اعمال 27

پولُس دی جہاز ءچ روم کیتے روانگی

1جِیں ویلے ایہ فیصلہ تھیّا جو اساں جہاز ءچ اِطالِیہ ویسوں تاں پولُس تے کُجھ ڈُوجھے قیدی شہنشاہی پلٹن دے ہِک صوبہ دار دے سپُرد کر ڈِتے گئے جِیندا ناں یُولِیُس ہا۔ 2اساں ادرمُتیُّم تُوں ہِک جہاز اُتے سوار تھی تے روانہ تھئے جیہڑا آسِیہ دی ساحلی بندرگاہاں کنُوں تھیندا ہویا اگُوں ونجنڑ آلا ہا۔ تے تھِسّلُنِیکے دا ارِسترخُس مَکِدُنی#27‏:2 یعنی مَکِدُنیہ صوبے ءچ تھِسّلُنِیکے شہر دا راہنڑ آلا۔ وی ساڈے نال ہا۔

3ڈُوجھے ڈینہہ جِیں ویلے جہاز صیدا ءچ کھڑا تھیّا تاں یُولِیُس مہربانی کر تے پولُس کُوں دوستاں نال مُلاقات کرݨ دی اِجازت ڈے ڈِتی تاں جو اُوندی خدمت تھی سگے۔ 4اُتھوں کنُوں ولا اساں جہاز اُتے روانہ تھئے تے کیوں جو ہوا ساڈے مخالف ہئی اِیں واسطے اساں [ہوا تُوں بچنڑ کیتے] کُپرُس دے شمال کنُوں لنگھے۔ 5وَل اساں کلکیہ تے پمفِیلیہ دے سمندر کنُوں لنگھ تے اگُوں ودھے تے لُوکیہ دے شہر مُورہ ءچ وَنج لتھے۔ 6صوبہ دار کُوں اُتھاں سکندرِیہ دا ہِک جہاز مِل گِیا جیہڑا اِطالِیہ ویندا پِیا ہا۔ بس ساکُوں اُوندے اُتے بِلھا ڈِتا۔ 7اساں بہُوں ڈینہاں تئیں ہولے ہولے اگُوں ودھدے ریہے تے مُشکل نال کَنِدُس دے سامنڑے پُجے پر تیز ہوا ساکُوں سِدھے اگُوں نہ ونجنڑ ڈِتا۔ وَل اساں ہوا تُوں بچنڑ کیتے سلمونے دے سامنڑے کنُوں تھی تے کریتے دے جنُوب کنُوں ٹُرے، 8تے بہُوں مُشکل نال ساحل دے نال نال اگُوں ودھدے ہوئے حسِین ناں دی بندرگاہ ءچ پُجے جِتُھوں لَسَیہ شہر نزدیک ہا۔

9سفر ءچ بہُوں ڈینہہ گُزر گئے ہَن تے ہُنڑ سمندری سفر بِیا وی خطرے آلا تھی گِیا کیوں جو روزہ دا ڈینہہ لنگھ گِیا ہا#27‏:9 روزے دے ڈینہہ اکثر اکتوبر ءچ ہوندے ہَن تے اُوں زمانے ءچ لوک خزاں دے بعد سمندری سفر بالکل نئیں کریندے ہَن۔۔ پولُس اُنہاں کُوں نصیحت کر تے آکھیا، 10”بِھراؤ! میکُوں لگدے جو ساڈا سفر بہُوں نُقصان دہ ہوسی، نہ صرف مال اسباب تے جہاز بلکہ ساڈیاں جاناں کُوں وی خطرہ ہے۔“ 11پر صوبہ دار پولُس دے گالھیں سُنڑݨ دی بجائے جہاز دے مالک تے اُوندے کپتان دے گالھیں کُوں زیادہ اہمیت ڈِتی۔ 12کیوں جو او بندرگاہ سیالا گُزارݨ کیتے چنگی نہ ہئی اِیں واسطے ڈھیر لوکاں دا فیصلہ ایہ ہا جو اساں اگُوں ودُھوں تے جے تھی سگے تاں فِینِکس ءچ پُج تے سیالے دا موسم لنگھاؤں۔ ایہ کریتے دی ہِک بندرگاہ ہئی جِیندا رُخ شمال مشرق تے جنُوب مشرق دو ہا۔

سمندر ءچ طوفان

13جِیں ویلے جنُوب کنُوں ہلکی ہلکی ہوا گُھلنڑ شروع تھی گئی تاں او سمجھے جو ”ہُنڑ ساڈا مقصد پُورا تھی سگدے۔“ اِیں واسطے اُنہاںلنگرچا تے جہاز ٹوریا تے کریتے دے ساحل دے نال نال اگُوں ودھے۔ 14پر تھوڑی دیر بعد ہِک طوفانی ہوا جیہڑی شمال مشرقی اکھویندی ہے، گُھل پئی۔ 15جِیں ویلے جہاز اُوندی گرفت ءچ آ گِیا تے اُوندا سامنڑا نہ کر سگیا، تاں اساں مجبور تھی تے جہاز کُوں ہوا نال واہنڑ ڈِتا۔

16واہندے واہندے کوَدہ جزیرہ دے گھٹ ہوا آلے پاسے پُجے تاں اساں چھوٹی کشتی کُوں بہُوں مُشکل نال قابو ءچ کر سگے۔ 17تے جِیں ویلے جہاز چلاوݨ آلیاں اُونکُوں جہاز اُتے چڑھا گِھدا تاں جہاز کُوں تروٹنڑ کنُوں بچاوݨ کیتے رسیاں نال بَدھ ڈِتا۔ اُنہاں کُوں ڈر ہا جو جہاز سُورتِس دے نیڑے ریت دیاں ٹِبیاں ءچ پَھس ویسی، اِیں واسطے اُنہاں لنگر کُوں سمندر ءچ سَٹ ڈِتا#27‏:17 اُنہاں جہاز کُوں روکنڑ کیتے یا لنگر کُوں لہایا یا ہوا کُوں چِھکنڑ آلے پڑدیاں کُوں یا ڈوہائیں کُوں۔۔

18ڈُوجھے ڈینہہ جِیں ویلے جہاز طوفانی ہوا ءچ بہُوں ای لوڈے کھاوݨ لگا تاں اُنہاں جہاز کُوں ہولا کرݨ کیتے مال سمندر ءچ سٹنڑ شروع کر ڈِتا۔ 19تریجھے ڈینہہ اُنہاں آپنڑے ای ہتھاں نال جہاز دا ضروری سامان وی سَٹ ڈِتا۔ 20جِیں ویلے بہُوں ڈینہاں تئیں نہ تاں سِجھ ڈِٹھا، نہ تارے تے شدید طوفان چلدا پِیا ہا تاں بچنڑ دی آخری اُمید وی ختم تھی گئی۔

21بہُوں عرصے تُوں اُنہاں کُجھ نہ کھادا ہا تاں آخر کار پولُس اُنہاں دے اَدھ ءچ کھڑا تھی تے آکھیا، ”بِھراؤ! جے تُساں میڈی نصیحت منیندے تے کریتے کنُوں روانہ نہ تھیندے تاں ایہ نُقصان تے ڈُکھ نہ چیندے۔ 22پر ہُنڑ مَیں تُہاڈی مِنت کریندا ہاں جو حوصلہ نہ ہارو۔ تُساں ءچوں کہیں دا جانی نُقصان نہ تھیسی پر صرف جہاز دا۔ 23کیوں جو خُدا جِیندا مَیں بندہ ہاں تے جیندی مَیں عبادت وی کریندا ہاں، اُوندا ہِک فرشتہ اِیں رات میڈے کولھ آیا، 24تے آکھیا، ’پولُس! اصلُوں نہ ڈر۔ تُوں رومی بادشاہ قیصر دے حضُور لازمی پیش تھیسیں تے تیڈی خاطر خُدا اُنہاں ساریاں دی جان بخش ڈِتی ہے جیہڑے جہاز اُتے تیڈے نال سفر کریندے پئے ہِن۔‘ 25اِیں واسطے صاحبو! تُساں آپنڑا حوصلہ وڈا رکھو۔ میڈا اِیمان ہے جو اُوہو کُجھ تھیسی جیہڑا میڈے خُدا میکُوں فرمائے۔ 26پر اساں ضرور کہیں جزیرے اُتے وَنج پُجسوں۔“

27چوڈھویں رات کُوں جِیں ویلے اساں بحر ِادریہ ءچ اِڈے اُڈے ٹکریندے ودے ہسے تاں ادھی رات دے نیڑے جہاز چلاوݨ آلیاں محسوس کیتا جو او کنارے دے نیڑے پُجدے پئے ہِن۔ 28اُنہاں پانڑی دی گہرائی ناپی تاں او اسّی ہتھ ہئی۔ وَل تھوڑا اگُوں وَنج تے ناپی تاں سَٹھ ہتھ ہئی۔ 29اِیں ڈر کنُوں جو کِتھائیں چٹاناں نال ٹکرا ونجے، اُنہاں جہاز دے پِچھلے حصہ کنُوں چار لنگر سمندر ءچ سَٹ ڈِتے تے سویل تھیوݨ کیتے دُعا کرݨ لگے۔

30جہاز چلاوݨ آلیاں جہاز تُوں بھج نِکلنڑ کیتے چھوٹی کشتی کُوں تلے لہایا پر ظاہر ایہ کیتا جو او جہاز دے اگُوں آلے حصہ کنُوں پانڑی ءچ لنگر سٹنڑ چاہندے ہَن۔ 31اِیندے تے پولُس صوبہ دار تے سپاہیاں کُوں آکھیا، ”جے ایہ لوک جہاز اُتے نہ راہسن تاں تُساں نئیں بچ سگدے۔“ 32اِیں واسطے سپاہیاں کشتی دیاں رسیاں کپ ڈِتیاں تے اُونکُوں سمندر ءچ چھوڑ ڈِتا۔

33سویل تھیوݨ کنُوں ذرا پہلے پولُس ساریاں دی مِنت کیتی جو کُجھ کھا گِھنو تے آکھیا جو ”پِچھلے چوڈھاں ڈینہہ تُوں تُساں فِکر کریندے کریندے کھانڑے کُوں ہتھ تئیں نئیں لایا۔ 34ہُنڑ مَیں تُہاڈی مِنت کریندا ہاں جو کُجھ کھا گِھنو، کیوں جو تُہاڈے بچنڑ کیتے ایہ ضروری ہے۔ تے یقین رکھو جو تُساں ءچوں کہیں دا وی کُجھ نُقصان نہ تھیسی۔“ 35ایہ آکھ تے پولُس کُجھ روٹی گِھدی تے ساریاں دے سامنڑے خُدا دا شُکر کیتا تے اُونکُوں تروڑ تے کھاوݨ لگا۔ 36اِیندے نال ساریاں دا حوصلہ ودھیا تے او وی کھاوݨ لگے۔ 37جہاز اُتے اساں کُل ڈُو سو چھہتر بندے ہسے۔ 38جِیں ویلے اُنہاں پیٹ بھر تے کھا گِھدا تاں اُنہاں ساریاں دانڑیاں کُوں سمندر ءچ سَٹ ڈِتا، تاں جو جہاز ہولا تھی ونجے۔

جہاز دی تباہی

39جِیں ویلے ڈینہہ نِکلیا تاں اُنہاں اُوں مُلک کُوں نہ سُنجانڑیا، پر ہِک ساحل ڈِٹھا جِیندا کنارہ صاف ہا۔ اُنہاں صلاح کیتی جو جے ممکن ہووے تاں جہاز کُوں اُوندے اُتے چڑھا گِھنوں۔ 40بس لنگر کھول تے سمندر ءچ چھوڑ ڈِتے تے جہاز دا رُخ بدلنڑ آلے چپُوواں دیاں رسیاں وی کھول ڈِتیاں۔ سامنڑے دا پڑدہ کھول تے اُتے چڑھا ڈِتا تے کنارے دو ودھے۔ 41پر جہاز ایجھی جاہ تے وَنج پِیا جِتھاں ڈوہائیں پاسُوں سمندر دا زور ہا۔ جہاز سُکی جاہ اُتے پُج تے ریت اُتے وَنج ٹِکیا۔ اُوندے اگُوں آلا حصہ تاں ریت ءچ دَھس گِیا پر پِچھلا حصہ چھلاں دے زور نال تِڑکنڑ لگا۔

42سپاہیاں دی صلاح ہئی جو قیدیاں کُوں مار سٹنڑ کِتھائیں اِینویں نہ تھیوے جو اُنہاں ءچوں کوئی تیر تے بھج ونجے۔ 43پر صوبہ دار پولُس دی زندگی بچاوݨ کیتے اُنہاں کُوں اِیں اِرادے تُوں روک ڈِتا تے حُکم ڈِتا جو پہلے او سبھ جیہڑے تیر سگدے ہِن، سمندر ءچ ٹپّا مار تے خشکی اُتے پُج ونجنڑ۔ 44تے باقی لکڑ دے پھٹیاں اُتے تے جہاز دیاں بنڑیاں چیزاں دی مدد نال آپنڑی جان بچاوݨ۔ بس اِیں طرحاں سارے دے سارے خشکی اُتے سلامت پُج گئے۔

Currently Selected:

اعمال 27: SKRV

Highlight

Copy

Compare