Mateu 8

Vindicarea a Leproslui.

1Tora cãndu Isusul dipunã dit munti, multsãnji mãri lu urma. 2Sh-ia, un lepros vini sh-si ncljinã, dzãcãnda: “Doamne, ma s-vrei tini pots s-mi curi.” 3Sh-Isusul teasi mãna, deadi di nãs sh-lji-dzãsi: “Ie, mini voi, curã-ti!” Sh-tu atsea oarã s-vindicã di lepra a lui. 4Atumtsea Isusul lji dzãsi: “Vedzi, s-nu lj-spunji a vãrui, ma duti nãintea a preftului, sh-dã doara tsi ari ursitã Moisiul tsi aestã s-hibã mãrtirii trã caitsido.”

Tsenturionlu al Capernaum

5Cãndu Isusul intrã tu Capernaum, lji vini un tsenturion pãrãcãlsinda, 6shi lji dzãsi: “Doamne, sclavul a meu easti ashtirnat la casã, paralizat sh-ma s-mundueashti multu.” 7Sh-Isusul lji dzãsi: “Va yin sh-va lu vindicã.” 8Tsenturionlu apãndisinda lji dzãsi: “Doamne, mini nu escu axiu tsi tini s-intsri tu streaha a mea, ma dzã mash un zbor shi sclavlu a meu va s-vindicã. 9Cã sh-mini escu un om sum autoritatea altsãlor, sh-lji-am suldatslji sum mini. Ma s-lji dzãc a unui: ‘Duti!’, elu s-dutsi, shi ma s-lji dzãc a altui: ‘Ajdi!’, elu yini, shi ma s-lji dzãc a sclavlui a meu: ‘Fã aestã!’, elu u-fatsi.” 10Cãndu Isusul avdzã aestã, s-ciudisi sh-lã dzãsi atsilor tsi lu urma: “Dealihea ma vã dzãc, cã iuva tu Israel nu aflai un pisti ahãntã mari. 11Mini ma vã dzãc cã multsã va yin di la rãsãrit sh-di la ascãpitat, sh-va s-apunã la measã cu Abrahamul, cu Isacul sh-cu Iacovul tu amirãriljea a tserurilor, 12ma hiljilji a amirãriljei, atselji aleptsã di la Dumnidzãlu, va hibã arcats tu scutidlu di nafoarã. Aclo va hibã plãngul sh-cãrtsãnirea a dintsãlor.” 13Atumtsea Isusul lji dzãsi a tsenturionlu: “Du-ti, shi s-facã ashã cum pistipsishi!” Sclavul s-vindicã tu atsea oarã.

Soacra a Petrului

14Deapoea Isusul intrã tu casa a Petrului sh-vidzu soacra a lui tsi eara tu pat cu hevri. 15Candu elu lji bãgã mãna hevrili u-alãsarã. Sh-ea si sculã sh-ahurhi s-lji huzmitipsea a lui. 16Cãndu vini seara, lji adusirã multsã demonizatsi, sh-elu cu zbor aĝuni duhurili sh-vindicã tuts lãndzitslji, 17tsi ashã si mplineascã zborlu a prufitlui Isaia cãndu dzãsi#Isa 53:4.:

“Elu li lo niputerili a noastri

sh-li purtã lãngoarili a noastri.”

Urmarea al Isus

18Cãndu Isusul vidzu anvãrliga di nãsu multsãnji mãri, ordinã s-treacã di napãrti. 19Atumtsea un scrib s-apruche sh-lji dzãsi: “Nvitsãtore, mini va ti urmedzu iutsido tsi va ti duts.” 20Sh-Isusul lji dzãsi: “Vulpili au guvãli a lor, sh-puljilji a tserlui au cuibairili, ma Hiljiu a omlui nu ari iu s-bagã caplu.” 21Deapoea un din ucenitsilji a lui lji dzãsi: “Doamne, dã-nji volje ma nãinti s-mi duc s-ngrop tatãl a meu.” 22Ma Isusul lji dzãsi: “Urmeadz-mã, sh-alasã mortsãlji s-ngroapã mortsãlji a lor.”

Isusul Muljeadzi Furtuna

23Dupã tsi elu s-alinã tu varcã, ucenitsilji a lui lu-urmarã. 24Sh-ia, tu amari si sculã unã furtunã mari, sh-vãljurili ma anvãlea varca, ma Isusul durnjea. 25S-apruchearã la nãsu ucenitsilji a lui, lu dishtiptarã shi lji dzãsirã: “Doamne, ascapã-nã, cã noi ma nã nicãm.” 26Isusul lã dzãsi a lor: “Cãtse avets fricã, voi oaminj cu pisti-putsãnã?” Cum si sculã, aurlã a vimturilor sh-a amariljei shi s-featsi tãtseari mari. 27Atumtsea oaminjili s-thãvmãtisirã sh-dzãsirã: “Cai easti aestu, tsi ma lu ascultã vimturli shi amarea?”

Demonizatlu Gadarean

28Cãndu Isusul agiumsi tu alantã parti tu loclu a Gadarenjilor, lji ishirã nãinti doi demonizats tsi avea ishitã di murmintsã. Elji eara ahãntu turbatsi, cãt nitsunu nu putea s-tritsea pri atsea cali. 29Sh-ia, elji ahurhirã s-aurlã: “Tsi ai cu noi, Isus, Hiljiu a Dumnidzãlui? Ai vinit aoa s-nã mundueshti ma nãinti di oara tsi prindi?” 30Sh-nu multu diparti di nãshi un cupii mari di portsi ma pãshtea. 31Atumtsea demonjilji s-rugarã a lui: “Macã nã aĝuneshti, alasã-nã s-intrãm tu atsea cupii di portsi.” 32Elu lã dzãsi a lor: “Dutsets-vã!” Ashã elji dupã tsi ishirã, intrarã tu atsea cupii di portsi. Ia, tutã cupia s-arcã di ripã tu amari, shi s-nicarã tu apã. 33Atselji tsi lã pãshtea fudzirã tu cãsãbã sh-cãndu agiumsirã aclo spusirã tuti aesti, sh-atsea tsi avea undzitã cu demonizatslji. 34Atumtsea, tutã cãsãbãlu ishi nãintea a Isusului. Cãndu lu vidzurã lji si rugarã tsi s-dipãrta dit loclu a lor.

Currently Selected:

Mateu 8: BLRR

Highlight

Copy