Apocalipsa 20
20
Amirãrilja di Unã Njilji di Anji
1Deapoea vidzui un anghil tsi dipuna dit tser. Elu avea cljeaia a Ahãndamiljei sh-un singir mari tu mãna a lui. 2Elu u acãtsã lamnja, nãpãrtica atsea veacljea tsi easti draclu shi Satanlu, sh-u ligã di unã njilji di anji. 3U-arcã tu Ahãndami, u ncljisi sh-u vulusi tra s-nu arãdea ma natsiunili, pãnã cãndu s-treacã unã njilji di anji. Ma napoea elu prindi si s-dizleagã di putsãn chiro.
4Deapoea vidzui thronuri pristi iu shidzurã atselji a cui si deadi autoritatea s-facã giudicata. Deapoea vidzui suflitli a lor tsi lã si eara tãljeat capitli trã itia a mãririljei al Isus sh-trã zborlu a Dumnidzãlui tsi nu si eara ncljinatã a agrimiljei sh-a icoanãljei a ljei sh-nu avea loatã vulã pri frãmti sh-pri mãna a lor. Elji s-turnarã tu banã sh-domnirã cu Hristolu trã unã njilji di anji. 5Alantsã mortsã nu s-turnarã tu banã pãnã cãndu si mplinirã unã njilji di anji. Aestã easti nyearea di prota. 6Ghinicuvintat sh-sãmtu easti atsel cai ari parti tu nyearea di prota. Pristi elji, moartea a doaua nu ari puteari, ma va s-hibã preftsãlji a Dumnidzãlui sh-a Hristolui sh-va s-domneascã cu elu di unã njilji di anji.
Giudicarea al Satan
7Cãndu si mplineascã unã njilji di anji, Satanlu va si s-dizleagã dit hapsi, 8sh-va s-easã s-arãdã fãrili di patru pãrtsãli a loclui, Gogul sh-Magogul, tsi s-li adunã la alumtã. Numirlu a lor va s-hibã ca arina a amariljei. 9Elji s-alinarã pri tuti pãrtsãli a loclui shi anvãrligarã pada a popului sãmtu a Dumnidzãlui sh-cãsãbãlu atsel vrutlu. Deapoea dit tser dipunã foc sh-lji afãnisi. 10Atumtsea draclu tsi lã-arãdea, s-arcã tu laclu di foc sh-di schifurã, iu eara agrimea sh-prufitlu atsel arãdios. Aclo va s-mundueascã dzua sh-noaptea tu eta a etilor.
Giudicari Nãintea a Thronlui Albu Atsel Marli
11Deapoea vidzui un thron mari, albu sh-atsel cai shidea pri nãsu, dit fatsa a cui s-afãnisirã loclu sh-tserlu sh-nu s-aflã ma loc ti elji. 12Vidzui sh-mortsãlji, njitsi sh-mãri, tsi stãtea nãintea a thronlui. Atumtsea cãrtsili s-discljisirã. S-discljisi sh-unã altã carti cai easti cartea a banãljei. Mortsãlji s-giudicarã dupã atseali tsi eara scriati tu cãrtsi, dupã faptili a lor. 13Amarea lji deadi mortsãlji tsi eara tu nãsã. Moartea sh-Colasea lji deadirã mortsãlji tsi eara cu nãshi. Cathiunu s-giudicã dupã faptili a lui. 14Deapoea moartea sh-Colasea s-arcarã tu laclu a foclui. Aestã easti moartea a doaua, laclu a foclui. 15Sh-macã vãrã nu s-aflã scriat tu cartea a banãljei, s-arcã tu laclu a foclui.
Currently Selected:
Apocalipsa 20: BLRR
Highlight
Copy
Compare
Share
Want to have your highlights saved across all your devices? Sign up or sign in
