A3mel el-rousl 27
27
El-Safar 3a-Roma
1W-lamma ettafa2na w-2arrarna enno nsefir bel-ba7r 3a-Italya, sallamo Boulos wel-ma7bousin la-dabet min el-katibe el-Embratoriyye esmo Youlyos.
2Rkebna safine min Adramit w-re7na sawb shawate2 Ãsia, w-sefarna bel-ba7r ma3 Arestarkhos w-houe Makdoune min Tasalouniki,
3w-wsolna bel-yawm el-tene 3a-Sayda. W-bayyan Youlyos addeysh bi7ebbo la-Boulos, fa-sama7lo enno yrou7 la-3and asdika2o ta-yse3douh.
4Min ba3da sefarna min honik bi-mouwazet 2obros li2anno el-ree7 kenit bi-3aksna.
5Min ba3d ma 2ata3na el-ba7r bi-Kilikya w-Bamfilya nzelna bi-mina Mira bi-Likya.
6W-le2a el-ka2ed Youlyos safine min el-Eskandariyya msefra 3a-Italya, tlo3na 3leya.
7W-meshyet fina el-safine 3a-mahla 3eddit iyem, la-7add ma 2arrabna min ba3d jehd kbir min madinet Kanidos. W-mana3etna el-ree7 enno nenzal fiya, w-kaffeyna safarna w-serna 7add jaziret Krit 3end ras Salmouna.
8W-wsolna min ba3d ma 2ata3neh bi-sou3oube la-matra7 esmo "el-Mawene2 el-Sal7a" 7add madinet Lisa2iya.
9W-hek mara2 3leyna wa2et tawil la-daraje enno 2ata3et fatrit sawm el-Yahoud bel-khareef w-ne7na ba3dna bel-ba7r w-sar el-safar bel-ba7r khotir. Sar Boulos ynabbehon
102al: "ya rfe2e, bshouf enno el-safar min hon fiyo khatar w-khsara kbire mish bass 3al-safine w-7mouleta, fi khatar kamen 3ala arwe7na."
11Bass el-dabet 2tana3 bi-kalem el-koubtan w-sa7ib el-safine aktar min ma 2tana3 bi-kalem Boulos.
12W-ken el-mina ma byoslo7 enno n2adde fasl el-shete fih, fa-2arraret el-aktariyye enno lezim yfello minno, 3ala 2amal enno yousalo 3a-Fenix, w-houe mina bi-jaziret Krit bi-wejj el-jnoub el-gharbe wel-shmel el-gharbe, w-hek bi2addo fasl el-shete fih.
El-3asfe
13W-lamma nassamet ree7 jnoubiyye khafife, fakkaro enno talabon t7a'2a2, w-rafa3o el-merseye w-meshyo bi-mouwazet shatt Krit.
14Bass min ba3d wa2et ejet ree7 3asfe shar2iyye shmeliyye esma Orokliyon min meylet el-jazire
15w-darabet el-safine. W-lamma el-safine ma edrit t2ewema, saret el-safine bi-wejj el-ree7.
16W-7tamayna min el-ree7 lamma mara2na bi-mouwazet jazire zghire esma Kawda, w-ederna bi-sou3oube enno nkhallis el-shakhtoura yalle bitnajjina.
17W-lamma rafa3o el-shakhtoura 3al-safine akhado 7azaron, w-shaddouwa bel-7bel. W-khafo tfout el-safine bi-raml met7arrek bi-se7il Libya, fa-nazzalo el-marasi yalle bit3awwim el-safine w-tarako el-mawj ymashshe el-safine.
18W-2ewyet el-3asfe bel-yawm el-tene, w-saro ykebbo el-7moule bel-ba7r.
19W-bel-yawm el-telit akhado aweyil el-safine w-kabbouwon bel-ba7r.
20W-mara2 iyem ktire ma shefna fiya el-shams wala el-njoum, w-be2yet el-ree7 3am te3sof 7atta 2ata3na kell 2amal enno ennajje.
21W-keno rjel el-safine sarlon zamen ma akalo, we2f Boulos bayneton w-2allon: "ya rfe2e, ken lezim tesma3oule, w-ma tsefro min Krit, kento se3eta khallasto 7alkon min hal-akhtar wel-khsarat.
22W-halla2 betlob minkon tetshajja3o, li2anno ma 7ada minkon ra7 yekhsar 7ayeto, bass el-safine wa7da ra7 tetkassar.
23Bi-hal-leyle ejene malèk min Ilehe yalle be3bado
24w-2alle: "ma tkhaf, ya Boulos! La-bodd ennak trou7 la-3and el-2aysar. W-ALLAH 3atak 7ayet la-kell el-msefrin ma3ak."
25Kermel hek tshajja3o ya rfe2 li2anno boutha2 bi-ALLAH, w-ra7 ysir metl ma 2alle el-malèk.
26W-la-bodd enno yekhedna el-mawj 3a-shi jazire."
27W-bel-leyle el-arba3-ta3sh lamma kenna day3in bi-ba7r Adriya, fakkaro el-ba7ara bi-noss el-leyl ennon 3am bi2arrbo min el-yebse.
28W-lamma 2aso ghem2 el-ba7r, le2ouh khamsa-w-tleteen mitr, w-rej3o 2asouh ba3d masefe 2asire, le2ouh shi khamsa-w-3eshreen mitr,
29Fa-khafo enno tfout el-safine bel-skhour, se3eta kabbo min wara el-safine arba3 marasi w-nataro tlou3 el-daw bi-feregh el-sabr.
30W-jarrabo el-ba7ara ennon yeherbo min el-safine, w-nazzalo el-shakhtoura 3al-ba7r 3amlin 7alon enno baddon ykebbo el-marasi min el-safine min eddem.
31Se3eta 2al Boulos lal-dabet w-jnoudo: "eza hal-ba7ara ma ra7 yeb2o bel-safine, ma bitnajjo."
32Fa-2ata3o el-jnoud 7bel el-shakhtoura w-tarakouha tou2a3 bel-may.
33W-2arrab tlou3 el-daw, fa-talab minnon Boulos ennon yeklo shi, w-2al: "mara2 halla2 arba3-ta3shar yawm w-ento natrin saymin ma 3am teklo shi.
34Betlob minkon teklo ta-tnajjo, w-ma ra7 tou2a3 sha3ra we7de min raskon."
35W-lamma 2al hal-shi, akhad khebz w-shakar ALLAH eddem 3younon kellon, min ba3da sha2afo w-ballash yekol.
36Se3eta tshajja3o kellon w-akalo.
37W-ken 3adadna bel-safine miteyn w-sitta-w-sab3een nafs.
38Min ba3d ma sheb3o, saro ykebbo el-2am7 bel-ba7r ta-ykhaffefo 3an el-safine.
Istidam el-safine
39W-lamma toli3 el-daw ma edro el-ba7ara ya3erfo 3ala ayya ard woslo. Bass shefo el-shatt khaleej zghir, w-2arraro enno yedefsho el-safine 3al-shatt eza edrin.
40Rafa3o el-marasi w-tarakouwa tou2a3 bel-ba7r, w-fakko bi-nafs el-wa2et el-7bel yalle bterbot daffit el-safine, min ba3da rafa3o el-shre3 el-zghir w-ra7o sawb el-shatt.
41Bass el-safine fetit bi-talle min el-raml bayn el-may, w-3el2it fiya el-safine min eddem, w-ma ba2a edrit tet7arrak. W-tkassaret el-safine min wara min ketrit el-mawj.
42W-2arraro el-jnoud enno ye2etlo el-ma7bousin ta-ma yeherbo sbe7a 3al-shatt.
43Bass el-dabet arad enno ykhallis Boulos, w-mana3on min hal-shi, w-2amar yalle bya3erfo sbe7a enno ye2ta3o abl ghayron 3al-yebse,
44w-enno yel7a2ouwon el-be2yin, 3al-lwe7 aw 3ala 7outam el-safine. W-hek woslo kellon 3al-yebse selmin.
Currently Selected:
A3mel el-rousl 27: BB3arabe
Highlight
Share
Compare
Copy
Want to have your highlights saved across all your devices? Sign up or sign in
Lebanese.bible © 2024 Bible Society Lebanon
Bible Society street Bible Society Center Sed El Bouchryeh Beirut - Lebanon P.O.Box: 11-0747 Riad El Solh, Beirut 1107 2060, Lebanon
All Rights Reserved.
