मर्कूस 11
11
येशू यरूशलेमपा गालाते
(मत्ती २१:१-११; लूका १९:२८-४०; यूहन्ना १२:१२-१९)
1थेबाबरी डुइनराङ ओतान। था यरूशलेमदु लेपाला थोक थारी मेतान। थेबा जैतुन बोमदु बेथफागेताङ बेथानी सिराते युलनापा लेपा खाबा ओतान। थेमे येशूकी चेलातेबा मेन्दा ङिला दोन्दु काताङगीन 2“लो ख्योकोन ङिबो उफि युलनापा ग्युक। थे युलनापा स्यूक्पाज्यीकताङ ताकीन ज्याक्पाते गधे कीउज्यीक ख्योकोनगी थोङगो। थेला थातासाक सुङ जेबा मेत। थे ताङला च्याला देपा खोरच्योक। 3थे तोङजीन सुइँदेकी ख्योकोनला ‘च्यिला तोङगीते?’ सिन सासीन ‘प्रभु येशूला गोसुङलो, था होत्ता खुलाङगो,’ सिन सि,” साकीन थेरूकी गोमा गोमा ताङसुङ।
4युलनापा लेप्नामेकी थेबा ङिबोकी येशूकी साबा च्योकराङ लामगी खादु खाम्बे गोज्यीक्तु ताकीन ज्याक्पाते गधे कीउज्यीक थोङसुङ। थेला तोङजीन 5थेङलाराङ ओताते कोई कोई मिकी थोङगीन “एइ ख्योकोन च्यिला थे गधे कीउ तोङगीते हँ?” सिन सासुङ। 6थेबा ङिबोकी येशूकी सि साबाच्योक सानामेई थेबेकी बिन्गीन ताङसुङ। 7थेमे थे गधे कीउ टीकीन थेबा ङिबो येशू ओत्सादु लेप्सुङ। थेमे खोपरोङगी लाक्तु खोन्दाते खोलाक टोल्गीन गधे कीउ लाक तिङगीन बिन्नामेई येशू थे लाक्तु जेकीन ख्याम्सुङ। 8थे थोक खाईन गधे कीउ लाक्तु जेकीन ख्याम्नामेई थेत्ताङ ख्याम्गीन ओताते मि काल्बेईकी खोपरोङगी लाक्तु खोन्दाते खोलाक टोल्गीन लामला तिङसुङ। कोईकीचेन थेङला ओताते दोङबो हाँगाओन च्यागीन लामला तिङसुङ। दोक खाईन थेबेकी थेला मान खासुङ। 9थेमे थे गोमाङ तिरीङ ख्याम्गीन ओताते मिओनगी छेरा खिनकामा “होसन्ना, प्रभु परमेश्वरगी देमा ताङाते गेल्बो काल्बासाक सोन्स्यीत। थेते जय जय ओङस्यीत। 10ङुरूङ ज्युज्यु गेल्बो दाऊद राज्य था याङराङ ङेत्च्या ओङसुङ। दि राज्य था नोमुङ मोतोरस्यीत। स्वर्गने देत्कान्ते प्रभु परमेश्वरते जय जय ओङस्यीत,” सिन सिराला स्यूसुङ। 11थोक खिन खिनलाराङ येशू यरूशलेमपा ख्योल्सुङ। थेरू ख्योल्नामेई थेकी परमेश्वर मन्दिरदु गाल्गीन फार छुर गाङेपा जेसुकै तासुङ। थोक खाला तेइन तेइनला नाम स्योकीन सिन्दा ओतान। थेमे चेलातेबा च्युन्ङीताङराङ थे बेथानी सिराते युलनापा गाल्गीन देत्सुङ।
येशूकी नेभारे दोङबोला सराप बिन्दाते
(मत्ती २१:१८-१९)
12थेमे ङारो ङोमु च्योक्ते येशूताङ चेलातेबा बेथानीदुकी यरूशलेमपा ग्युरगीन लिच्युङ। थेजीन येशूला त्वाबा लाबा ओतान। 13डुइन डुइन थेकी आदो थारीलेईराङ पालुवा फेरे खाईन दाम्मा ङोम्मु गाल्गीन सिन्दाते नेभारे दोङबोज्यीक थोङसुङ। दाम्मा थोक ङोम्मु गाला थोङगीन नेभारा गोन्दा ओतासीन सिन थे थेपा तार गाल्सुङ। तर थेकी थे दोङबोला नेभारे गेडाज्यीगोङ माथेप्सुङ। थे दोङबोला खालि दाम्माकामा ओतान। थेजीन नेभारा गोन्च्ये बेला लेपा मेतान। 14दाम्माकामा ओता थोङनामेई थेकी थे दोङबोला “थानामेई खुईते सुङगीङ फलफूल गेडाईओङ सा माफाप्स्यीत। था खोल्ला फलफूल गेडाईओङ मोगोन्स्यीत,” सिन सिदुक। थेकी थे दोङबोला सराप बिन्दाते चेलातेबेकीङ थोसुङ।
येशूकी परमेश्वर मन्दिरदु खाबाते काम
(मत्ती २१:१२-१७; लूका १९:४५-४८; यूहन्ना २:१३-१६)
15थेबा थेरूकी यरूशलेमपा लेप्नामेई येशू परमेश्वर मन्दिरदु गाल्सुङ। थेमे थेकी थेरू मन्दिर स्याङके नाङला देत्ला छोङकान्ते थेमे ङ्योकान्ते मि गाङेला फिनामा तेन्गीन ताङसुङ। थोक खित्जीन थेकी थेरू पैसा ज्येला तेरकान्ते मिओनते टेबलतेबा रिल्गीन ताङसुङ। थेमे गन्दीमा छोङाला देताते मिओन देताते टेबलतेबाङ रिल्गीन ताङसुङ। 16माल सामान खुरला फार छुर खित्कानलाङ सुङलाङ मन्दिर स्याङके नाङ खाईन ख्याम माच्युत्सुङ। 17थेकी “परमेश्वर बातला परमेश्वरगी ‘ङे खाम्बा लुङबा लुङबे मि वाला ङाला प्रार्थना खिताला जोबाते ईन,’ सिन साबा ओत। परमेश्वरगी थोक साबाते बात च्यि ख्योकोनला छ्या मेत? ख्योकोनगीनी दुरू चोर डाँका देत्च्येते ठाउँ च्योकका जोदुक। ख्योकोन दुरूकी थेन्ला ग्युक,” सिन थे मि गाङेला तेन्गीन ताङसुङ।
18थेकी थोक थोक खासुङ सिन थोनामेई छ्ये छ्ये पूजारीताङ धर्मे गुरूओनला ज्यीबा लासुङ। च्यिला सासीन मि गाङेराङ येशूकी चुक लेमु खाला बात लोप्कीका सिन थे छ्य्वापा लै खिताला स्यूबा ओतान। थोक थोङगीन था थेकी मिबरी थे खोरोङ लाःक्तु लाला थोरूम चुक चुक खिताना सिन ज्यीबेकी छ्ये छ्ये पूजारीताङ धर्मे गुरूओनगी थेला सेत्च्येते मौका छोलाला स्यूसुङ। 19थे छोमु नाम स्योनामेई येशू याङराङ चेलातेबाताङ सारदुकी थेन्गीन गाल्सुङ।
परमेश्वरला विश्वास खासीन जेङ ओङगो
(मत्ती २१:१८-२२)
20थेमे याङराङ ङारो ङोमु च्योक्ते येशूताङ थे चेलाओन यरूशलेमपाराङ डोजीन थेबेकी थे नेभारे दोङबो चाप्रेनमेईराङ कोम्बो सिली गाल्गीन स्याप्ते थोङसुङ। 21थे दोङबो स्या थोङजीन येशूकी थोङगी छोमु सराप बिन्दाते ठेम्बा लाकीन पत्रुसकी “लो तो गुरू, खुई सराप बिन्दाते दोङबोनी स्यिदुक,” सिन सिदुक। 22थेकी थोक सिरजीन येशूकी थेबा गाङेला “थोगी परमेश्वरगी जस्तो कामोङ खिता थुप्क्यो सिन ख्योकोनगी थेला विश्वास खि। 23दि बात छ्या स्येबा खि। च्यि सासीन खेराङगी साबाच्योक परमेश्वरगी पक्काराङ खिओ सिन छ्याःङ शंका मिक्किता खाईन ख्योकोनगी उथे बोमला थेरूकी खोर फोक्ला समुन्द्रमा स्यू सासीनोङ ख्योकोनगी साबा च्योकराङ ओङगो। 24थोगी ङा ख्योकोनला च्यि सिते सासीन ख्योकोनगी प्रार्थना खित्जीन परमेश्वरताङ नाङ खाबाते पक्काराङ ङेत्क्यो सिन छ्याःङ शंका माक्यासीन जे नाङ खासीनोङ दाक ङेत्क्यो। 25तर परमेश्वरताङ प्रार्थना खित्जीनचेन ख्योकोनते सुइँदाताङ खइँदा स्येदाङ ओत्सीन थे माफ बिन्ला थेजीनमेई थे स्येदाङ खुरा मेङगो। ख्योकोनगी थोक खासीनकामा स्वर्गने देत्कान्ते आबा परमेश्वरगी ख्योकोनगी खाबाते पाप माफ तेरग्यो। 26ज्येनगी खाबाते गल्ती माफ माबिन्सीन स्वर्गने देत्कान्ते आबा परमेश्वरगीङ ख्योकोन पाप माफ मेतेरो,” सिन सिदुक।
येशूला सुई अधिकार ङेत्ला काम खिते सिन ठिबाते
(मत्ती २१:२३-२७; लूका २०:१-८)
27थेमे थेबा यरूशलेमपा लेप्नामेई येशू परमेश्वर मन्दिरदु गाल्सुङ। थेमे थे मन्दिर नाङला फार छुर दोक तेइन ओते बेलाला छ्ये छ्ये पूजारी, धर्मे गुरूओन थेमे ज्येनोङ यहूदीओनते ज्येनोङ छ्ये छ्ये मिकी दोन्दु वाकीन थेला 28“खो दुरू मन्दिरदु वाला मिओनला लोप्च्येते थेमे मिओनला दुरूई तेन्ला तोङच्येते खुईते च्यि अधिकार ओते? खोल्ला दोक खि सिन सुई कोत्सुङा?” सिन सिराला स्यूसुङ। 29थोक सिरजीन थेकीङ “लो ङाङ ख्योकोनला बातज्यीक ठामीन। दि बात लाःप्सीन दुरू दोक खित्च्येते अधिकार ङाला सुई बिन्दाते ईन्दे सिन ङा ख्योकोनला लाःप्क्यो। 30लो दि बात ङाला सिते ओना, मिओनला छ्युला लुक्ला बप्तिस्मा तेरकान्ते यूहन्नाला थे काम खि सिन परमेश्वरगी ताङाते ईन्दाना मिकी ईन्दे?” सिन सिदुक। 31थोक सानामेई थेबाबरी था च्यि सिरापना च्यि सिराप गाल्गीन खोपरोङ नाङ दोक सिन ठो खिताला स्यूसुङ। “था दिला च्यि सिरच्ये? यूहन्नाला थे काम खिताला परमेश्वरगी ताङाते ईन सिइ सासुङ सासीन दिकी ङुरूङला च्यिला थे बात माङेन्दे सिरच्या ओङसुङ। 32मेन मिकीका ताङाते ईन सिइ सासीन मिओनगी ङुरूङला चुक खाओङा?” सिन बात खासुङ। यूहन्ना परमेश्वर बात खित्कान्ते मि ओतान सिन मि गाङेकी मान खिन ओतान। थोगी मिओन ज्यीबेकी थेबेकी यूहन्नाला थे काम खि सिन मिकी कोताते ईन सिन सिरच्ये आँट माक्यासुङ। 33थोगी ज्येनतोक छ्याःङ सिरा माथुपेई थेबेकी येशूला “थेला थोक खि सिन सुई ताङाते ईन्दे सिन ङ्योकोनला छ्याःङ छ्या मेत,” सिन सिदुक। थेमे थेकीङ “थोक सासीन दुरू दोक खित्च्येते अधिकार ङाला सुई बिन्दाते ईन्दे सिन ङाङ ख्योकोनला मिसिरो,” सिन सिदुक।
Currently Selected:
मर्कूस 11: JUL
Highlight
Copy
Compare
Share
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
