Ioan 7
7
Isusul la Sãrbãtoarea a Tabernachilor
1Dupã aesti, Isusul imna prit Galilea, cã nu vrea s-imna prit Iudea, trã atsea cã mãrlji a Iudeilor cãfta s-lu vãtãma. 2Sãrbãtoarea a Iudeilor, atsea a Tabernachilor eara aproapi. 3Trã atsea, fratslji a lui lji dzãsirã: “Fudz di aoa sh-duti tu Iudea, tsi sh-ucenitsilji a tãlji s-li veadã faptili tsi tini fats. 4Cã vãrã nu fatsi tsiva pri ascumtu cãndu caftã si s-cunoascã la tutã dunjeaua. Macã tini vrei s-fats ahtãri lucri, aspuni-ti la dunjeaua!” 5Cã nitsi fratslji a lui nu pistipsea la nãsu. 6Atumtsea Isusul lã dzãsi a lor: “Chirolu a meu nu ari vinitã ninga, ma chirolu a vostru easti totãna etimu. 7Lumea nu poati s-vã aurascã a voauã, ma mini mi aurashti cã mini mãrtirsescu cã faptili a ljei suntu arali. 8Voi njidzets la aestã sãrbãtoari. Mini nu ma mi duc ninga la aestã sãrbãtoari, cã chirolu a meu ninga nu easti mplinitã.” 9Shi cum dzãsi aesti a lor, armasi tu Galilea. 10Dupã tsi fratslji a lui s-dusirã la sãrbãtoari, atumtsea sh-elu s-dusi aclo nu discljis, ma pri ascumtu. 11Atumtsea mãrlji a Iudeilor lu cãfta tu dzua a sãrbãtoariljei sh-ntriba: “Iu easti atsel?” 12Tu mesea a multsãmiljei s-pushpura multu ti nãsu. Niscãntsã dzãtsea: “Elu easti bun.” Altsi dzãtsea: “Nu, cã elu arãdi populu.” 13Ma nitsiun nu grea discljis-cu boatsi ti nãsu di frica a mãrljilor a Iudeilor.
Isusul Nveatsi la Sãrbãtoari
14Ma cãtrã la giumitatea a sãrbãtoariljei, Isusul s-alinã tu templu sh-ahurhi si nvitsa. 15Shi Iudeilji s-ciudisea dzãcãnda: “Cum li shti aestu gramatli, cu tutã cã nu ari nvitsatã?” 16Isusul atumtsea lj-apãndãsi a lor: “Nvitsãtura a mea nu easti di la mini, ma di la atsel tsi mi ari pitricut. 17Macã vãrã va s-facã vrearea a Dumnidzãlui, va u cunoascã, cã aestã nvitsãturã yini di la Dumnidzãlu, icã mini grescu cu mintea a mea. 18Atsel tsi greashti cu mintea a lui caftã mãrirea a lui, iarã atsel tsi caftã mãrirea atsilui tsi lu ari pitricut easti alihios, sh-tu nãsu nu ari nindriptati. 19Nu vã-u ari datã Moisiul legea? Cu tutã atsea, nitsiun di voi nu u bagã tu practicã legea. Cãtse cãftats s-mi vãtãmats?” 20Multsãmea lji apãndisi: “Tini ai un drac, cai caftã s-ti vatãmã?” 21Isusul lã dzãsi a lor: “Mini am faptã unã thavmã sh-voi tuts hits ciudisits. 22Trã atsea Moisiul vã deadi anvãrliga-tãljearea, sh-atsea nu easti di la Moisiul, ma di la patriarhilji, sh-voi anvãrliga-tãljeats un ficior Sãmbãta. 23Macã un om fatsi anvãrliga-tãljeari Sãmbãta, tsi nu s-aspargã legea al Moisiu, cãtse vã nãrãits cu mini cã vindicai ntreg un om Sãmbãta?#Ioan 5:1-10. 24Nu giudicats dupã videarea di nafoarã, ma giudicats cu ndriptati!” 25Atumtsea niscãntsã di Ierusalem dzãsirã: “Nu easti aestu atsel tsi l-caftã s-lu vatãmã? 26Sh-ia, elu ma greashti discljis shi nu lj-dzãc tsiva. Nacã lu-au cunuscutã mãrlji cã dealihea elu easti Hristolu? 27Noi shtim cã di iu easti aestu, iarã cãndu s-yinã Hristolu, vãrã nu va shtibã cã di iu easti elu.” 28Atumtsea Isusul, nvitsãnda tu templu grãi: “Voi mi cunushtets sh-mi shtits cã di iu escu. Cu tutã atsea, mini nu am vinitã cu autoritatea a mea, ma atsel tsi mi pitricu easti alihios sh-voi nu lu cunushtets. 29Ma mini atsel lu cunoscu, cã escu di la elu, sh-elu mi pitricu.” 30Trã atsea elji cãfta s-lu acãtsa, ma vãrã nu bãgã mãna pri nãsu, cã oara a lui nu avea vinitã ninga. 31Multsã oaminji di multsãmea pistipsirã la nãsu sh-dzãtsea: “Cãndu s-yinã Hristolu, va s-facã ma multi thavmati di tsi ari faptã aestu?” 32Fariseilji avdzãrã multsãmea pushpurãnda aesti trã nãsu. Trã atsea arhipreftsãlji sh-Fariseilji pitricurã vigljitorlji s-lu acãtsa. 33Atumtsea Isusul lã dzãsi a lor: “Mini escu ninga putsãn chiro cu voi, deapoea va mi duc la atsel tsi mi ari pitricut. 34Va mi cãftats, ma nu va mi aflats, sh-aclo iu escu mini, voi nu putets s-yinits.” 35Atumtsea Iudeilji dzãtsea cu un-alantu: “Iu va s-ducã aestu tsi noi nu va lu aflãm? Nacã va s-ducã la atselji tsi suntu arãspãndits namisa di Elinji, shi s-nveatsã Elinjilji? 36Tsi easti aestu zbor tsi elu dzãsi: ‘Voi va mi cãftats sh-nu va mi aflats,’ shi: ‘Aclo iu escu mini, voi nu putets s-yinits’?”
37Tu dzua di soni, dzua atsea marea a sãrbãtoariljei, Isusul si sculã pri cicioari sh-grãi cu boatsi analtã: “Macã vãrã ari seati, s-yinã la mini 38sh-atsel tsi pistipseashti la mini va s-bea. Ashã cum ari dzãsã Scritura, di nãuntru a lui va s-curã arãuri di apã yii.” 39Ma aestã elu u dzãsi trã Duhlu, tsi va u loa ma napoi atselji tsi va s-pistipsea la nãsu. Cã Duhlu Sãmtu nu fu datã ninga, cã Isusul ninga nu eara multumãrit. 40Cãndu li avdzãrã aesti zboari, niscãntsã oaminji di multsãmea dzãsirã: “Aestu easti dealihea Prufitlu.” 41Altsã dzãtsea: “Aestu easti Hristolu.” Iarã altsã ntriba: “Vahi di Galilea yini Hristolu? 42Nu dzãtsi Scritura cã Hristolu yini di fara a Davidlui sh-di Betlehem, hoara iu bãna Davidul?” 43Ashã avu dispãrtsãri la multsãmea trã itia al Isus. 44Shi niscãntsã di elji vrurã s-lu acãtsa, ma vãrã nu bãgã mãna pri nãsu.
Nipistipsirea a Mãrlor la Iudeilji
45Atumtsea, vigljitorlji s-turnarã la mãrlji a preftsãlor sh-la Fariseilji, sh-aeshti lã dzãsirã a lor: “Cãtse nu lu adusit?” 46Vigljitorlji apãndisirã: “Pute nu ari gritã vãrã om ca aestu!” 47Atumtsea Fariseilji lã apãndisirã a lor: “Nacã vã arãsi sh-voi? 48Nacã vãrã di mãrlji icã di Fariseilji ari pistipsitã la nãsu? 49Ma aestã multsãmi, tsi nu u cunoashti legea, easti blãstimatã.” 50Nicodemul, atsel tsi avea vinitã ma nãinti la Isusul, hinda un di Fariseilji lã ntribã: 51“Legea a noastrã giudicã vahi un om nãinti tsi s-lu avdã shi s-lu shtii cã tsi ari faptã?” 52Elji apãndisirã: “S-nu eshti sh-tini di Galilea? Caftã sh-va s-aflã cã di Galilea nu ari ishit vãrã prufit.” 53#7:53 Manuscrisili atseli ma vecljilji tu gãrtseashti nu au stihurli at Ioan di la 7:53 pãn la 8:11 Shi cathiun s-dusi la casa a lui.
Currently Selected:
Ioan 7: BLRR
Highlight
Copy
Compare
Share
Want to have your highlights saved across all your devices? Sign up or sign in
