मर्कूस 8

येशूकी हजार स्‍यी मिला साप बिन्‍दाते

(मत्ती १५:३२-३९)

1थेजीनराङ याङराङ पालोई आउदी काल्‍बेई मि येशू दोन्‍दु जम्‍मा ओङा ओतान। थेबाताङ साच्‍येते छ्याःङ मेता थोङगीन थेकी चेलातेबाला दोन्‍दु काताङगीन 2“दि मिओन दोक खाईन देताते थोङजीन ङाला आउदी ङिङज्‍ये लासुङ। दिबा दुरू ङात्ताङराङ देताते ङीमा सुम गाल्‍गीन सिन्‍सुङ। दिबाताङ साच्‍येतेङ छ्याःङ मिन्‍दुक। 3थेमे कोई कोईनी आदो थारीलेईराङ वाबाते ईन। था तुक्‍पाराङ खाँपा ग्‍युक सिन ताङसीन ख्‍याम्‍गीन ख्‍याम्‍गीनलाराङ दिबा त्‍वाबेकी स्‍याङ थुप्‍क्‍यो,” सिन सिदुक। 4थोक सिरजीन चेलातेबेकी “आबिई गुरू, दि छ्याःङ मेङेत्‍च्‍ये ठाउँदुङ दर्गेई दर्गेई मिला साप तेराला च्‍यि ङेत्‍कीतेरो?” सिन सिदुक। 5थेमे थेकी “ख्‍योकोनताङ स्‍योबेन थोईजो ओते?” सिन ठिजीन थेबेकी “स्‍योबेन दुईन ओत,” सिन सिदुक। 6थेमे थेकी थे मिओनला साला देत च्‍युत्‍सुङ। थेरूई थेकी थे स्‍योबेन दुईन लाःक्‍तु लाकीन परमेश्‍वरला धन्‍यवाद बिन्‍गीन सिन्‍नामेकी मिओनला गोला बिन सिन च्‍य्‌वाकीन चेलातेबाला तेरगीन खासुङ। थेमे चेलातेबेकीङ मि गाङेला गोकीन बिन्‍सुङ। 7चेलातेबाताङ ठमीतेन्‍दे ङ्याङ ङिचो सुमजो ओतान। थेमे थेकी थे ङ्ये लाईदुङ परमेश्‍वरला धन्‍यवाद बिन्‍नामेई स्‍योबेन च्‍योकराङ खाईन मिओनला गोला बिन सिन चेलातेबाला बिन्‍सुङ। 8थेमे मि गाङेकी डाडासाक सोसुङ। थेबेकी सोकीनोङ चेलातेबेकी थेरू लूबाते स्‍योबेनताङ ङ्ये टुक्राटुक्रीकी तोलुम दुईन काङसुङ। 9थेरू थोक खाला साप साकान्‍ते मि हजार स्‍यीजो ओतान। मि गाङेला थेरूई खाम्‍बा खाम्‍बाला ताङगीन सिन्‍नामेई 10येशू चेलातेबाताङ डुङ्गाला जेकीन दलमनुथा सिरसे नाङपा गाल्‍सुङ।

फरिसी पाटी मिओनगी येशू सेम ता चालाते

(मत्ती १६:१-४)

11थेमे कोई कोई फरिसी पाटी मि येशू ओत्‍सादु ख्‍योल्‍गीन थेला बात ठाप्‍ला स्‍यूसुङ। थेबेकी थेला “लो खोत्ताङ परमेश्‍वर शक्ति ओत सासीन ङ्योकोनला खइँदा अचम्‍बते कामज्‍यीक खाला तेन्‍ते,” सिन थे सेम ता चाल्‍सुङ। 12थोक सिरजीन येशूला मेलेबा लासुङ। थेमे हुईरा खिन थेकी “ख्‍योकोन था समय मिओन च्‍यिला खालि अचम्‍बते काम खाला तेन खिते? ख्‍योकोनगी साबाच्‍योक ङा खितराङ मिक्‍किओ। ङात्ताङ परमेश्‍वर शक्ति ओत सिराला ङा ख्‍योकोनला कामज्‍यीगोङ खाला मेतेनो,” सिन सिदुक। 13थेमे थेबाताङ ठाल्‍गीन येशू याङराङ डुङ्गाला जेकीन समुन्‍द्रे फारकेनपा गाल्‍सुङ।

येशूकी चेलातेबाला थापाते

(मत्ती १६:५-१२)

14थेरूकी डुङ्गाला जेला डोजीन चेलातेबेकी साच्‍येते खेरा टोक ज्‍येता ओतान। थेबाताङ स्‍योबेनज्‍यीककामा ओतान। 15थे बेलालाराङ येशूकी थेबाला “फरिसी पाटी मिओन थेमे हेरोदताङ स्‍योबेनला लुच्‍येते सोडा ओत। थे सोडा खेराङला मेतेरस्‍यीत सिन ख्‍योकोन च्‍याङबो खिसा है,” सिन सिदुक। 16थेकी च्‍यि साबाते ईन्‍दे सिन माखोबेकी चेलातेबेकीचेन “ङुरूङगी साच्‍येते खुला माबाकीका गुरूकी दोक साबा ईन्‍दा च्‍यिन्‍दा,” सिन खोपरोङ नाङ बात खासुङ। 17थेबे बात थोकीन थेकी “ख्‍योकोन च्‍यिला साच्‍येते बातकामा खाला ख्‍योकोनगी साप खुला माबाक्‍वा सिनका ङे थे बात खाबाक्‍वा सिन विचार खिते? च्‍यि ख्‍योकोनगी ङे खाबाते काम थोङगीनोङ थोरूमोङ छ्याःङ खोबा मेत? ख्‍योकोन लेम्‍बा ईन्‍दाना च्‍यिन्‍दे? च्‍यि ख्‍योकोनगीङ ज्‍येनगी च्‍योकराङ छ्याःङ मोखोदुक? 18ख्‍योकोनते मिक ओत्‍लाङ च्‍यिला छ्याःङ मोथोङका? थेमे नामज्‍योक ओत्‍लाङ च्‍यि ख्‍योकोनगी छ्याःङ मोथोदुक? ङे खाबाते काम गाङे ख्‍योकोनगी टोक ज्‍येत्‍सुङाना च्‍यिन्‍दे? 19ङे स्‍योबेन ङेकी हजार ङा मिला सा तेरजीन थेरू लूबाते टुक्राटुक्रीकी ख्‍योकोनगी तोलुम थोई काङा ओताने?” सिन सिरजीन थेबेकी “तोलुम च्‍युन्‍ङी,” सिन सिदुक। 20“थेमे लोक्‍ला स्‍योबेन दुईनगी हजार स्‍यी मिला साप तेरजीन थेरू लूबाते टुक्राटुक्रीकी ख्‍योकोनगी तोलुम थोई काङा ओताने?” सिन ठिजीन थेबेकी “तोलुम दुईन,” सिन सिदुक। 21लोईन थेकी “ङे थोक थोक खाबा थोङजीनोङ ख्‍योकोनगी थोरूमसाक चुक खाईन छ्याःङ माखोसुङा?” सिन सिदुक।

येशूकी अन्‍धला थोङच्‍या जोबाते

22थेमे येशूताङ थे चेलाओन बेथसेदादु लेप्‍सुङ। थेरू लेप्‍नामेकी मिओनगी अन्‍धज्‍यीकला येशू ओत्‍सादु क्‍याल्‍गीन “दिला दोला मिगी थोङच्‍या जोला नाङ,” सिन सिदुक। 23येशूकी थे मिला लाक्‍पाला जुम्‍गीन युलदुकी फजेकपा टीकीन खेरसुङ। थेमे थे मि मिकनापा थुक खाईन लाक्‍पा ज्‍यागीन “खुई खइँदा थोङगीदुक?” सिन ठिसुङ। 24थेमे थे मिकी फार छुर ताकीन “मिओन ख्‍याम्‍बा थोङानी थोङगीदुक। थेबा मि ईन्‍दा दोङबो ईन्‍दा थोरूमोङ लेमु खाला डेला मुथुप्‍तुक,” सिन सिदुक। 25थेकी याङराङ थे मि मिकनापा लाक्‍पा ज्‍याक्‍सुङ। थोक खानामेकी थे मि लेमु खाईन जेसुकै थोङच्‍या गाल्‍सुङ। 26थेमे थेकी थेला “खो था देपा युलनापा मोन्‍डोबा खाला सरासर खाँपा ग्‍युक,” सिन ताङसुङ।

पत्रुसकी येशूला ख्रीष्‍टराङ ईन साबाते

(मत्ती १६:१३-२०; लूका ९:१८-२१)

27थेरूई येशू चेलातेबाताङराङ सिजरिया फिलिप्‍पी सिरसे नाङपा युल युलला ड्वाप्‍ला ख्‍याम्‍सुङ। थेपा डुइन डुइनला लामला थेकी चेलातेबाला “ङाला मिओनगी सु दुका खिका?” सिन ठिसुङ। 28थोक सिरजीन चेलातेबेकी “गुरू खोल्‍ला लालेकी बप्‍तिस्‍मा तेरकान्‍ते यूहन्‍ना सोम्‍बो लोगीन वाबाते दुका खिदुक। कोईकी थाङबो परमेश्‍वर बात खित्‍कान्‍ते एलिया दुका खिदुक। थेमे कोईकीचेन परमेश्‍वर बात खित्‍कान्‍तेबे नाङ दोक्‍पोई लोक्‍ला वाबाते ईन सिन बात खिदुक,” सिन सिदुक। 29लोईन थेकी थेबाला “थेमे ख्‍योकोनलाचेन ङा सु ईन सिराच्‍योक लाङगीका याङ?” सिन ठिजीन थेबे नाङ पत्रुसकी “गुरू, खो परमेश्‍वरगी तोङगो साबाते ख्रीष्‍ट ईन,” सिन सिदुक। 30पत्रुसकी थोक सानामेई थेकी थेबाला “ङा थेराङ ईन सिन ख्‍योकोनगी सुङलाङ मासेर,” सिन कोत्‍सुङ।

येशूकी थे खोरोङ स्‍यिच्‍येते बात खाबाते

(मत्ती १६:२१-२३; लूका ९:२२)

31थेमे दि तिरीमेकीचेन येशूकी चेलातेबाला “था परमेश्‍वर ओत्‍सादुई वाबाते मि ङे आउदी दुक्‍पा भोगे खिता फाप्‍क्‍यो। यहूदी छ्ये छ्ये मि, छ्ये छ्ये पूजारी थेमे धर्मे गुरूओनगी ङाला परमेश्‍वरगी ताङाते ईनराङ मेन सिन सिओ। थेमे सेदोङ ज्‍युत्‍क्‍यो। तर ङीमा सुम तिरी ङा सोम्‍बो लोइओ,” सिन थे खोरोङला ओङच्‍येते बाततेबा लाःपाला स्‍यूसुङ। 32थेकी थे खोरोङला चुक चुक ओङगीते सिन गाङे थेबाला लाःप्‍सुङ। दि बात थोनामेई पत्रुसकीचेन थेला फजेकपा खेरगीन “प्रभु, खुई दोक्‍ते बात माकेत,” सिन थापाला स्‍यूसुङ। 33थोक खित्‍जीन चेलातेबा ओत्‍सापाला ख्‍युर ग्‍युरगीन थेकी पत्रुसला “शैतान, खो दुरू ङे मिगी दोन्‍दु मादेत। परमेश्‍वरगी दोक खाला काम मिक्‍किओ। खुई साबाते दि बातनी परमेश्‍वरगी खित्‍च्‍येते कामताङ डिकराङ मिडिक्‍च्‍येते ईन,” सिन ङारसुङ।

येशूताङ ख्‍याम्‍बाला चुक ओङा फाप्‍कीते

(मत्ती १६:२४-२८; लूका ९:२३-२७)

34थेमे येशूकी चेलातेबाताङ थेरू मि गाङेला दोन्‍दु काताङसुङ। थेमे थेबा गाङेताङ बात खिन “ङात्ताङ ख्‍याम्‍बा सेम खित्‍कान्‍ते मिकीचेन दाक्‍पोन खुशीला ख्‍याम्‍बा तोङा फाप्‍क्‍यो। जस्‍तो दुक्‍पा ओङसीनोङ ओङस्‍यीत सिन थेकी दाक्‍पोन टाँए खाला स्‍या फाप्‍च्‍येते स्‍यिङगी थाम खुरला ङे तिरी ख्‍याम्‍बा फाप्‍क्‍यो। 35च्‍यि सासीन तिरी बो माताबा खाला सुइँदेकी दाक्‍पोन ज्‍यानगी माया खिदुक सासीन थेकी नोमुङ मिसिन्‍च्‍येते जुनी मेङेदो। दाक्‍पोन फाइदा माताबा खाला ङे लाईदु थेमे गा लाङच्‍येते बात लोपे लाईदु दाक्‍पोन ज्‍यानगी मायाङ मारे खित्‍कान्‍ते मिकीचेन नोमुङ मिसिन्‍च्‍येते जुनी ङेत्‍क्‍यो। 36सुइँदेकी दि जुनीला दि सा लुङबादु ओतातेबरी जेसुकै ङेता ओत्‍सीनोङ स्‍यिनामेई थे मिते च्‍यि आश ओङगीतेरो? 37थोक्‍ते मिकी च्‍यि खाला याङराङ थे खोरोङ जुनी ङेत्‍कीतेरो? छ्याःङ खालाङ थेकी थे जुनी मेङेदो। 38ख्‍योकोन था समय मिओननी परमेश्‍वरला माने खिता ताङगीन मेलेबा मेलेबा काम खित्‍कान ईन। ख्‍योकोन नाङ सुइँदेकी ङे मि ईन सिराला ङोचा खिदुक थेमे ङे बात मेङेन्‍दुक सासीन परमेश्‍वर ओत्‍सादुई वाबाते मि ङाङ तिरी ग्‍युरला ओङजीन थोक्‍ते मिला ङो मेस्‍येओ सिन सिओ। थेजीन ङा आबेते छ्येज्‍यीक शक्ति ङेत्‍ला नाम्‍दाककी झिलिमिली गाल्‍ला थे दूतओनताङ दुरू ग्‍युरला ओङगो,” सिन सिदुक।

Currently Selected:

मर्कूस 8: JUL

Highlight

Copy

Compare