hrek a saangih feipi thiamtleeng tia a kengtu Izipt mipa khal a that. Behaiah cun talhtum thawn a zon ih Izipt pa kutih feipi rori long tahrat in cupa thahnak ah a hmang. 24Cumi pawl cu Benaiah ralṭha zet ih hnaṭuannak pawl an si; amah cu, “Sawmthum Pawl,” lakah pakhat a si ve. 25“Sawmthum Pawl,” lakah cun hminthang pakhat a si; asinain “Pathum Pawl,” cu a tluk lo. David in amah kilvengtu pawl hotu ah a ret.
26-47A tanglam pawl hi ralkap hminthang an si:
Joab unau Asahel
Bethlehem ihsin Dodo ih fapa Elhanan
Harod ihsin Shammoth
Pelet ihsin Helez
Tekoa ihsin Ikkesh ih fapa Ira
Anathoth ihsin Abiezer
Hushah ihsin Sibbekai
Ahoh ihsin Ilai
Netofah ihsin Maharai
Netofah ihsin Baanah ih fapa Heled
Benjamin ram Gibeah ihsin Ribai ih fapa Ithai
Pirathon ihsin Benaiah
Gaash kiang hmunrawn ihsin Hurai
Arbah ihsin Abiel
Bahurum ihsin Azmaveth
Shaalbon ihsin Eliahba
Gizon ihsin Hashem
Harar ihsin Shagee ih fapa Jonathan
Harar ihsin Sakhar ih fapa Ahiam
Ur ih fapa Elifal
Mekherah ihsin Hefer
Pelon ihsin Ahijah
Karmel ihsin Hezro
Ezbai ih fapa Naarai
Nathan unau Joel
Hagrit ih fapa Mibhar
Ammon ihsin Zelek
Beeroth ihsin Naharai. Naharai cu Joab hriamnam phurtu a si.
Jattir ihsin Ira le Gareb
Hit mi Uriah
Ahlai ih fapa Zabad
Shiza ih fapa Adina. Adina cu Reuben hrin sungah hminthang a si ih ralkap sawmthum a neitu a si.
Maakah ih fapa Hanan
Mithan ihsin Joshafat
Ashterah ihsin Uzzia
Aroer ihsin Hotham ih fapa Shamma le Jeiel
Tiz ihsin Shimri ih fapa Jediael le Joha
Mahavah ihsin Eliel
Elnaam ih fapa Jeribai le Joshaviah
Moab ihsin Ithmah
Zobah ihsin Eliel, Obed le Jaasiel.
Currently Selected:
1 SANSIARNAK 11: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
