Romanji 11
11
Armãsãtura dit Israel
1Mini ntreb: Nacã Dumnidzãlu alipidã populu a lui? Pute s-nu hibã! Cã sh-mini escu Israelit dit fara al Abraham sh-dit soia al Beniamin. 2Dumnidzãlu nu alipidã populu a lui, cai lu cunuscu di ma nãinti. Nu shtits tsi dzãtsi Scritura trã Elia cãndu s-plãndzi a Dumnidzãlui contra a Israelui? 3“Doamne, prufitsilji a tãlji lji vãtãmarã sh-altarili a tali li asparsirã sh-mini armash singur sh-elji ma caftu bana a mea!” 4Ma tsi lji apãndisi Dumnidzãlu a lui? “Alãsai trã mini shapti njilji di bãrbats cai nu si dzinucljiarã al Baal.”
5Ashã sh-tu chirolu di tora ari armasã putsãnã dupã alidzearea prit har. 6Sh-macã easti prit har, nu easti ma prit fapti, altã soi harul nu va eara har. 7Tsi atumtsea? Atsea tsi Israelu u cãfta, nu u agiumsi, ma aleptsilji u agiumsirã, iarã alantsãlji s-nchitrirã, 8ashã cum easti scriatã: “Dumnidzãlu lã deadi a lor un duh di amurtsãri, oclji tra s-nu veadã, sh-ureclji tra s-nu avdã, pãnã tu dzua di azã.” 9Sh-Davidul dzãtsi: “Measa a lor si s-facã cearcu, lats, nchidicari sh-un arãsplãtiri trã nãshi. 10Ocljilji a lor si scutidiseascã tra s-nu veadã shi plãtãrili a lor s-hibã nduplicati di totãna.”
Dedzili Ambuljisiti
11Trã atsea ntreb: Nacã s-nchidicarã, trã cãdeari? Pute s-nu hibã! Ma prit cãdearea a lor, lã vini ascãparea a pãngãnjilor tra si zilipseascã Israelitslji. 12Tora, macã cãdearea a lor easti aveari trã lumea sh-chirearea a lor easti aveari trã pãngãnjlji, cãt ma multu va hibã mplinãtatea a lor!
13Tora ma vã dzãc a voauã, a pãngãnjilor, cã pãn-cãt mini escu apostul a pãngãnjilor, u alavdu huzmitipsirea a mea, 14cu nãdii s-facã zilichear atselji cai suntu fara a mea shi s-ascapã niscãntsã di elji. 15Cã macã arnipsirea a lor adusi puituirea a lumiljei, tsi va hibã apruchearea a lor, nafoarã dicãt banã dit mortsã!? 16Sh-macã pãna di prota cai lji si da a Dumnidzãlui easti sãmtã, atumtsea tut aloatlu easti sãmtã, sh-macã arãdãtsina easti sãmtã, sh-dedzili suntu sãmti.
17Tora, macã niscãnti dedzi s-arupsirã sh-tini hinda agru-masini, ti ambuljisish tu eali sh-ti fãtsesh pãrtash cu arãdãtsinili, va s-dzãcã cu grãsimea a masnilui. 18Trã atsea, nu ti alavdã contra a dedzilor, cã macã ti alavdzã contra a lor, adu aminti cã nu u tsãnji tini arãdãtsina ma arãdãtsina ti tsãni tini. 19Tini va dzãts atumtsea: “Dedzili s-arupsirã tra s-mi ambuljisescu mini.” 20Ghini! Atseali s-arupsirã trã itia a nipistiljei, iarã tini stai trã itia a pistiljei. Nu ti pirifãnsea, ma s-ai fricã. 21Macã Dumnidzãlu nu li njilui dedzili naturali, nu va ti njilueascã sh-tini. 22Trã atsea vedz bunãtatea sh-asprimea al Dumnidzãu, di unã parti, asprimea cãtrã atselji cai cãdzurã, di alantã parti bunãtatea al Dumnidzãu cãtrã tini, ma s-armãnji tu bunãtatea a lui, altã soi sh-tini va ti talji. 23Ma sh-elji, macã nu va armãnã tu nipistipsiri, va s-hibã ambuljisits, cã Dumnidzãlu easti putut s-lji ambuljiseascã nãpoi. 24Cã, macã tini ti tãljeash di atsel tsi di natura easti agru-masini sh-ti ambuljisish contra a naturãljei tu imir-masini, ahãntu ma multu aeshti cai suntu dedzi di natura, va si ambuljiseascã tu masnili a lor.
Tut Israelu Va Ascapã
25Cã, nu voi frats sh-surãri, tsi voi s-hits nishtiuts ti aestu mistiryiu tra s-nu vã tsãnets ca mintimenji: cã tu unã parti di Israel s-fatsi unã nchitriri, pãnã cãndu s-aibã intratã mplinãtatea a pãngãnjilor. 26Sh-ashãtsi tut Israelu va s-ascapã. Cum easti scriatã:
“Ascãpãtorlu va yinã dit Sion,
elu va dipãrteadzã nidumnidzisirea di la Iacovu.
27Sh-aestã easti pisti-ligãtura a mea cu elji,
cãndu mini s-mut amãrtiili a lor.”
28Di unã parti, cãndu easti zborlu di evanghelu elji suntu dushmanji trã hãtãrea a voastrã, ma cãndu easti zborlu di alidzeari, elji suntu vruts trã hãtãrea a pãrintsãlor. 29Cã doarili sh-acljimarea a Dumnidzãlui suntu niturnati. 30Ashã di cum voi ma nãinti nu avets ascultat Dumnidzãlu, ma tora vã njiluit trã itia a niascultariljei a lor, 31ashãtsi sh-aeshti tora nu ascultarã, cu nãeti tsi, trã itia a njiluiriljei cãtrã voi, sh-elji s-hibã njiluits. 32Cã Dumnidzãlu lji ncljisi tuts tu niascultari, cu nãeti tsi s-lji njilueascã tuts.
Himnul a Alãvdariljei
33O ahãndami a aveariljei, a frunimeatsiljei sh-a shtiriljei al Dumnidzãu! Cãt di nipitrumti suntu giudicãtsili a lui sh-cãt di niurmãsiti suntu cãljurili a lui. 34Cã cai u cunuscu mintea a Domnului? Icã cai s-featsi urnipsitorlu a lui? 35Cai lji deadi ma nãinti a lui sh-Dumnidzãlu s-lji da arãsplata? 36Cã di la nãsu sh-prit nãsu, sh-trã nãsu suntu tuti. A lui s-lji hibã mãrirea tu eta a etilor! Amin!
