Luca 2
2
Amintarea al Isus
1Tu atseali dzãli ishi unã dimãndari di la Cezar Augustul trã reghistrari tutã lumea Romanã. 2Aestã reghistrari s-featsi di prota oarã cãndu Cuirini eara guvernator al Sirii. 3Tuts njidzea ti reghistrari, cathiun tu cãsãbãlu a lui. 4Atumtsea sh-Iosiful ishi dit cãsãbãlu Nazaret a Galileiljei, tsi s-njidzea tu Iudea, tu cãsãbãlu al David tsi s-acljima Betlehem, cã elu eara dit casa sh-dit soia a amirãlui David. 5Elu s-dusi trã reghistrari deadun cu Maria, susita a lui tãxitã tsi eara greauã. 6Ashãtsi, cãndu elji eara aclo, agiumsirã dzãlili ali Marii trã amintari. 7Sh-ea amintã ficiorlu a ljei prot-amintat, u-nfãshe sh-lu bãgã tu un grajdu cã tu hani nu avea loc trã elji.
8Tora tu idyiul loc eara niscãntsã picurari tsi tritsea noaptea nafoarã pri cãmpuri vigljiãnda cupia a lor. 9Sh-ia, un anghil a Domnului s-fãnirusi a lor sh-mãrirea a Domnului lunjinã anvãrliga di nãshi sh-elji lji acãtsã unã fricã mari. 10Ma anghilu lã dzãsi a lor: “Nu vã-aspãrats! Cã mini va vã dau unã hãbari tsi adutsi harauã mari trã tut populu. 11Azã tu cãsãbãlu al David s-amintã trã voi un Ascãpãtor, cai easti Hristolu, Domnu. 12Sh-aestu va vã hibã semnul: voi va aflats un cilimean nfãshat sh-bãgat tu grajdu.” 13Sh-trãoarã a anghilui lji s-adunã unã multsãmi di armata tsereascã, tsi alãvda Dumnidzãlu, dzãcãnda:
14“Mãrire a Domnului tu locuri di ma analti sh-pace pri loc namisa di oaminjlji cu cai elu easti hãrãcop.”
15Cãndu anghilji fudzirã di la elji cãtrã tser, picurarlji dzãsirã cu un-alantu: “S-nidzem pãnã tu Betlehem s-videm tsi ari undzitã sh-tsi nã ari aspusã Domnul.” 16S-dusirã trãoarã sh-aflarã Maria, Iosiful sh-cilimeanlu cai eara bãgat tu un grajdu. 17Cãndu lu vidzurã, scurpisirã zborlu tsi lã si-eara dzãsã trã atsel cilimean. 18Sh-tuts atselji tsi avdzãrã, s-ciudisirã di atseali tsi dzãsirã picurarlji. 19Iarã Maria li vigljea tuti aesti zboari zigãsãnda tu inima a ljei. 20Atumtsea, picurarlji s-turnarã, mãrinda sh-alãvdãnda Dumnidzãlu trã tuti tsi avea avdzãtã sh-vidzutã, ashãtsi di cum lã si-eara dzãsã a lor. 21Sh-cãndu si mplinirã optu dzãli, lu avãrliga-tãljearã ficiorlu, sh-lji bãgarã numa Isus, numã datã di anghilu nãinti tsi s-acãtsa tu pãnticã.
Pãrintsãlji Adusir Isusul tu Templu
22Cãndu si mplinirã dzãlili di curari dupã legea al Moisiu, lu dusirã cilimeanlu la Ierusalem s-lji-u bãga nãintea a Domnului, 23ashã cum easti scriatã tu legea a Domnului: “Cathi mascur prot-amintat va hibã sãmtsãsit a Domnului.”#Ex 13:2,12. 24Elji prindea s-fãtsea curban, cum easti dzãsã tu legea a Domnului, unã pãreaclji di turturi icã doi purunghi njitsi.#Lev 12:6-8. 25Tu atsel chiro eara un om tu Ierusalem cu numa Simeon. Omlu atsel eara ndreptu sh-pistimen sh-ma ashtipta ascãparea al Israel, sh-Duhlu Sãmtu eara tu nãsu. 26Sh-a lui s-eara dizvãlit di la Duhlu Sãmtu cã nu va s-murea nãinti tsi s-videa Hristolu a Domnului. 27Elu pimtu di la Duhlu Sãmtu, vini tu templu sh-dupã tsi pãrintsãlji lji adusirã cilimeanlu Isus s-fãtsea cu nãsu atsea tsi eara scris tu lege, 28Simeon lu lo ãn bratsã, ghinicuvintã Dumnidzãlu sh-dzãsi:
29“Tora, Doamne, alasã tu pace huzmichearlu,
dupã zborlu a tãu,
30cã ocljilji a melji au vidzut ascãparea a ta,
31tsi tini u etimãsishi tu ocljilji a tut popului:
32Lunjinã trã lunjinarea a natsiunilor
sh-trã mãrirea a popului a tãu Israel.”
33Iosiful sh-Maria, muma a cilimeanlui s-ciudisirã di atseali tsi s-dzãtsea trã nãsu. 34Atumtsea Simeonul lji ghinicuvintã sh-lji dzãsi ali Marii, muma al Isus: “Ia, aestu easti bãgat trã cãdearea sh-alinarea a multsãlor tu Israel sh-tra s-hibã semnu trã cai va greascã contra, 35tsi si discoapirã minduirili di multi ininji. Iarã suflitlu a tãu va lu pitrundã unã spatã.”
36Atsia eara sh-Ana, unã prufiteasã, hiljea al Fanuel, di soia al Asher, tsi eara multu tricut di anji, sh-avea bãnat cu bãrbat-su shapti anji dupã tsi eara mãrtatã. 37Ea eara veduvã, sh-cu tutã cã eara optudzãtsi sh-patru di anji, nu s-dipãrta di templu, huzmitipsinda a Dumnidzãlui noapti sh-dzuã cu agiunari sh-cu rugãciuni. 38Sh-ea vini tu atsea oarã, alãvdã Dumnidzãlu sh-lã spunea di aestu ficior a tutulor atsilor tsi ashtipta arãscumpãrarea a Ierusalemlui. 39Cãndu li featsirã tuti dupã legea a Domnului, Iosifu sh-Maria s-turnarã tu Galilea tu cãsãbãlu a lor Nazaret. 40Cilimeanlu crishtea shi s-nvãrtushea. Elu eara mplin di mintimenilji, sh-harul a Dumnidzãlui eara pristi nãsu.
Ficiuriclu Isus tu Templu
41Pãrintsãlji a lui s-dutsea cathi an tu Ierusalem la sãrbãtoarea a Pashtiljei. 42Cãndu Isusul umplu doisprãdzatsi di anji, elji s-alinarã tu Ierusalem dupã adetea a sãrbãtoariljei. 43Dupã tsi tricurã dzãlili a sãrbãtoariljei, cãndu elji s-turnarã, ficiorlu Isus armasi tu Ierusalem, iarã pãrintsãlji a lui nu shtia tsiva. 44Ma minduinda cã elu eara cu cãlãtorlji, elji featsirã unã dzuã cali, deapoea ahurhirã s-lu caftã namisa di soia sh-di cunuscutslji. 45Dupã tsi nu lu aflarã, s-turnarã tu Ierusalem s-lu caftã. 46Dupã trei dzãli, lu aflarã tu templu, shãdzãnda tu mesea a nvitsãtorilor, ascultãnda sh-ntribãnda elji. 47Tuts atselji tsi lu asculta, s-ciudisea di mintimeniljea sh-di apãndisirili a lui. 48Cãndu elji lu vidzurã, armasirã ciudisits sh-mã-sa lj-dzãsi: “Hilje, cãtse nã lu fãtsesh aestã? Ia, tatãl sh-mini, ma ti cãftam cu mirachi!” 49Iarã elu lã dzãsi a lor: “Cãtse mi cãftats? Nu lu shtits cã prindi s-hiu la casa a Tatãlui a meu?” 50Ma elji nu lu aduchirã zborlu tsi elu lã dzãsi a lor. 51Sh-ashãtsi elu dipunã deadun cu elji, vini tu Nazaret sh-lã asculta pãrintsãlji. Sh-muma a lui li tsãnea tuti tsi undzirã tu inima a ljei. 52Sh-Isusul crishtea tu frunimeatsã, tu trup sh-tu har nãintea a Dumnidzãlui sh-a oaminjlor.
Currently Selected:
Luca 2: BLRR
Highlight
Copy
Compare
Share
Want to have your highlights saved across all your devices? Sign up or sign in
