رومیوں 7

شادی دی مثال تُوں وضاحت

1بِھراؤ! مَیں تُہاکُوں جیہڑے شریعت کنُوں واقف ہیوے آدھا ہاں۔ کیا تُساں نئیں جانڑدے جو اِنسان صرف اُوں ویلے تئیں شریعت دے ماتحت ہے، جئیں تئیں او زندہ ہے؟ 2مثال دے طور تے ہِک شادی شدہ عورت شریعت دے مطابق پئے دے زندہ ہووݨ تئیں اُوندی پابند ہوندی ہے#7‏:2 یعنی قانُونی طور تے اُونکُوں چھوڑ نئیں سگدی۔، پر جے اُوندا پایا مر ونجے تاں او شادی آلے قانُون تُوں ازاد تھی ویندی ہے۔ 3جے او آپنڑے پئے دے جیندے جی کہیں بئے بندے دی تھی ونجے تاں زانیہ اکھویسی۔ پر جے اُوندا پایا مر ونجے تاں او اِیں شریعت کنُوں ازاد تھی ویندی ہے۔ جے او اُوں حالت ءچ کہیں بئے بندے دی تھی وی ونجے تاں او زانیہ نہ اکھویسی۔ 4بِھراؤ! تُساں وی مسیح دے بدن دے وسیلے نال شریعت دے اعتبار نال مر گئے ہیوے تاں جو کہیں بئے دے تھی ونجو یعنی مسیح دے جیہڑا مُردیاں ءچوں زندہ کیتا گِیا تاں جو تُساں خُدا کیتے پھل گِھن آؤ۔ 5جِیں ویلے اساں آپنڑی جِسمانی فطرت دے مطابق زندگی گُزریندے ہسے تاں شریعت گُناہ دیاں خواہشاں پیدا کریندی ہئی۔ تے ایہ خواہشاں ساڈے اَنگاں اُتے اثر کریندیاں ہَن تے ایجھے پھل پیدا کریندیاں ہَن جِنہاں دا انجام موت ہے۔ 6پر ہُنڑ اساں مر تے شریعت دی قید ءچوں چُھٹ گئے ہیں۔ تے اساں لِکھی ہوئی شریعت دے پُرانڑے طریقہ دے مطابق نئیں بلکہ رُوح القُدس دے نویں طریقہ دے مطابق خدمت کریندے ہیں۔

شریعت تے گُناہ

7بس اساں کیا آکھوں؟ کیا شریعت گُناہ ہے؟ ہرگز نئیں بلکہ جے شریعت نہ ہوندی تاں میکُوں گُناہ دا پتہ نہ لگدا۔ مثلاً جے شریعت ایہ نہ آدھی جو ”تُوں لالچ نہ کر#خرُوج 20‏:17۔ اِستِثنا 5‏:21۔“ تاں میکُوں لالچ دا پتہ نہ چلدا۔ 8پر گُناہ اِیں حُکم کنُوں فائدہ چا تے میڈے اندر ہر طرحاں دا لالچ پیدا کر ڈِتا کیوں جو شریعت دے بغیر گُناہ مُردہ ہے۔ 9ہِک وقت ہا جو مَیں شریعت دے بغیر زندگی گُزریندا ہم پر جِیں ویلے حُکم آیا تاں گُناہ زندہ تھی گِیا تے مَیں مر گِیا۔ 10تے جیہڑے حُکم دا مقصد زندگی ڈیوݨ ہا اُوہو میڈے کیتے موت دا سبب بنڑ گِیا۔ 11کیوں جو گُناہ اِیں حُکم کنُوں فائدہ چا تے میکُوں ورغلایا تے اِیندے ذریعے میکُوں مار سٹیا۔

12بس شریعت پاک ہے تے اُوندا ہر حُکم وی پاک، راست تے چنگا ہے۔ 13تاں کیا اُوہو چیز جیہڑی چنگی ہے میڈے کیتے موت بنڑ گئی؟ ہرگز نئیں بلکہ گُناہ ہِک چنگی چیز کنُوں فائدہ چا تے میڈی موت دی وجہ بنڑ گِیا تاں جو گُناہ دی اصلیّت ظاہر تھی ونجے تے حُکم دے ذریعے گُناہ حد تُوں زیادہ مکرُوہ معلوم تھیوے۔

ساڈی جِسمانی تے رُوحانی کشمکش

14اساں جانڑدے ہیں جو شریعت ہِک رُوحانی چیز ہے پر مَیں جِسمانی ہاں تے گُناہ دی غُلامی ءچ وِک گِیا ہاں۔ 15مَیں نئیں سمجھدا جو کیا کریندا ہاں، کیوں جو جیہڑا کُجھ کرݨ چاہندا ہاں، اُونکُوں تاں نئیں کریندا بلکہ اُوہو کریندا ہاں، جئیں تُوں میکُوں نفرت ہے۔ 16تے جے او کریندا ہاں جِینکُوں مَیں کرݨ نئیں چاہندا تاں مَیں منیندا ہاں جو شریعت چنگی ہے۔ 17تاں وَل ایہ کرݨ آلا مَیں نئیں بلکہ او گُناہ ہے جیہڑا میڈے ءچ وسدے۔ 18مَیں جانڑدا ہاں جو میڈے ءچ یعنی میڈے جِسم ءچ تاں کوئی نیکی نئیں وسدی۔ بھانویں جو نیکی کرݨ دا اِرادہ تاں میڈے ءچ موجود ہے، پر مَیں اِیں اِرادے اُتے عمل نئیں کر سگدا۔ 19جیہڑی نیکی کرݨ چاہندا ہاں اُونکُوں تاں نئیں کریندا پر او بُرائی جِینکُوں کرݨ نئیں چاہندا اُونکُوں کر گِھندا ہاں۔ 20بس جے مَیں او کریندا ہاں جِینکُوں کرݨ نئیں چاہندا تاں ہُنڑ کرݨ آلا مَیں نئیں بلکہ گُناہ ہے جیہڑا میڈے اندر وسدے۔

21بس مَیں ایجھا قانُون پَیندا ہاں جو جِیں ویلے مَیں نیکی کرݨ دا اِرادہ کریندا ہاں تاں بُرائی میڈے کولھ آ موجود تھیندی ہے۔ 22کیوں جو دِلُوں تاں مَیں خُدا دی شریعت تُوں بہُوں خوش ہاں، 23پر میکُوں آپنڑے انگاں ءچ ہِک بئی شریعت نظر آندی ہے جیہڑی میڈی عقل دی شریعت نال لڑ تے میکُوں گُناہ دی اُوں شریعت دا قیدی بنڑا ڈیندی ہے جیہڑی میڈے انگاں ءچ کم کریندی ہے۔ 24ہائے! مَیں کیجھا بدبخت اِنسان ہاں۔ اِیں موت دے بدن کنُوں میکُوں کوݨ چُھڑویسی؟ 25خُدا دا شُکر ہے جو او ساڈے خُداوند یسُوع مسیح دے وسیلے میکُوں چُھڑویسی۔

بس میڈا حال ایہ ہے جو مَیں آپنڑی عقل کنُوں خُدا دی شریعت دا تے جِسم کنُوں گُناہ دی شریعت دا غُلام ہاں۔

Currently Selected:

رومیوں 7: SKRV

Highlight

Copy

Compare