Luca 20
20
Autoritatea al Isus
1Unã dzuã, iarã Isusul ma nvitsa populu a lui tu templu sh-lã predica a tutulor evanghelu, vinirã mãrlji a preftsãlor shi scriblji deadun cu aushlji, 2sh-lji dzãsirã: “Dzã-nã cu tsi autoritati li fats aesti? Cai easti atsel tsi ts-u deadi aestã autoritati?” 3Sh-elu apãndisi: “Sh-mini am unã ntribari ti voi. Apãndisits-nji: 4Pitedzlu al Ioan eara dit tser ama di la oaminjlji?” 5Elji s-minduea namisa di nãshi dzãcãnda: “Ma s-dzãtsem: ‘Dit tser,’ elu va nã dzãcã: ‘Atumtsea cãtse nu lu pistipsit?’ 6Ma s-lji dzãtsem: ‘Di la oaminjlji,’ tut populu va nã vatãmã cu chetri, cã easti cãndãrsit cã Ioanul eara un prufit.” 7Trã atsea lji apãndisirã cã nu shtia di iu yinea. 8Atumtsea Isusul lã dzãsi a lor: “Nitsi mini nu ma vã dzãc cã cu tsi autoritati li fac aesti.”
Parabola a Ayinjearilor Atselji Arãi
9Deapoea apãrnji s-lã aspun a popului aestã parabolã: “Un om siminã unã ayinji, u deadi la niscãntsã ayinjeari cu nichi sh-fudzi diparti di multu chiro.#Isa 5:1. 10Tu chirolu a ayizmãrilor, pitricu un huzmichear la ayinjearlji tsi s-lji dãdea partea a lui di birichetea a ayinjiljei, ma ayinjearlji l-bãturã sh-lu turnarã cu mãnjili goali. 11Elu pitricu nãpoi un altu huzmichear, ma elji, dupã tsi lu bãturã sh-lu ngiurarã sh-atsel, lu turnarã cu mãnjili goali. 12Deapoea pitricu sh-al treilu, ma elji lu pliguirã sh-lu aĝiunirã sh-atsel. 13Atumtsea nicuchirlu a ayinjiljei dzãsi: ‘Tsi prindi s-fac? Va pitrec ficiorlu a meu vrut. Vahi, vidzãnda atsel, va lu respecteadzã!’ 14Ma ayinjearlji, cãndu lu vidzurã, dzãsirã un cu-alantu: ‘Aestu easti mushtinitorlu. Haidets s-lu vãtãmãm sh-mushtinirea si nã armãnã a noauã.’ 15Ashãtsi lu scoasirã nafoarã di ayinji sh-lu vãtãmarã. Tsi va lã facã aishtor nicuchirlu a ayinjãljei? 16Elu va yinã, va s-lji vatãmã ayinjearlji sh-va u da ayinjea la altsã.” Ma oaminjlji cãndu li avdzãrã aesti dzãsirã: “Dumnidzã s-nã afireascã!” 17Atumtsea Isusul vidzãnda cãtrã nãshi dzãsi: “Tsi vrea s-dzãcã atsea tsi easti scriatã: ‘Cheatra tsi masturlji u arcarã, s-featsi cheatra a chioshljei?’#Ps 118:22. 18Caitsido tsi va s-cadã pri aestã cheatrã va si s-facã bucãtsi sh-atsilui tsi va lj-cadã va si s-dãrãmã.” 19Tu atsea oarã mãrlji a preftsãlor shi scriblji cãfta s-bãga mãna pri nãsu, cã avea aduchitã cã elu u avea spusã atsea parabolã trã elji, ma avea fricã di lumea.
Plãtirea a Taxilor al Cezar
20Elji lu vigljea sh-lji pitricurã niscãntsã spiunji cai s-prifãtsea ca oaminji ndreptsã s-lu acãtsa tu cãbati cu vãrã zbor sh-deapoea s-lj-u dãdea la putearea sh-la autoritatea a guvernatorlui. 21Aeshti lu ntribarã: “Nvitsãtore, noi shtim cã tini zburashti sh-nvets ndreptu sh-nu tsãnji cu hãtãri, ma nvets la alantsã cala a Dumnidzãlui dupã alihea. 22Prindi noi s-plãtim taxa a Cezarlui, ama nu?” 23Ma Isusul, cunuscãnda ileea a lor, lã dzãsi: 24“Spunets-nji un denar. A cui easti fatsa shi scritura tsi ari pri nãsu?” Sh-elji apãndisirã: “A Cezarlui.” 25Atumtsea elu lã dzãsi a lor: “Dats-lã a Cezarlui atseali tsi suntu a Cezarlui, sh-a Dumnidzãlui atsea tsi easti a Dumnidzãlui.” 26Ashãtsi elji nu puturã s-lu acatsã tu cãbati tu zborlu a lui nãintea a popului sh-ciudisits di apandisea a lui tãcurã.
Nyearea sh-Mãrtarea
27Deapoea lji s-apruchearã niscãntsã di Saduceilji, tsi aleapid cã ari nyeari sh-lu ntribarã, 28dzãcãnda: “Nvitsãtore, Moisiul nã alãsã scriatã cã, macã fratili a vãrui moari sh-muljearea a lui nu alasã cilimenji, fratili a lui s-u ljea muljearea a frat-sui shi s-facã cilimenji di frat-su. 29Eara shapti frats, protlu si nsurã sh-muri ni alãsat cilimenji. 30A doilu u lo di muljeari sh-elu muri ni alãsat cilimenji. 31U lo deapoea a treilu, sh-ashãtsi di shaptilji murirã ni alãsat cilimenji. 32Dupã nãshi muri sh-muljearea. 33Atumtsea tu nyeari, a cui va hibã muljearea? Cã di shapti u avurã muljeari.” 34Isusul lã apãndisi a lor: “Oaminjlji a etiljei aishtei si nsoarã shi s-mãritã. 35Ma atselji tsi va hibã axii trã alantã etã sh-tu nyearea a mortsãlor, nu si nsoarã sh-nu va s-mãritã. 36Elji nitsi nu potã s-moarã ma, cã suntu ca anghilji shi suntu hiljilji a Dumnidzãlui, metsi elji suntu nyeat dit mortsã. 37Ma sh-Moisiul ari aspusã la ruglu tsi ma s-ardea, cã mortsãlji s-nyeadzã, cãndu Moisiul lu numeashti Domnu ‘Dumnidzãlu al Abraham, Dumnidzãlu al Isac sh-Dumnidzãlu al Iacov.’ 38Domnul nu easti Dumnidzãlu a mortsãlor, ma a yiilor, cã tuts bãneadzã trã nãsu.” 39Atumtsea niscãntsã scribii loarã zborlu sh-dzãsirã: “Nvitsãtore, ghini zburashi.” 40Shi nu cutidzarã s-lji facã altã ntribari.
Hiljilu a Cui Easti Mesia?
41Deapoea elu lã dzãsi a lor: “Vahi, cum dzãc cã Hristolu easti Hiljilu al David? 42Idyiul David, tu Cartea a Psalnjilor dzãtsi: ‘Domnul lj-dzãsi a Domnului a meu: “Shedz di-nandreapta a mea, 43pãnã-cãndu s-lji bagã dushmanjlji a tãlji ca scamnu la cicioarili a tali.”’#Ps 110:1. 44Davidul, lu acljeami ‘Domnu,’ cum poati s-hibã hiljilu a lui?”
Urnipsiri Contra a Nvitsãtorilor di Lege
45Cãndu tut populu ma asculta, Isusul lã dzãsi a ucenitsilor a lui: 46“Afirits-vã di scriblji, tsi lã arãsescu si s-primnã cu stranji lundzi, sh-vor ncljinãciunji prit pãdzi, s-hibã tu protili locuri tu sinagogã sh-tu protili locuri prit uspetsi. 47Elji mãcã cãsili a veduvilor sh-tra si s-veadã, facã rugãciunji lundzi. Elji va s-ljea un giudicari ma greu.”
Currently Selected:
Luca 20: BLRR
Highlight
Copy
Compare
Share
Want to have your highlights saved across all your devices? Sign up or sign in
