Apocalipsa 22
22
Arãulu sh-Pomlu a Banãljei
1Deapoea anghilu nji spusi arãulu atsel alimtu di apa a bãnãljei, cai strãlutsea ca cristalu sh-izvurlu dit thronlu al Dumnidzãu sh-a Njelui. 2Tu mesea a padãljei a cãsãbãlui dit doauli pãrtsãli a arãului, eara pomlu a bãnãljei cai da doisprãdzatsi di fruti, cathi mesu cãtã un frut, sh-frãndzãli a pomlui suntu ti vindicarea a natsiunilor. 3Nu va s-aibã ma nitsiun blãstem. Tu cãsãbã va s-hibã thronlu al Dumnidzãu sh-a Njelui, sh-huzmichearlji a lui va s-lji huzmitipseascã. 4Elji va s-veadã fatsa a lui, sh-numa a lui va s-hibã pri frãmtili a lor. 5Noapti nu va s-aibã ma sh-nu va s-aibã ananghi di lunjina a lambadãljei, sh-nitsi di lunjina a soarilui, cã Domnul Dumnidzãlu va li lunjineadzã sh-va s-domneascã tu eta a etilor.
Prihãbãrsirea di Soni
6Deapoea anghilu nji dzãsi: “Aesti zboari suntu pistipsiti sh-alihioasi. Domnul, Dumnidzãlu tsi lã da Duhlu a prufitsilor,#22:6 Icã “Dumnidzãlu a duhurilor a prufitsilor”. pitricu anghilu a lui tra s-lã aspunã a huzmichearilor a lui atseali tsi va s-undzeascã tora-curundu.”
7“Ia, mini ma yin curundu.
Ca hara di atsel tsi veaglji zboarili a prufitsiiljei a cartiljei aishtei.”
8Mini, Ioanul, escu atsel cai li avdzãi sh-li vidzui aesti lucri. Dupã tsi li avdzãi sh-li vidzui, cãdzui pri dintsã tra s-mi ncljin nãintea a cicioarilor a anghilui tsi nji-li spunea aesti lucri. 9Sh-elu nji dzãsi: “Vedz, s-nu u fatsi aestã! Cã mini escu huzmichear ca tini sh-ca fratslji a tãlji prufits sh-atsilor tsi li tsãn zboarili a cartiljei aishtei. Ncljinã-ti mash a Dumnidzãlui!” 10Deapoea nji dzãsi: “Nu vulusea zboarãli a prufitsiiljei a cartiljei aishtei, cã chirolu easti aproapi. 11Nindreptul s-facã ninga nindriptati, pãnĝãnitulu si s-pãnĝãneascã ninga, ndreptul s-facã ninga ndriptati shi sãmtul si sãmtseascã ninga.”
12“Ia, mini yin trãoarã
sh-plata a mea easti cu mini,
tra s-lji da a cathiunui dupã faptili a lui.
13Mini escu Alfa sh-Omega,
atsel dit prota sh-atsel dit soni,
Apãrnjita sh-Bitisita.”
14Ca hara di atselji tsi aspealã stranjili a lor, cã va s-aibã ndreptul s-mãcã dit pomlu a banãljei shi s-intrã tu poarta a cãsãbãlui. 15Nafoarã suntu cãnjilji, mãghipsitorilji, putãnjsitorlji, vãtãmãtorlji, iduljitorlji sh-caitsido tsi va sh-ufiliseashti arãdearea.
16“Mini, Isusul, pitricui anghilu a meu tra s-vã mãrtirseascã aesti lucri trã biseritsli. Mini escu arãdãtsina sh-fara al David, steaua atsea lutsita a dimineatsãljei.” 17Duhlu sh-Nveasta dzãc: “Haidi!” Atsel tsi avdi prindi s-dzãcã: “Haidi!” Cai ari seati, s-yinã, sh-atsel tsi va, s-ljea ca doarã apa a bãnãljei.
18Mini ma vã mãrtirsescu a tuts atsilor cai ascultã zboarili a prufitsiiljei a cartãljei aishtei: macã vãrã va s-adavgã tsiva atsilor, Dumnidzãlu va s-adavgã pri elji pledzili scriati tu aestã carti. 19Atsilui tsi va scoatã tsiva dit zboarili a cartãljei aishtei prufitsii, Dumnidzãlu nu va lji da partea a lui dit pomlu a banãljei, dit Cãsãbãlu atsel Sãmtu, tsi suntu scriati tu aestã carti.
20Atsel tsi mãrtirseashti trã aesti dzãtsi: “Ie, mini yin trãoarã.” Amin. Haidi, Doamne Isus! 21Harul a Domnului Isus s-hibã cu voi tuts! Amin!
Currently Selected:
Apocalipsa 22: BLRR
Highlight
Copy
Compare
Share
Want to have your highlights saved across all your devices? Sign up or sign in
