Apocalipsa 1
1
Ahurhirea
1Discupirirea al Isus Hristos, tsi Dumnidzãlu lji-u deadi tra s-lã spunã a huzmichearilor a lui lucrili tsi va undzeascã curundu, aestã u-featsi shtiut cu pitritsearea a anghilui a lui a huzmichearlui a lui Ioan.#Dan 2:28-29,45. 2Ioanul mãrtirisi zborlu al Dumnidzãu sh-mãrtiria al Isus Hristos sh-tuti cãti vidzu. 3Cahara di atsel cai cãntã sh-atselji cai ascultã zborlu a prufitsiiljei sh-veaglji atseali tsi suntu scriati tu nãsã, cã chirolu ma aproachi!
Salutãri sh-Mãriri
4Ioanul, lã scrii a shapti biseritslor tu Asia: Har pristi voi sh-pace di la atsel tsi easti, tsi eara sh-atsel cai yini sh-di la shapti duhurili, cai suntu nãintea a thronlui a lu, 5sh-di la Isus Hristolu, martir pistimen, protlu-amintat dit mortsã sh-caplu a amiradzlor a loclui. Elu nã vru sh-nã featsi liberi di amãrtiili a noastri cu sãndzili a lui, 6sh-nã featsi amirãrilji sh-preftsã trã Dumnidzãlu sh-Tatãl a lui. A lui s-lji hibã mãrirea sh-putearea tu eta a etilor! Amin!#Ex 19:6; Isa 61:6; 1 Pet 2:5,9.
7“Ia, elu ma yini cu niori
sh-cathi ocljiu va l-veadã,
sh-ma multu atselji tsi lu ntsãparã,
sh-tuti soili a loclui va plãngã trã itia a lui.”#Dan 7:13; Mat 24:30.
Ie, Amin!
8“Mini escu Alfa sh-Omega,” dzãtsi Domnul, Dumnidzãlu, “atsel tsi easti, tsi eara, sh-tsi yini, Tut-pututlu.”
Viziunea al Ioan trã Hristolu
9Mini, Ioanul, fratili a vostru shi pãrtash tu munduiri, la amirãriljea sh-tu arãvdarea al Isus, fui tu insula tsi s-acljeamã Patmos trã itia a zborlui al Dumnidzãu sh-trã itia a mãririljei al Isus. 10Tu dzua a Domnului fui arãchit tu Duh sh-avdzãi dupã mini unã boatsi analtã ca unã trumpetã, 11cai dzãtsea: “Atsea tsi vedz scrii tu unã carti sh-pitreats-u a shapti biseritslor: tu Efes, tu Smirna, tu Pergam, tu Tiatira, tu Sarda, tu Filadelfia sh-tu Laoditsea.” 12Mini mi turnai s-ved a cui eara boatsea cai zbura cu mini. Sh-cãndu mi turnai, vidzui shapti shindãnji di furii 13sh-tu mesea a shindãnjilor, un tsi undzea ca Hiljiu a Omlui, nviscut cu un stranjiu lungu pãnã la cicioari sh-anvãrligat cu un brãn di furii tu cheptu.#Dan 7:13; 10:5; Ezc 9:2. 14Caplu sh-perlu a lui eara albã ca lãna icã-ca neaua sh-ocljilji a lui ca fleaca a foclui.#Dan 7:9. 15Cicioarili a lui undzea ca bãcãrã curat sh-arushãt ca dit cireap sh-boatsea a lui ca vãzirea a apilor atseali multi. 16Tu mãna a lui atsea ndreapta avea shapti steali sh-dit gura a lui ishea unã spatã struxitã cu doauã tãljituri, sh-fatsa a lui lunjina ca soarili cu tut fuchia a lui.#Apo 1:20; 2:1; Isa 49:2. 17Cãndu lu vidzui, cãdzui la cicioarili a lui ca mortu. Atumtsea elu bãgã mãna a lui atsea ndreapta pristi mini sh-dzãsi: “Nu ti aspari! Mini escu atsel di prota sh-atsel di soni. 18Mini escu atsel yiu! Earam mortu, ma ia, tora escu yiu tu eta a etilor, sh-mini li am cljeili a moartiljei sh-a Colasiljei. 19Trã atsea, scrii-li atseali tsi vidzush, atseali tsi suntu sh-atseali tsi va si s-facã dupã aesti,#Isa 48:6; 2:1. 20mistiryiul atsilor shapti steali, tsi vidzush tu nandreapta a mea, sh-atsilor shapti shindãnji di furii. Atseali shapti steali suntu anghilji atsilor shapti biseritsi, sh-atseali shapti shindãnji tsi vidzush suntu shapti biseritsli.”#Apo 1:16; 2:1; 3:1.
Currently Selected:
Apocalipsa 1: BLRR
Highlight
Copy
Compare
Share
Want to have your highlights saved across all your devices? Sign up or sign in
