Apocalipsa 4
4
Viziunea a Thronlui tu Tser
1Dupã aesti, ia, mini mutrii unã poartã discljisã tu tser sh-boatsea atsea di prota ca trumpetã cai avdzãi si zbura cu mini, dzãcãnda: “Alinã-ti aoa sh-va ts-aspun atseali tsi prindi s-undzeascã dupã aesti.” 2Trãoarã mi aflai tu Duh sh-ia, un thron eara tu tser sh-un cai shidea apunat pri nãsu. 3Atsel cai shidea apunat undzea ca unã cheatrã di iaspu sh-sardiu, sh-un curcubeu anvãrliga di thron, tsi lji undzea a smeraldului. 4Anvãrliga di thron eara patrusprãyinghits di thronuri, sh-pri thronuri eara apunats patrusprãyinghits di aushi nviscuts cu stranji albi sh-cu curunji di furii pristi cap. 5Dit thron ishea sfulguri, botsi sh-bumbunidzãri. Nãintea a thronlui eara shapti shindãnji di foc apreasi, cai suntu shapti duhurili al Dumnidzãu.#Isa 11:2. 6Nãintea a thronlui eara unã ca amari di yilii tsi lji undzea al cristalu.
Tu mesea a thronlui sh-dianvãrliga a lui eara patru fãpturi yii, tsi eara mplini di oclji dinãinti sh-dinãpoi. 7Fãptura atsea di prota undzea ca ljundarlu, fãptura atsea a doaua undzea ca yitselu, fãptura atsea a treia avea fatsa ca a omlui, fãptura atsea a patrua undzea ca vulturlu cai azboairã. 8Di patru fãpturili atseali yii avea cathiunã cãti shasi arichi sh-anvãrliga sh-di nãuntru eara mplini di oclji, sh-nu pãpsea pute dzua sh-noaptea dzãcãnda:
“Sãmtu, Sãmtu, Sãmtu easti Domnul,
Dumnidzãlu, atsel Tutãpututul, atsel tsi eara, atsel tsi easti sh-atsel tsi yini.”
9Di multi ori fãpturili atseali yii lji dãdea mãriri, tinjii sh-hãristisiri atsilui cai easti apunat tu thron cai bãneadzã tu eta a etilor. 10Atselji patrusprãyinghitslji di aushi cãdea pri-dintsã nãintea atsilui tsi eara apunat pri thron, shi si ncljina atsilui tsi bãneadzã tu eta a etilor, sh-li arca curunjili a lor nãintea a thronlui, dzãcãnda:
11“Axiu eshti, Doamne sh-Dumnidzãlu a nostru,
s-ljeai mãrirea, tinjia sh-fuchia,
cã tini li adrash tuti lucrili,
sh-trã vrearea a ta eara sh-suntu adrati!”
Currently Selected:
Apocalipsa 4: BLRR
Highlight
Copy
Compare
Share
Want to have your highlights saved across all your devices? Sign up or sign in
