Faptili 4
4
Petrul sh-Ioanul Nãintea al Sinedriu
1Iarã elji ma lã grea a popului, preftsãlji, comandantul a templui sh-Saduceilji s-apruchearã la elji, 2nãritsã cã nvitsa sh-hãbãrsea a lumiljei nyearea a mortsãlor prit Isusul. 3Atumtsea acãtsarã Petrul sh-Ioanul sh-lji bãgarã tu hapsi pãnã tu alantã dzuã, metsi eara ntunicat. 4Multsã di atselji tsi avea avdzãtã zborlu pistipsirã sh-numirlu a bãrbatslor agiumsi aproapi tsintsi njilji. 5Tu alantã dzuã, mãrlji, aushlji shi scriblji s-adunarã tu Ierusalem, 6deadun cu arhipreftul Anna sh-cu Caiafa, Ioanul, Alexandrul sh-tuts atselji cai eara di soia a arhipreftsãlor. 7Deapoea lji-bãgarã atsia namisa, sh-lji ntribarã: “Cu tsi puteari icã tu numa a cui u fetsitã aestã?” 8Atumtsea Petrul, umplut di Duhlu Sãmtu, lã dzãsi a lor: “Mãrlji a popului sh-aushlji! 9Noi azã nã giudicãm di unã ghineatsã tsi s-featsi la un om niputut sh-cu tsi fuchii s-vindicã elu. 10Nvitsats-lu voi tuts sh-ntreg populu al Israel cã aestã s-featsi tu numa al Isus Hristos Nazareanlu, tsi voi lu crutsisit, ma Dumnidzãlu lu nyie dit mortsã! Di la nãsu aestu om sta nãintea a voastrã vindicat.
11‘Aestã easti cheatra tsi voi, masturlji u-arcat nghios ma s-featsi cheatra a chioshiljei.’
12Ascãparea nu yini di vãrã altu, cã a oaminjlor nu lã easti datã vãrã altã numã sum tser, prit cai s-putem s-nã ascãpãm.” 13Elji, cãndu l-vidzurã curaiulu a Petrului sh-a Ioanului shi shtinda cã eara oaminji ninvitsats sh-fãrã shtiintsã, s-ciudisirã sh-lji cunuscurã cã avea fut cu Isusul. 14Cãndu lu vidzurã omlu atsel vindicat deadun cu nãshi, nu putea s-dzãtsea tsiva contra. 15Cu tutã atsea lã ursirã s-easã nafoarã dit Sinedriul shi zburãrã cu un-alantu, 16dzãcãnda: “Tsi s-fãtsem noi cu aeshti oaminji? Cã easti cunuscut la tuts tu Ierusalem cã easti faptã unã thavmã mari di elji sh-noi nu putem s-u alipidãm. 17Ma, tsi aestã s-nu si scurpiseascã ma multu tu popul, s-lji lãhtãrsim s-nu lã-greascã a vãrui tu aestã numã.” 18Atumtsea lji acljimarã sh-lji ursirã s-nu greascã dip shi s-nu nveatsã tu numa al Isus. 19Ma Petrul sh-Ioanul lã apãndisirã a lor, “Giudicats voi, tsi easti ndreptu nãintea a Dumnidzãlui, s-vã ascultãm ma multu a voauã dicãt Dumnidzãlu! 20Cã noi nu putem s-nu zburãm trã atseali tsi avem vidzutã sh-avem avdzãtã.” 21Elji dupã tsi lji lãhtãrsirã nãpoi, lji alãsarã s-fugã niaflãnda sibepi cã cum s-lji giudicã trã itia a popului, cã tuts multumãrea Dumnidzãlu trã atsea tsi eara faptã. 22Omlu tsi eara vindicat prit aestã thavmã eara ma multu di patrudzãtsi di anji.
Pistimenjlji s-Roagã
23Cãndu sãlãghirã, Petrul sh-Ioanul s-turnarã la a lor sh-lã spusirã tuti tsi mãrlji a preftsãlor sh-aushlji lã avea dzãsã. 24Cãndu li avdzãrã aesti, elji tuts deadun anãltsarã boatsea cãtrã Dumnidzãlu sh-dzãsirã: “Doamne, tini eshti Dumnidzãlu tsi ai adratã tserlu, loclu, amarea sh-itsido tsi easti la eali. 25Tini lj-ai dzãsã a huzmichearlui a tãu, tatãl a nostru David prit Duhlu Sãmtu:
‘Trã tse s-nãrãirã natsiunili
sh-populjilji minduescu lucri fãrã ufelii?
26Amiradzlji a loclui s-etimãsirã
sh-domnjilji s-adunarã deadun
contra a Domnului sh-contra a Hristolui a lui.’#Ps 2:1-2.
27Dealihea contra a Isusului, Huzmichearlui a tãu sãmtu, tsi tini lu aumsesh, s-adunarã tu aestu cãsãbã Herodul sh-Pontius Pilat cu pãngãnjlji sh-cu populu al Israel, 28tra s-facã atseali tsi mãna a ta sh-vrearea a ta avea apofãsitã di ma nãinti cã va s-undzea. 29Sh-tora, Doamne, mutrea lãhtãrsirili a lor sh-dã a huzmichearilor a tãlji curaiu s-dimãndã zborlu a tãu. 30Tindi-u mãna a ta trã vindicari sh-trã adrari seamni sh-thavmati tu numa a Huzmichearlui a tãu sãmtu Isus.” 31Cãndu s-rugarã elji, loclu iu eara adunats s-cutrimburã. Atumtsea tuts s-umplurã di Duhlu Sãmtu sh-lu dimãndarã zborlu a Dumnidzãlui cu curaiu.
Pistimenjlji Mpartsã Itsido cu Un-Alant
32Tuts atselji tsi pistipsea eara cu unã singur inimã sh-cu un singur suflit. Vãrã nu dzãtsea trã atseali tsi avea, cã eara a lui, ma tuti lucrili eara a tutulor. 33Apostulji mãrtirsea cu fuchii mari nyearea a Domnului Isus sh-harul atsel marli eara cu elji. 34Ntrã elji nu eara vãrã oarfãn, cã tuts atselji tsi avea agri icã cãsi li vindea sh-adutsea amintaticlu di lucrili tsi vindea, 35sh-li bãga la cicioarili a apostuljilor. Deapoea a cathiunui lji si dãdea dupã ananghea. 36Ashãtsi sh-Iosiful, un Levit amintat tu Chipro, acljimat di apostulji Barnaba (tsi va s-dzãcã “hiljilu a diznjirdariljei”), 37avea un agru, lu vindu sh-amintaticlu lu bãgã la cicioarili a apostuljilor.
