Narpa Phingchaun XXVII.
XXVII.
1Nayoeka ngacha Italyâ chhacha yod zere chhadkha songmana khongis Paulos nang yang yodkhan khachik Augustos zerkhan rshmaq Yulyus zerkhan rshmaqmi rgye gowa chikchigi laqa tangs. 2Ni, ngacha Adramitteryoe nayo Asye chhuzur zune chhacha yodkhanchigika dukse rgyamthsoeka bings, yang Thessalonikyapi Makedonyapa Aristarqus ngacha nanyambo yodpin. 3Bingsena ejaqa Sidoniang nayo duks, dukpana Yulyusis Paulosika rgaluks nadrese snanga-chan songse rgakhanuni der khoa khonti jabsthoqpo thoba chhachuks. 4Yang, dekana ngacha rgyamthsoeka bingsena Kuphrosi phaqreang songse druls, chiazerbana hlungun loqparla yongen yodpinsuk. 5Yodpana ngacha Kilikye chhuzurunis yang Pamphilye chhuzurunis rgyamthsoeka rgale Lukye Murapeang hlebs. 6Yang der rshmaqmi rgyo gopawa Aleksandriye nayo Italyâ chha-khanchik thobsena ngacha deang chhachuks. 7Ni, ngacha jaq mangmo thsaqpa kulekulea drule rshkablasika Knidus na thannyâ hleb chiazerbana hlungpos ngachâ dunla machhachukpana Salmonye-thannyas Kretosi phaqreang druls. 8Drulbana rshkablasika de chhuzur zune drule rdemo-nayo-rshtansa zerkhan malseka hlep; do na nyemor Lasye zerkhan rgyalsa yodpin. 9Ni, namza mangmo rgalena yang nayoe besao jiksmochan chhana chiazerbana khastrichi jaqun rgaleang yodpin Paulosis khonga diyu zere jalta bas: 10Kasa khyoqaun ngâ di bespeang thsongunla yang nayo tsâ men dobasang nganti stroquniangang naqs nang rshnodkye mangmo hlebtuk zere rshtaḵẖspa chhet. 11Amma rshmaqmi rgyegopaos nayo strulkhanpo nang nayoe ashipas base Paulosis zeskhanunla basang khontes zeskhanunla snanga jaqse in zes. 12Yang de nayo rshtansao rgun rgalbi phya chhoqbos medpana saqbasang mangmos dekana dongshik zere jaltatangs, yang taqdir nyanna Phenikysiang hlebse rgunkhao phingnukpa; de Kretesi nayo rshtansa malsek in, byang-shar nang hlo-shar-i ngospoa ltase yodpin. 13Ni hlo ngosi hlungpo yangmorek drulbana khongis rangi tongoeka hlep samse chingrdo thyaqsena Kretesi chhuzuri nyemor druls. 14Amma dyatsek namza mangmo margalba Uraqulon zerkhan chhopo hlungdraqshik Kretesna (nayo)eka yongs. 15Ni, nayo hlungdraqi yoqa yongse langspa manyan, manyanmana ngachas makuls pana nayô chnua khyerchuks. 16Yang Klauda zerkhan chaqtse chhubar chigi phaqreang chhus khyeren ngacha rshkablasika nayo ashi base laqa khyongma nyans. 17Yang nayo strulkhanunis do gyenla phingsena nayô rshtanpo be stabs base de yoqna chings; byaldamiang phoqtuk samse droqse nayoe hlung phoqkhani yolaun phabsena dyatsuga chhuika ldingen song. 18Amma hlungdraqis base ngacha styaqphabs mangmo songmana ejaqa khongis nayoeang yodkhan thsongun phangma ryaḵẖs. 19Yang jaq sumi jaqa ngantes nganti laqpaunika nayoe rchasun phangse tangs. 20Ni, jaq mangmo thsaqpa hana nyimi miga mathong hana skarmaun mathong; yang hlungdraq mangmo yongen dukpana, jukna ngacha budpi rdyang mana malus. 21Maluspana khastong mangmo dukse yodena Paulos khongi rshkilla langsena zes : Kasa khyoqaun! Chhadkhika khyentanga ngâ tamnyan base Kretesna mibingchao yang di naqspo nang rshnodkye miphoqpao (ngâ tamnyan ba) thsathsa inmin. 22Yang dare ngas khyentanga thate dukshik zero jalta tanged chiazerbana khyentiangna nayo tsa mene yang sui stroqa rshnodkye mihlop. 23Chiazerbana jabshia dukkhan [nga] inkhan Ashipas rangi khamskad khyongkhanpos diring thsanla ngi der yongse mols. 24Wa Paulos! Jiks majiks khyerang Kesari dunla langspa rgosed yang ltosang khyerang nanyambo nayoeang yodkhan saq Ashipas khyeri laqa salsed. 25Di phya, kasa khyoqaun thate dukshik chiazorbana nga-a molspao natsoḵẖs chhok zere ngas Ashipika rdyang jaqed. 26Amma ngantang chhu barchigika phoqchao thsathsa in. 27Ni, chujbji jaqi thsanpo hlebana ngacha Adriatik rgyamthsoeang eltek deltek phoqen khoren yodtsana thsanphedsega nayo strulkhanunla mal sega yulchik nanyemor hlebsed zere rshtaḵẖspa song. 28Yang chnueang qompoa lta rdoek chingse phute tangse khru trukchu yodtsuk yang rdashik dunla songse yang ltana kru jibchujaqa yotsuk. 29Yodpana nayô braqbu-unika phoqtuk samse nayoe jukpao chingrdo jbji chings yang od jukspiphya ringse dukse yodpin. 30Amma nayo strulkhanunis nayoekana shorba thsalen jukna chingrdoa phangmi snyotika thsuntse nayo phabsena, 31Paulosis rshmaqmi rgye gopao nang rshmaqmiunla zes : Taqdir dyûn nayoeka dukse mono khyentang hute chha minyan. 32Dekana rshmaqmiunis thsuntse nayoe thaqpaun chate do (chhueang) phute tangs. 33Ni, od jukspa chhetaq chhachha thsaqpa Paulosis saqa zachas zashik zere ju namsi ben zes : Khyentanga strungen strungon chang maza khastonga dugen diring jaq chujbji song. 34Di phya ngas khyentanga zacha zo zore jalta bed chiazerbana dyu khyenti stroq strungma rgyala in chiazerbana khyentiangna sui goe ryal chikchigang jikcha med. 35Ni, diun zerena yang ṯakiyu lenena khos khong saqi dunla Ashipâ ju basena yant ṯaki chaqsena za ryaḵẖs. 36Ni, khong saq thate songmana khongisang zachas lens. 37Ni, ngacha saq tangse nayoeang mingga nibgya nang rdunchu nang truk yodpin. 38Ni khong zachas zose drangspana, kro rgyamtheoeang phangse tangso nayô yangmo bas. 39Chiazerbana od jukspana khonga de yulpo ngozin masong; amma chhuthamâ lding chikchik thong de zurpeka khongis taqdir ranga nyanna nayô deka strulbi grabs bas. 40Tang chingrdoa chatena rgyamthsoeang phangse jaqs yang nyambo skulshinguniang thaqpaun krols, yang dunla yodkhan hlungphoqkhan yolao hlungi ngosla tangse nayo do chhuzuri ngosla druls. 41Ni ljongs nyiskoa rgyamthsoe zbuks yodsi malsa chigika hlep yang nayo sa nathuk. Dunljongspo na phoqse khate khar amma jugi ngospo chhuzbri zbuksika chhaqs. 42Ni, rshmaqmiunis yalkhan miun rshkyale shore chhok samse sate phangchi grabs bedpin. 43Amma rshmaqmi rgye gowaos Paulos strungse jaqpi phya khonga khonti tongo mabachuks, mabachukpana rshkyalba nyankhanun snanla chhongse chhuzurika song zere skals. 44Yang luskhan khachik chhatkhika spanglesunika yang khachik nayoe echigangunika (rshtene song); Dyana zomse saq nanmed na, eltek skambo seka hlep.
Currently Selected:
Narpa Phingchaun XXVII.: SOMA
Highlight
Share
Copy
Want to have your highlights saved across all your devices? Sign up or sign in
© Société Biblique de Genève